An Pinakadakulang Tawo na Nabuhay Kasuarin Pa Man

Kapitulo 13: Pakanood sa mga Pagsugot ki Jesus

PAKABAUTISMOHI tolos sa saiya, si Jesus giniyahan kan espiritu nin Dios pasiring sa kaawagan nin Judea. Kadakol kan dapat niang horophoropon, ta kan bautismohan sia “an kalangitan nagkaburukasan,” tanganing mamansayan nia an langitnon na mga bagay. Tunay nanggad, dakolon an dapat niang horophoropon!

Si Jesus nagdanay nin 40 aldaw asin 40 banggi sa kaawagan asin dai nagkakan durante kan panahon na ini. Dangan, kan si Jesus gutomon na, an Diablo nagdolok tanganing sugotan sia, na nagsasabing: “Kun ika aki nin Dios, sabihi an mga gapong ini na magin tinapay.” Alagad aram ni Jesus na salang gamiton nia an saiyang milagrosong kapangyarihan sa pagpanigo sa saiyang personal na mga pagmawot. Kaya nagsayuma siang masugotan.

Alagad dai suminuko an Diablo. Prinobaran nia an saro pang paagi. Inangat nia si Jesus na lumampaw hale sa lanob kan templo tanganing iligtas sia kan mga anghel nin Dios. Pero dai nasugotan si Jesus na gibohon an siring na pagpasale. Nagkokotar sa Kasuratan, ipinaheling ni Jesus na salang baloon an Dios sa paaging ini.

Sa ikatolong pagsugot, ipinaheling kan Diablo ki Jesus an gabos na kahadean sa kinaban sa sarong milagrosong paagi asin nagsabi: “Ini gabos itatao ko sa saimo kun ika lumuhod asin gumibo nin sarong akto nin pagsamba sa sako.” Alagad sa giraray si Jesus nagsayumang padara sa sugot na gumibo nin sala, na pinipiling magdanay na maimbod sa Dios.

May manonodan kita sa mga pagsugot na ini ki Jesus. Halimbawa, ipinaheheling kaiyan na an Diablo bako sanang sarong kuwalidad nin karatan, siring sa paniwala nin iba, kundi na sia sarong tunay, dai naheheling na persona. An mga pagsugot ki Jesus nagpapaheling man na an gabos na gobyerno sa kinaban sadiri kan Diablo. Huli ta paano magigin tunay na sugot an pag-alok kaiyan kan Diablo ki Jesus kun bako nia talaga iyan sadiri?

Asin horophoropa ini: An Diablo nagsabi na andam siang tawan nin balos si Jesus para sa sarong akto nin pagsamba, na itatao saiya pati an gabos na kahadean sa kinaban. An Diablo puwedeng sugotan nanggad kita sa kaagid na paagi, na tibaad iinaatubang sato an nakaaakit na mga oportunidad na magkamit nin kinabanon na kayamanan, kapangyarihan, o posisyon. Alagad magigin madonong nanggad kita sa pagsunod sa halimbawa ni Jesus paagi sa pagdadanay na maimbod sa Dios ano man an sugot! Mateo 3:16; 4:​1-11; Marcos 1:​12, 13; Lucas 4:​1-13.

▪ Ano an mga bagay na minalataw na pinaghorophorop ni Jesus durante kan 40 aldaw nia duman sa kaawagan?

▪ Paano hiningoa kan Diablo na sugotan si Jesus?

▪ Ano an satong mga manonodan sa mga pagsugot ki Jesus?