An Pinakadakulang Tawo na Nabuhay Kasuarin Pa Man

Kapitulo 14: An Enot na mga Disipulo ni Jesus

PAKAAGI nin 40 aldaw sa kaawagan, si Jesus nagbalik ki Juan, na nagbautismo saiya. Mantang parani na sia, si Juan minalataw na itinokdo sia asin nagkagsing sa mga yaon duman: “Uya, an Kordero nin Dios na naghahale kan kasalan kan kinaban! Iyo ini idtong isinabi ko, Sa hudian ko madatong an sarong tawo na naenot sa sako, huli ta sia nabuhay nin enot sa sako.” Minsan ngani si Juan matua sa saiyang pinsan na si Jesus, aram ni Juan na si Jesus nabuhay na bago pa sa saiya bilang sarong espiritung persona sa langit.

Minsan siring, mga pirang semana bago kaini, kan si Jesus dumatong tanganing magpabautismo, si Juan minalataw na dai nakasisierto na si Jesus an magigin Mesiyas. “Minsan ako dai nakamidbid sa saiya,” an pag-ako ni Juan, “alagad an dahelan kun taano ako ta nagdatong na nagbabautismo sa tubig iyo na tanganing sia mahayag sa Israel.”

Si Juan nagpadagos sa pagpaliwanag sa mga nagdadangog saiya kun ano an nangyari kan bautismohan nia si Jesus: “Naheling ko an espiritu na naghihilig siring sa salampati hale sa langit, asin iyan uminontok saiya. Minsan ako dai nakamidbid sa saiya, alagad an mismong Saro na nagsugo sako na magbautismo sa tubig nagsabi sa sako, ‘An siisay man na maheling mong hiligan kan espiritu asin ontokan kaiyan, sia iyo an magbabautismo sa banal na espiritu.’ Asin iyan naheling ko, asin ako nagpatotoo na an sarong ini iyo an Aki nin Dios.”

Kan suminunod na aldaw nagtitindog si Juan kaiba kan duwa sa saiyang mga disipulo. Sa giraray, mantang parani na si Jesus, sia nagsabi: “Uya, an Kordero nin Dios!” Huli kaini, an duwang disipulong ini ni Juan na Bautisador nagsunod ki Jesus. An saro sainda si Andres, asin an saro malinaw na iyo an mismong persona na nagsurat kan mga bagay na ini, na nginaranan man na Juan. An Juan na ini, sono sa nagpaparisang mga bagay, saro man na pinsan ni Jesus, na minalataw na aki kan tugang ni Maria, si Salome.

Kan magsalingoy asin maheling si Andres asin Juan na nagsusunod sa saiya, si Jesus naghapot: “Ano an hinahanap nindo?”

“Rabi,” an hapot ninda, “saen ka nag-iistar?”

“Madia kamo, asin maheheling nindo,” an simbag ni Jesus.

Mga alas kuwatro na nin hapon, asin si Andres asin Juan uminiba ki Jesus sa natada pang mga oras kan aldaw na idto. Pakatapos kaiyan ogmahon na marhay si Andres kaya naghihidali sia sa paghanap sa saiyang tugang, na inaapod Pedro. “Nanompongan mi an Mesiyas,” an sabi nia saiya. Asin iiniba nia si Pedro ki Jesus. Puwedeng kadungan kaiyan naheling na man ni Juan an saiyang tugang na si Santiago asin dinara nia sia ki Jesus; alagad, siring sa pinagkatodan nia, dai iiniba ni Juan an personal na impormasyon na ini sa saiyang Ebanghelyo.

Kan sunod na aldaw, nanompongan ni Jesus si Felipe, na taga-Betsaida, an iyo man sanang siudad na pinaghalean ni Andres asin Pedro. Inagda nia sia: “Sumunod ka sako.”

Dangan nanompongan ni Felipe si Natanael, na inaapod man na Bartolome, asin nagsabi: “Nakua niamo an saro na isinurat ni Moises, sa Pagboot, asin kan Mga Propeta, si Jesus, an aki ni Jose, na taga-Nazaret.” Si Natanael nagduwaduwa. “May maluwas daw na ano man na marahay sa Nazaret?” an hapot nia.

“Madia asin helinga,” an sadol ni Felipe. Kan parani na sinda ki Jesus, si Jesus nagsabi dapit ki Natanael: “Uya, sarong tunay na Israelita, na sa saiya mayo nin kadayaan.”

“Paano nangyari na midbid mo ako?” an hapot ni Natanael.

“Bago ka inapod ni Felipe, mantang yaon ka sa sirong kan higuerra, natanaw taka,” an simbag ni Jesus.

Napangalas si Natanael. “Rabi [an boot sabihon Paratokdo], ika iyo an Aki nin Dios, ika Hade nin Israel,” an sabi nia.

“Huli ta sinabi ko saimo na natanaw taka sa sirong kan higuerra nagtutubod ka?” an hapot ni Jesus. “Makakaheling ka nin mga bagay na orog kisa mga ini.” Dangan nanuga sia: “Katotoohan nanggad na sinasabi ko saindo, Maheheling nindo an langit na nabubukasan asin an mga anghel nin Dios na minasakat asin minahilig sa Aki nin tawo.”

Dai nahaloy pakatapos tolos kaini, si Jesus, kaiba an saiyang bagong makuang mga disipulo, naghale sa Kababan nin Jordan asin nagbiyahe pasiring sa Galilea. Juan 1:29-51.

▪ Sairisay an enot na mga disipulo ni Jesus?

▪ Paano si Pedro, puwedeng pati man si Santiago, ipinamidbid ki Jesus?

▪ Ano an nakakombensir ki Natanael na si Jesus iyo an Aki nin Dios?