An Pinakadakulang Tawo na Nabuhay Kasuarin Pa Man
Kapitulo 24: Kun Taano si Jesus ta Nagdigdi sa Daga
AN ALDAW ni Jesus sa Capernaum kaiba an saiyang apat na disipulo nagin sibot-sibot, na natapos kan an mga taga-Capernaum dinara sa saiya an gabos nindang may helang tanganing maomayan durante kan banggi. Mayo nin panahon na makapagsolosolo.
Amay ngonyan kan suminunod na aga. Mantang madiklom pa, si Jesus nagbangon na asin nagluwas na sia sana. Nagduman sia sa sarong puwerang lugar na duman sia pribadong makakapamibi sa saiyang Ama. Pero dai nahaloy an pagsolosolo ni Jesus huli ta kan maaraman ni Pedro asin kan iba pa na mayo sia, sinda nagluwas sa paghanap sa saiya.
Kan manompongan ninda si Jesus, si Pedro nagsabi: “An gabos naghaharanap saimo.” An mga taga-Capernaum boot na pumermi sa sainda si Jesus. Tunay nanggad na pinahahalagahan ninda an saiyang ginibo sa sainda! Alagad si Jesus daw nagdigdi sa daga sa pangenot tanganing gibohon an siring na milagrosong mga pagpaomay? Ano an sabi nia manongod kaini?
Sono sa sarong tala sa Biblia, sinimbag ni Jesus an saiyang mga disipulo: “Magduman pa kita sa ibang lugar, sa mga baryo sa harani, tanganing makapaghulit man ako duman, huli ta sa katuyohan na ini na ako napadigdi.” Minsan ngani an mga tawo nakiolay na pumermi si Jesus, sinabihan nia sinda: “Kaipuhan na ipahayag ko sa iba pang mga siudad an maogmang bareta kan kahadean nin Dios, huli ta dahelan kaini na ako isinugo.”
Iyo, si Jesus nagdigdi sa daga partikularmente tanganing maghulit manongod sa Kahadean nin Dios, na mabindikar sa ngaran kan saiyang Ama asin permanenteng maresolber sa gabos na kamatean nin tawo. Minsan siring, tanganing tumao nin ebidensia na sia sinugo nin Dios, si Jesus naggibo nin milagrosong mga pagpaomay. Sa iyo man sanang paagi na si Moises, mga siglo na an nakalihis, naggibo nin mga milagro tanganing pakosogon an saiyang mga patotoo bilang lingkod nin Dios.
Ngonyan, kan maghale si Jesus sa Capernaum tanganing maghulit sa iba pang mga siudad, an saiyang apat na disipulo uminiba sa saiya. An apat na ini si Pedro asin an tugang kaining si Andres, saka si Juan asin an tugang kaining si Santiago. Magigirumdoman nindo na sarong semana pa sana an nakaagi, sinda inagda na magin enot na nagbibiyaheng katabang ni Jesus.
An biyahe sa paghuhulit ni Jesus sa Galilea kaiba an saiyang apat na disipulo makangangalas an kapangganahan! Sa katunayan, an bareta manongod kan saiyang mga aktibidad nakaabot pati sa bilog na Siria. An darakulang kadaklan hale sa Galilea, Judea, asin sa ibong kan Salog nin Jordan nagsurunod ki Jesus asin sa saiyang mga disipulo. Marcos 1:35-39; Lucas 4:42, 43; Mateo 4:23-25; Exodo 4:1-9, 30, 31.
▪ Ano an nangyari kan aga pakatapos kan sibot-sibot na aldaw ni Jesus sa Capernaum?
▪ Taano si Jesus ta sinugo digdi sa daga, asin ano an katuyohan kan saiyang mga milagro?
▪ Sairisay an uminiba ki Jesus sa saiyang biyahe sa paghuhulit sa Galilea, asin ano an reaksion sa mga aktibidad ni Jesus?