An Pinakadakulang Tawo na Nabuhay Kasuarin Pa Man

Kapitulo 19: Pagtokdo sa Sarong Samaritana

SA SAINDANG pagbiyahe hale sa Judea pasiring sa Galilea, si Jesus asin an saiyang mga disipulo uminagi sa distrito kan Samaria. Pagal huli sa pagbaklay, kan pagkaodto sinda nagpondo tanganing magpahingalo sa may bobon na harani sa siudad nin Sicar. An bobon na ini kinalot ni Jacob mga siglo na an nakalihis, asin iyan yaon pa sagkod ngonyan, harani sa modernong siudad nin Nablus.

Mantang nagpapahingalo digdi si Jesus, an saiyang mga disipulo nagduruman sa siudad sa pagbakal nin makakakan. Kan may magdatong na sarong Samaritana tanganing sumakdo nin tubig, sia nakiolay: “Painoma man ako.”

An mga Judio asin Samaritano sa pankagabsan mayo nin pakilabot sa lambang saro huli sa nakatanom nang pagpapalaen. Kaya, sa pagngalas, an babae naghapot: “Taano ta ika, minsan Judio, naghahagad sa sako nin inomon, mantang ako Samaritana?”

“Kun naaraman mo kutana,” an simbag ni Jesus, “kun siisay an nagsasabi sa saimo, ‘Painoma man ako,’ naghagad ka kutana sa saiya, asin tinawan ka nia kutana nin tubig na buhay.”

“Ginoo,” an simbag nia, “mayo ka nin ano man na pansarok nin tubig, asin hararom an bobon. Kun siring, gikan saen na igwa ka kaining tubig na buhay? Ika bakong orog na dakula sa samong apoon na si Jacob, na nagtao samo kan bobon asin na sia mismo kaiba kan saiyang mga aki patin kan saiyang mga baka nag-inom dian, bako daw?”

“An gabos na minainom sa tubig na ini mapapaha giraray,” an sabi ni Jesus. “An siisay man na uminom sa tubig na itatao ko sa saiya dai na nanggayod mapapaha, kundi an tubig na itatao ko sa saiya magigin burabod nin tubig na nagbuburokbusok tanganing magtao nin buhay na daing katapusan.”

“Ginoo, tawe ako kan tubig na ini, tanganing dai na ako mapaha ni mapadigdi pa sa pagsakdo nin tubig,” an simbag kan babae.

Si Jesus ngonyan nagsabi saiya: “Lakaw, apoda an saimong agom asin pumadigdi kamo sa lugar na ini.”

“Mayo akong agom,” an simbag nia.

Lininaw ni Jesus an saiyang sinabi: “Marahay an pagkasabi mo, ‘Agom mayo ako.’ Huli ta ika nagkaigwa nin limang agom, asin an lalaki na nasa saimo ngonyan bako mong agom.”

“Ginoo, namamansayan ko na ika propeta,” an sabi kan babae na nagngangalas. Ihinahayag an saiyang espirituwal na interes, sia nagsabi na an mga Samaritano “nagsamba sa bukid [Gerizim, na nasa harani] na ini; alagad kamo man [an mga Judio] nagsasabi na sa Jerusalem maninigong sumamba an mga tawo.”

Minsan siring, an lugar nin pagsamba bakong iyo an mahalaga, an idinoon ni Jesus. “An oras madatong,” an sabi nia, “na an tunay na mga parasamba masamba sa Ama sa espiritu asin katotoohan, huli ta, sa katunayan, hinahanap kan Ama an mga siring na magsamba sa saiya. An Dios Espiritu, asin idtong nagsasamba saiya kaipuhan na magsamba saiya sa espiritu asin sa katotoohan.”

An babae naghangang gayo. “Aram ko na an Mesiyas madatong, na inaapod Cristo,” an sabi nia. “Kun sia magdatong na, ipapahayag nia sa sato an gabos na bagay.”

“Ako na nagtataram sa saimo iyo sia,” an pahayag ni Jesus. Isip-isipa nanggad iyan! An babaeng ini na nagsasakdo nin tubig kun odto, na tibaad tanganing malikayan an pakikipag-olay sa mga babaeng tagaduman na hinahamak sia huli sa saiyang pamumuhay, pinahelingan ni Jesus nin pabor sa makangangalas na paagi. Direktang sinabi nia sa babae an dai nia hayag na itinutuga sa siisay pa man. Ano an nagin bunga kaini?

