An Pinakadakulang Tawo na Nabuhay Kasuarin Pa Man

Kapitulo 18: Si Juan Nag-iina, Si Jesus Nagdadakol

PAKATAPOS kan Paskua kan tigsoli nin 30 C.E., si Jesus asin an saiyang mga disipulo naghale sa Jerusalem. Alagad, dai sinda nagbalik sa saindang mga harong sa Galilea kundi nagpasiring sa daga nin Judea, kun saen sinda naggibo nin pagbautismo. Si Juan na Bautisador iyo man an ginigibo sa laog na nin mga sarong taon ngonyan, asin igwa pa man giraray sia nin mga disipulo na nakikiibahan sa saiya.

Sa aktuwal, si Jesus mismo mayo nin ginibong pagbautismo, pero an saiyang mga disipulo ginibo iyan sa saiyang pagdirehir. An saindang bautismo pareho an kahulogan kan bautismo na ginibo ni Juan, mantang iyan simbolo nin pagsolsol nin sarong Judio sa mga kasalan tumang sa tipan nin Pagboot nin Dios. Alagad, pagkabuhay nia liwat, pinagbotan ni Jesus an saiyang mga disipulo na gumibo nin pagbautismo na igwang laen na kahulogan. An Kristianong bautismo ngonyan simbolo nin pagdusay nin sarong tawo na maglingkod ki Jehova Dios.

Minsan siring, sa enot na kabtang na ini kan ministeryo ni Jesus sindang duwa ni Juan, minsan ngani magkasiblag na naggigibo, nagtotokdo asin nagbabautismo sa mga nagsosorolsol. Alagad an mga disipulo ni Juan nag-imon asin nagreklamo saiya manongod ki Jesus: “Rabi, . . . uya, an sarong ini nagbabautismo asin an gabos nagduduruman saiya.”

Imbes na mag-imon, si Juan naogma sa kapangganahan ni Jesus asin boot man nia na mag-ogma an saiyang mga disipulo. Pinagirumdom nia sinda: “Kamo mismo nagpapatotoo sa sako na ako nagsabi, Bako ako an Cristo, kundi, ako isinugo sa enotan kan sarong iyan.” Dangan guminamit sia nin magayon na ilustrasyon: “An igwa kan nobya iyo an nobyo. Minsan siring, an katood kan nobyo, kun sia nagtitindog asin nakakadangog sa saiya, may dakulang kaogmahan huli sa tingog kan nobyo. Kaya ining sakong kaogmahan nalubos na.”

Si Juan, na iyo an katood kan Nobyo, nag-ogma mga anom na bulan na an nakaagi kan ipamidbid nia ki Jesus an saiyang mga disipulo. An nagkapira sainda nagkaigwa nin paglaom na magin miembro kan langitnon na grupong nobya ni Cristo na binibilog kan mga Kristiano na linahidan kan espiritu. Boot ni Juan na an saiyang presenteng mga disipulo sumunod man ki Jesus, mantang an saiyang katuyohan iyo na andamon an dalan para sa mapangganang ministeryo ni Cristo. Siring sa ipinaliwanag ni Juan na Bautisador: “An sarong iyan kaipuhan na magdakol, alagad ako kaipuhan na mag-ina.”

An bagong disipulo ni Jesus na si Juan, na kan enot saro man na disipulo ni Juan na Bautisador, nagsurat manongod sa ginikanan ni Jesus asin sa Saiyang mahalagang kabtang sa kaligtasan nin tawo, na nagsasabing: “An minadatong hale sa langit halangkaw sa gabos na iba pa. . . . An Ama namomoot sa Aki asin itinao an gabos na bagay sa saiyang kamot. An nagtutubod sa Aki igwa nin buhay na daing katapusan; an nakikisuway sa Aki dai makakaheling nin buhay, kundi magdadanay sa saiya an kaanggotan nin Dios.”

Dai nahaloy pakatapos na ipaliwanag ni Juan na Bautisador an pag-ina kan saiya mismong gibohon, inarestar sia ni Hadeng Herodes. Si Herodes kinua na magin saiya si Herodias, an agom ni Felipe na saiyang tugang, asin kan ibulgar ni Juan sa publiko an saiyang ginibo na bakong maninigo, ipinabilanggo sia ni Herodes. Kan mabaretaan ni Jesus an pag-aresto ki Juan, sia naghale sa Judea kaiba an saiyang mga disipulo pasiring sa Galilea. Juan 3:22–4:3; Gibo 19:4; Mateo 28:19; 2 Corinto 11:2; Marcos 1:14; 6:​17-20.

▪ Ano an kahulogan kan mga bautismo na ginibo sa pagdirehir ni Jesus bago kan saiyang pagkabuhay liwat? Asin pagkabuhay nia liwat?

▪ Paano ipinaheling ni Juan na an reklamo kan saiyang mga disipulo bakong makatanosan?

▪ Taano ta ibinilanggo si Juan?