An Pinakadakulang Tawo na Nabuhay Kasuarin Pa Man

Kapitulo 21: Sa Sinagoga sa Banwaan ni Jesus

MAYONG duwa-duwa na nagkaigwa nin pagkariribok sa Nazaret kan magpuli si Jesus. Bago sia naghale tanganing magpabautismo ki Juan labing sangtaon na an nakaagi, si Jesus midbid na sarong panday. Pero ngonyan sia nabantog nang paramilagro. An mga tagaduman galaga na maheling sia na naggigibo nin nagkapira sa mga milagrong ini sa tahaw ninda.

An saindang paghalat nag-orog kan si Jesus, sono sa saiyang nakaugalean, nagduman sa lokal na sinagoga. Durante kan mga seremonya, tuminindog sia sa pagbasa, asin an balumbon kan propetang si Isaias itinao saiya. Saiyang hinanap an kabtang na dian iyan nagsasabi kan manongod sa Saro na linahidan kan espiritu ni Jehova, na an kabtang na iyan sa satong Biblia ngonyan kapitulo 61.

Pakabasa manongod sa kun paano an Saro na ini maghuhulit nin pagbutas sa mga bihag, pagpamuklat sa mga buta, asin manongod sa aakoon na taon ni Jehova, iinuli ni Jesus an balumbon sa paraingat asin nagtukaw. An gabos na mata maingat na nakatorohok sa saiya. Dangan sia nagpahayag, na posibleng medyo halawig, na nagpapaliwanag: “Ngonyan an kasuratan na ini na saindo pa sanang nadadangog naotob na.”

An mga tawo naghanga sa saiyang “managom na mga tataramon” asin nagsarabi sa lambang saro: “Aki ini ni Jose, bako daw?” Alagad nakakaaram na gusto nindang gumibo sia nin mga milagro, si Jesus nagpadagos: “Mayong duwa-duwa na gagamiton nindo sako an ilustrasyon na ini, ‘Parabolong, bolonga an saimong sadiri; an mga bagay na samong nadangog na nangyari sa Capernaum giboha man digdi sa saimong sadiring lugar.’” Malinaw nanggad, an dating kataraed ni Jesus naghohona na an pagpaomay maninigong magpoon sa harong, para nguna sa kapakinabangan kan saiyang mga kahimanwa. Kaya an pagmate ninda hinamak sinda ni Jesus.

Narerealisar an saindang iniisip, si Jesus nagsaysay nin nakatatabang na kasaysayan. Dakol an balo sa Israel durante kan kaaldawan ni Elias, an sabi nia, pero si Elias dai isinugo sa sainda. Imbes, sia nagduman sa sarong balo na bakong Israelita sa Sidon, na duman sia naggibo nin nagliligtas-buhay na milagro. Asin kan kaaldawan ni Eliseo, dakol an leproso, pero si Naaman na taga-Siria sana an lininigan ni Eliseo.

Ikinaanggot an bakong paborableng mga pagkokomparar na ini nin kasaysayan na nagbuyagyag kan saindang kapasloan asin kadaihan nin pagtubod, an mga nasa sinagoga nagburuhat asin dali-daling ilinuwas si Jesus sa siudad. Duman, sa may gilid kan bukid na namumugtakan kan Nazaret, hiningoa nindang iholog sia sa gilid. Pero si Jesus nakadulag asin ligtas na huminale. Lucas 4:​16-30; 1 Hade 17:​8-16; 2 Hade 5:​8-14.

▪ Taano ta nagkaigwa nin pagkariribok sa Nazaret?

▪ Ano an saboot kan mga tawo dapit sa pahayag ni Jesus, pero ano an ikinaanggot nindang marhay?

▪ Ano an hiningoa kan mga tawo na gibohon ki Jesus?