Dakol na Samaritano an Nagtubod

Kan makabalik na hale sa Sicar na may darang pagkakan, an mga disipulo naheling si Jesus sa may bobon ni Jacob kun saen sia binayaan ninda, asin kun saen sia ngonyan nakikipag-olay sa sarong Samaritana. Pag-abot kan mga disipulo, an babae huminale, na iwinalat an saiyang tapayan nin tubig, asin nagpasiring sa siudad.

Interesadong marhay sa mga bagay na isinabi saiya ni Jesus, sinabi nia sa mga tawo sa siudad: “Madia kamo, helinga nindo an sarong tawo na nagsabi sako kan gabos na ginibo ko.” Dangan, sa paagi na nakapupukaw nin pag-usyoso, sia naghapot: “Iyo na daw ini an Cristo?” Huli sa hapot na iyan naotob an saiyang gusto​—an mga tawo nagduruman tanganing maheling ninda mismo.

Mientras tanto, an mga disipulo sinadol si Jesus na kakanon an pagkakan na dara ninda hale sa siudad. Pero sia nagsimbag: “Igwa akong kakanon na dai nindo naaaraman.”

“Mayo nin nagdara saiya nin kakanon, bako daw?” an pagharapotan kan mga disipulo. Si Jesus nagpaliwanag: “An sakong kakanon iyo an sakong paggibo kan kabotan nia na nagsugo sako asin pagtapos kan saiyang gibohon. Bako daw na nagsasabi kamo na apat na bulan pa bago magdatong an pag-ani?” Alagad, itinotokdo an espirituwal na pag-ani, si Jesus nagsabi: “Tingagan an saindong mga mata asin helinga an kaomahan, ta sinda mapuputi na para anihon. Nag-aako na nin balos an paraani asin nagtitipon kan mga bunga para sa buhay na daing katapusan, tanganing an parasabwag asin an paraani makapag-ogmang magkaibanan.”

Posibleng naheheling na ni Jesus an dakulang epekto kan saiyang pakipag-olay sa Samaritana​—na an dakol nagtutubod saiya huli sa patotoo kaini. An Samaritana nagpatotoo sa mga tagaduman, na nagsasabi: “Sinabi nia sako an gabos kong ginibo.” Sa siring, kan an mga taga-Sicar magduruman saiya sa may bobon, hinagad ninda saiya na dai nguna maghale asin makipag-olay pa sainda. Inako ni Jesus an imbitasyon asin nagdanay nin duwang aldaw.

Mantang an mga Samaritano naghihinanyog ki Jesus, dakol pa an nagturubod. Dangan sinda nagsabi sa babae: “Kami nagtutubod bako na sanang huli kan saimong tataramon; huli ta kami mismo nakadangog asin aram niamo na an tawong ini sa katotoohan iyo an paraligtas kan kinaban.” Sierto nanggad na an Samaritana nagtao nin magayon na halimbawa kun paano kita makakapatotoo dapit ki Cristo paagi sa pagpukaw nin pag-usyoso tangani na an mga naghihinanyog magsisiyasat pa nin orog!

Girumdomon na apat na bulan pa bago kan pag-ani​—malinaw na an pag-ani nin sebada, na sa Palestina nangyayari kun tigsoli. Kaya posibleng Nobyembre o Disyembre na ngonyan. Nangangahulogan ini na pakatapos kan Paskua kan 30 C.E., si Jesus asin an saiyang mga disipulo nagwalong bulan o labi pa sa Judea na nagtotokdo asin nagbabautismo. Pahale na sinda ngonyan pasiring sa saindang sadiring teritoryo sa Galilea. Ano daw an naghahalat sainda duman? Juan 4:​3-43.

▪ Taano ta napangalas an Samaritana na si Jesus nakikipag-olay sa saiya?

▪ Ano an itinokdo saiya ni Jesus manongod sa tubig na buhay asin kun saen magsasamba?

▪ Paano ihinayag ni Jesus sa Samaritana kun siisay sia, asin taano ta makangangalas an pagtuga na ini?

▪ Anong pagpapatotoo an ginibo kan Samaritana asin ano an ibinunga?

▪ Paano an kakanon ni Jesus konektado sa pag-ani?

▪ Paano niato madedeterminaran an lawig kan ministeryo ni Jesus sa Judea pakatapos kan Paskua kan 30 C.E.?