An Pinakadakulang Tawo na Nabuhay Kasuarin Pa Man

Kapitulo 15: An Enot na Milagro ni Jesus

MGA saro o duwang aldaw pa sana magpoon kan si Andres, Pedro, Juan, Felipe, Natanael, asin posibleng si Santiago magin enot na mga disipulo ni Jesus. Sinda ngonyan papuli na sa distrito nin Galilea, an pinaghalean ninda gabos. Dudumanan ninda an Cana, an banwaan na namundagan ki Natanael, na yaon sa kabubulodan na harani sa Nazaret, kun saen si Jesus mismo nagdakula. Naimbitaran sinda sa sarong punsion sa kasal sa Cana.

An ina ni Jesus nagduman man sa kasal. Bilang katood kan pamilya kan mga kinasal, si Maria minalataw na kalabot sa paglilingkod sa mga pangangaipo kan dakol na bisita. Kaya may nareparo tolos sia na kukulangon, na ipinaaram nia ki Jesus: “Mayo na sinda nin arak.”

Kan si Maria garo baga sa paaging ini nagsuherir na gibohan ni Jesus nin paagi an pagkulang nin arak, si Jesus sa primero habo. “Ano an labot ko sa saimo?” an hapot nia. Bilang linahidan na Hade nin Dios, dai sia kaipuhan na pagbotan kan saiyang pamilya o mga katood sa saiyang ginigibo. Kaya madonong na pinabayaan na sana ni Maria an bagay sa saiyang aki, na sinasabi na sana sa mga naglilingkod: “Kun ano an sabihon nia saindo, gibohon nindo.”

Bueno, igwa nin anom na darakulang tapayan na gapo, na an kada saro nalalaogan nin labing sampulong galon. Pinagbotan ni Jesus an mga naglilingkod: “Panoa nindo nin tubig an mga tapayan nin tubig.” Asin an mga serbidor pinano iyan sagkod sa bunganga. Dangan nagsabi si Jesus: “Tabo na kamo asin daraha iyan sa namamahala sa punsion.”

An namamahala naghanga sa marahay na kuwalidad kan arak, na dai nakaaaram na iyan milagrosong ginibo. Sa pag-apod sa nobyo, sia nagsabi: “An iba ilinuluwas nguna an marahay na arak, asin kun burat na an mga tawo, an hababang klase. Itinagama mo an marahay na arak sagkod ngonyan.”

Ini an enot na milagro ni Jesus, asin huli sa pakaheling ninda kaiyan, an pagtubod kan bago niang mga disipulo napakosog. Pakatapos kaiyan, kaiba an saiyang ina asin mga tugang sa ina, sinda nagbiyahe pasiring sa siudad nin Capernaum na harani sa Dagat nin Galilea. Juan 2:1-12.

▪ Kasuarin durante kan ministeryo ni Jesus nangyari an kasal sa Cana?

▪ Taano ta nagsayuma si Jesus sa suhestion kan saiyang ina?

▪ Anong milagro an ginibo ni Jesus, asin ano an epekto kaiyan sa iba?