An Pinakadakulang Tawo na Nabuhay Kasuarin Pa Man

Kapitulo 17: Pagtokdo ki Nicodemo

MANTANG nag-aatender sia sa Paskua kan 30 C.E., si Jesus naggibo nin pambihirang mga tanda, o mga milagro. Bilang resulta, dakol na tawo an nagtubod saiya. Si Nicodemo, na sarong miembro kan Sanhedrin, an halangkaw na korte kan mga Judio, naghanga asin boot na makanood nin dakol pa. Kaya dinalaw nia si Jesus durante kan kadikloman nin banggi, na posibleng natatakot na mararaot an saiyang dangog sa iba pang Judiong mga namomoon kun sia maheling.

“Rabi,” an sabi nia, “aram niamo na ika bilang paratokdo naggikan sa Dios; huli ta mayo nin makagigibo kan mga tandang ini na saimong ginigibo puwera sana kun an Dios nasa saiya.” Sa pagsimbag, si Jesus nagsabi ki Nicodemo na tanganing makalaog sa Kahadean nin Dios, an sarong tawo kaipuhan na ‘mamundag giraray.’

Alagad, paano an sarong tawo mamumundag giraray? “Makalalaog daw sia sa tulak kan saiyang ina sa ikaduwang beses asin mamumundag?” an hapot ni Nicodemo.

Dai, bako iyan an boot sabihon kan pagkamundag giraray. “Kun an saro dai namundag sa tubig asin espiritu,” an paliwanag ni Jesus, “dai sia makalalaog sa kahadean nin Dios.” Kan si Jesus binautismohan asin an banal na espiritu naghilig sa saiya, sia sa siring namundag “sa tubig asin espiritu.” Paagi sa kaibang kapahayagan hale sa langit, ‘Ini an sakong Aki na sakong inooyonan,’ an Dios nagpaisi na sia nagpaluwas nin sarong espirituwal na aki na igwang paglaom na makakalaog sa langitnon na Kahadean. Sa huri, sa Pentecostes 33 C.E., an iba pang nabautismohan makakaako nin banal na espiritu asin sa siring sinda man mamumundag giraray bilang espirituwal na mga aki nin Dios.

Pero mahalaga an kabtang kan espesyal na tawong Aki nin Dios. “Kun paanong iiniitaas ni Moises an halas sa kaawagan,” an sabi ni Jesus ki Nicodemo, “an Aki nin tawo dapat na iitaas man, tanganing an gabos na minatubod sa saiya magkaigwa nin buhay na daing katapusan.” Iyo, kun paanong an mga Israelita na tinuka nin mararang mga halas kinaipuhan na humeling sa halas na tanso tanganing maligtas, an bilog na katawohan kaipuhan man na gumibo nin pagtubod sa Aki nin Dios tanganing maligtas sa saindang magagadanon na kamugtakan.

Idinodoon an mamomoton na kabtang digdi ni Jehova, sunod na sinabi ni Jesus ki Nicodemo: “An Dios namoot na gayo sa kinaban na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.” Kaya, digdi sa Jerusalem anom na bulan sana pakaponi kan saiyang ministeryo, lininaw ni Jesus na sia an gagamiton ni Jehova Dios sa pagligtas sa katawohan.

Si Jesus padagos na nagpaliwanag ki Nicodemo: “Huli ta an Dios nagsugo kan saiyang Aki sa kinaban, bakong tanganing sia maghokom sa kinaban,” an boot sabihon, bako na silotan iyan, o kondenaron iyan, na sinisentensiahan sa kalaglagan an rasa nin katawohan. Imbes, siring kan sabi ni Jesus, sia sinugo “tanganing ikaligtas an kinaban paagi sa saiya.”

Si Nicodemo takot na nagduman ki Jesus na nagtatago sa kadikloman. Kaya interesante na tinapos ni Jesus an saiyang pakipag-olay sa saiya sa pagsabing: “Ngonyan ini an basihan nin paghokom, na an liwanag [na irinepresentar ni Jesus sa saiyang buhay asin mga katokdoan] nagdatong sa kinaban alagad an mga tawo namoot sa kadikloman imbes na sa liwanag, huli ta an saindang mga gibo maraot. Huli ta an naggigibo nin marigsok na mga bagay naoongis sa liwanag asin dai minadolok sa liwanag, tanganing an saiyang mga gibo dai masagwe. Alagad an naggigibo nin totoo minadolok sa liwanag, tanganing an saiyang mga gibo mahayag na ginibong kaoyon sa Dios.” Juan 2:23–3:21; Mateo 3:​16, 17; Gibo 2:​1-4; Bilang 21:9.

▪ Ano an dahelan kan pagsongko ni Nicodemo, asin taano ta banggi sia nagdatong?

▪ Ano an boot sabihon kan ‘mamundag giraray’?

▪ Paano iinilustrar ni Jesus an saiyang kabtang sa satong kaligtasan?

▪ Ano an boot sabihon na si Jesus dai nagdatong tanganing hokoman an kinaban?