An Pinakadakulang Tawo na Nabuhay Kasuarin Pa Man

Kapitulo 16: Kaigotan Para sa Pagsamba ki Jehova

AN MGA tugang sa ina ni Jesus​—an iba pang aki ni Maria—​si Santiago, Jose, Simon, asin Judas. Bago sinda gabos nagbiyahe kaiba ni Jesus asin kan saiyang mga disipulo pasiring sa Capernaum, sarong siudad na harani sa Dagat nin Galilea, puwedeng naghapit sinda sa saindang harong sa Nazaret tangani na an pamilya makapamatos kan mga kakaipuhanon ninda.

Alagad taano si Jesus ta maduman sa Capernaum imbes na ipadagos an saiyang ministeryo sa Cana, sa Nazaret, o sa iba pang lugar sa kabubulodan nin Galilea? Enot, an Capernaum mas midbid na lugar asin malinaw na mas dakulang siudad. Siring man, an kadaklan sa bagong makuang mga disipulo ni Jesus nag-iistar sa o harani sa Capernaum, kaya dai sinda kaipuhan na humale sa saindang harong tanganing umako nin pagsasanay sa saiya.

Durante kan pag-istar nia sa Capernaum, si Jesus naggibo nin mga ngangalasan, siring kan saiya mismong pinatunayan pakalihis nin mga pirang bulan. Alagad dai nahaloy si Jesus asin an saiyang kairiba nasa dalan na naman. Tigsoli ngonyan, asin paduman sinda sa Jerusalem tanganing atenderan an Paskua kan 30 C.E. Mantang yaon duman, an saiyang mga disipulo may naheling ki Jesus na puwedeng dai pa ninda naheling kaidto.

Sono sa Pagboot nin Dios, hinahagad sa mga Israelita na mag-atang nin mga hayop. Kaya, tanganing magin pasil para sa sainda, an mga parabariwas sa Jerusalem nagpapabakal nin mga hayop o gamgam para sa katuyohan na ini. Alagad sinda nagpapabakal sa laog mismo kan templo, asin dinadaya ninda an mga tawo paagi sa pagpapabayad nin sobra.

Sa grabeng kaanggotan, si Jesus guminibo nin panhampak na pisi asin pinalayas an mga paratinda. Iinula nia an mga sinsilyo kan mga pararibay nin pirak asin pinabaralintong an saindang mga lamesa. “Halea nindo digdi an mga bagay na ini!” an kurahaw nia sa mga nagpapabakal nin mga salampati. “Dai nindo paggibohon an harong kan sakong Ama na harong nin negosyo!”

Kan maheling ini kan mga disipulo ni Jesus, nagirumdoman ninda an hula manongod sa Aki nin Dios: “Hahalonon ako kan kaigotan para sa saimong harong.” Pero nagharapot an mga Judio: “Anong tanda an ikapaheheling mo samuya, ta ginigibo mo an mga bagay na ini?” Si Jesus nagsimbag: “Gabaon nindo an templong ini, asin sa tolong aldaw papatindogon ko iyan.”

An paghona kan mga Judio si Jesus nagtataram dapit sa literal na templo, asin sa siring sinda nagharapot: “An templong ini itinogdok sa laog nin apat na polo may anom na taon, asin papatindogon mo iyan sa laog nin tolong aldaw?” Alagad, si Jesus nagtataram manongod sa templo kan saiyang hawak. Asin pakalihis nin tolong taon, nagirumdoman kan saiyang mga disipulo an mga tataramon niang ini kan sia binuhay liwat hale sa mga gadan. Juan 2:​12-22; Mateo 13:55; Lucas 4:23.

▪ Pakatapos kan kasal sa Cana, saen na mga lugar nagbiyahe si Jesus?

▪ Taano ta grabe an pagkaanggot ni Jesus, asin ano an saiyang ginibo?

▪ Ano an nagirumdoman kan mga disipulo ni Jesus kan maheling an saiyang ginibo?

▪ Ano an sinabi ni Jesus manongod sa “templong ini,” asin ano an boot niang sabihon?

(Ipagpapadagos sa masunod na luwas.)