An Pinakadakulang Tawo na Nabuhay Kasuarin Pa Man

Kapitulo 23: Dakol Pang Milagro sa Capernaum

KAN Sabbath pakatapos na apodon ni Jesus an saiyang enot na apat na disipulo​—si Pedro, Andres, Santiago, asin Juan—​sinda gabos nagduruman sa sarong lokal na sinagoga sa Capernaum. Duman si Jesus nagpoon na magtokdo, asin an mga tawo nagngaralas huli ta sia nagtotokdo sainda bilang saro na igwang autoridad asin bakong siring kan mga eskriba.

Kan Sabbath na ini sarong lalaking sinaniban nin demonyo an yaon duman. Taod-taod, sia nagkurahaw sa makosog na tingog: “Anong labot mi saimo, Jesus ika na taga-Nazaret? Napadigdi ka daw sa paglaglag samo? Midbid ko talaga kun siisay ka, an Banal na Saro nin Dios.”

An demonyo na nagpopogol sa lalaking idto sa aktuwal saro sa mga anghel ni Satanas. Sa pagtuyaw sa demonyo, si Jesus nagsabi: “Dai ka maggirong, asin lumuwas ka sa saiya!”

Bueno, pinatoog kan demonyo an lalaki asin kuminurahaw nin makosogon. Pero iyan luminuwas sa lalaki na dai sia kinologan. An gabos talagang napangalas! “Ano ini?” an hapot ninda. “May autoridad niang pinagbobotan pati an marompot na mga espiritu, asin sinda nagsusunod sa saiya.” An bareta manongod kaini nakaabot sagkod sa nakapalibot na lugar.

Paghale sa sinagoga, si Jesus asin an saiyang mga disipulo nagduruman sa harong ni Simon, o Pedro. Duman an panugangan na babae ni Pedro grabe an kalintura. ‘Tabi tabangi man sia,’ an pakimaherak ninda. Kaya nagdolok si Jesus, kinapotan sia sa kamot, asin binangon sia. Tolos-tolos na sia naomayan asin nagpoon na mag-andam nin pagkakan ninda!

Kan huri, kan pagsolnop kan aldaw, an mga tawo hale sa gabos na lugar nagpoon na magdaratong sa harong ni Pedro na dara an saindang mga may helang. Dai nahaloy an gabos sa siudad tiripon na sa may pinto! Asin si Jesus pinaomayan an gabos nindang may helang, ano man an saindang mga kamatean. Nagpaluwas man sia nin mga demonyo. Mantang sinda nagruruluwas, an mga demonyo na saiyang pinaluwas nagkururahaw: “Ika iyo an Aki nin Dios.” Pero tinuyaw sinda ni Jesus asin dai sinda tinogotan na magtaram huli ta aram ninda na sia an Cristo. Marcos 1:​21-34; Lucas 4:​31-41; Mateo 8:​14-17.

▪ Ano an nangyari sa sinagoga kan Sabbath pakatapos na apodon ni Jesus an saiyang apat na disipulo?

▪ Nagsaen si Jesus paghale sa sinagoga, asin anong milagro an saiyang ginibo duman?

▪ Ano an nangyari sa huri kan banggi man sanang idto?