An Pinakadakulang Tawo na Nabuhay Kasuarin Pa Man

Kapitulo 20: An Ikaduwang Milagro Mantang Nasa Cana

PAGBALIK ni Jesus sa saiyang sadiring teritoryo pakatapos nin nahaloy na kampanya nin paghuhulit sa Judea, iyan bako na magpahingalo. Imbes, pinonan nia an orog pang dakulang ministeryo sa Galilea, an daga na saiyang dinakulaan. Pero an saiyang mga disipulo, imbes na magpermi sa saiya, nagbaralik sa saindang mga pamilya asin sa saindang dating mga hanapbuhay.

Anong mensahe an pinonan na ihulit ni Jesus? Ini: “An kahadean nin Dios harani na. Magsorolsol kamo, banwaan, asin magtubod kamo sa maogmang bareta.” Asin an reaksion? An mga taga-Galilea inako si Jesus. Iginalang sia kan gabos. Minsan siring, iyan partikularmente bakong huli sa saiyang mensahe kundi, imbes, huling an dakol sa sainda yaon duman sa Paskua sa Jerusalem kan nakaaging mga bulan asin naheling an pambihirang mga tanda na saiyang ginibo.

Malinaw na pinonan ni Jesus sa Cana an saiyang dakulang ministeryo sa Galilea. Bago kaini, puwedeng natatandaan pa nindo, kan pagbalik hale sa Judea, ginibo niang arak an tubig sa sarong punsion sa kasal duman. Sa ikaduwang okasyon na ini, an aki nin sarong opisyal sa gobyerno ni Hadeng Herodes Antipas grabe an helang. Nabaretaan na si Jesus nagdatong sa Cana haleng Judea, an opisyal nagduman hale sa saiyang harong sa Capernaum tanganing hanapon si Jesus. Nagmomondo, an lalaki nakiolay: ‘Madia na tabi tolos, bago magadan an sakong aki.’

Si Jesus nagsimbag: ‘Magpuli ka na. Naomayan na an saimong aki!’ An opisyal ni Herodes nagtubod asin nagpoon sa halawig na pagbiyahe papuli. Sa dalan sinabat sia kan saiyang mga surogoon, na naghihidale na sabihan sia na mayo nang problema​—naomayan na an saiyang aki! ‘Kasuarin sia nagrahay?’ an hapot nia.

‘Kasuodma kan ala 1:00 n.h.,’ an simbag ninda.

Narealisar kan opisyal na idto mismo an oras na si Jesus nagsabing, ‘Naomayan na an saimong aki!’ Pakatapos kaiyan, an lalaki asin an saiyang bilog na pamilya nagin mga disipulo ni Cristo.

Kaya an Cana pinahelingan nin pabor bilang lugar na kun saen, nagpapaisi kan saiyang pagbalik hale sa Judea, si Jesus duwang beses na naggibo nin mga milagro. Siyempre, bako sana ini an mga milagro na saiyang ginibo sagkod kan panahon na ini, pero iyan mahalaga huling nagtanda iyan kan saiyang pagbalik sa Galilea.

Si Jesus ngonyan papuli na sa Nazaret. Ano daw an naghahalat saiya duman? Juan 4:​43-54; Marcos 1:​14, 15; Lucas 4:​14, 15.

▪ Pagbalik ni Jesus sa Galilea, ano an nangyari sa saiyang mga disipulo, asin paano sia inako kan mga tawo?

▪ Anong mga milagro an ginibo ni Jesus, asin paano iyan nakaapektar sa mga kalabot?

▪ Kaya paano pinahelingan ni Jesus nin pabor an Cana?