Mga Saksi ni Jehova sa Bilog na Kinaban—Colombia
AN Colombia napapalaen na nasyon sa Amerika del Sur. Kapwa an dagat na Atlantiko asin Pasipiko nakalalantop sa baybayon kan pano-pano nin bulkan na nasyon na ini. An init kan hababang tropikong mga gilid nin dagat asin kapatagan nagreresulta sa lipot kan haralangkaw, natatakopan nin niyebeng mga alitoktok kan Kabukidan nin Andes.a
Dawa ngani an Colombia bantog sa bulawan asin mga esmeralda, an mga tawo an pinakamahalagang kayamanan kaiyan. Ngonyan, pinapano ni Jehova nin kamurawayan an saiyang espirituwal na harong. An magayon, kawiliwiling mga parasamba nagraralaog dian sa gabos na parte kan daga, kabale na an Colombia.—Haggeo 2:7.
Naghanga an mga Namamahala sa Negosyo
An Domingo, Nobyembre 1, 1992, nagtanda kan pagdedikar kan bagong sangang opisina asin pasilidad sa pag-imprenta kan Watch Tower Society sa Facatativá, 42 kilometros sa norteng solnopan nin Bogotá. An mga pagpasyar sa sanga nagkaigwa nin dakulang epekto sa mga bisita. Pakabalik sa pabrika kun saen sia nagtatrabaho, an sarong bisita maogmahon na dinagka an saiyang mga manedyer na dumuman asin obserbaran an organisasyon na ‘sarong ngangalasan sa kakayahan, areglo, asin mental saka emosyonal na kamugtakan kan mga empleyado.’ Durante kan suminunod nindang pagpasyar, an mga namamahala nagpaheling nin makosog na interes asin kadakol an ihinapot.
An mga namamahalang ini boot na padumanon an saindang mga superintendente, superbisor, asin kapatas—an totoo, an gabos nindang trabahador—tanganing magpasyar. Kada semana nag-iiskedyul sinda nin poon 15 sagkod 25 empleyado tanganing magpasyar sagkod na an gabos na trabahador na 1,300 makaobserbar kan siring na organisasyonal na kakayahan.
Ginatos sa saindang trabahador an nakapagpasyar na sa mga pasilidad kan sanga asin nakadalan kan video na Jehovah’s Witnesses—The Organization Behind the Name. Naghanga sa kadakulaan kan organisasyon asin sa pambilog na kinaban na sakop kan gibong paghuhulit kan Kahadean, nagngalas sinda sa halangkaw an gradong teknolohiya na ginagamit sa mga pagpunsionar kan Sosyedad. Pagharale, dakol an nadangog na nagsabing namamatean ninda na garo baga sinda ‘minahale sa Paraiso pabalik sa sarong bakong organisadong kinaban.’
An Katotoohan Naaabot an Gabos na Klase
An gabos na klase nin tawo napapaabotan kan maogmang bareta. (1 Timoteo 2:3, 4) Halimbawa, an sarong dating kompositor asin namomoon nin sarong banda na heavy-metal rock inako an katotoohan sa Biblia, naggibo nin mga pagbakle sa saiyang buhay, asin dai nahaloy nagin regular payunir. Kan huri ninombrahan sia bilang ministeryal na lingkod. Nagkapirang indibiduwal na dating miembro kan subersibong mga grupo an nakanood na ibugtak an saindang pagsarig asin paglaom sa Kahadean ni Jehova. Ngonyan aktibo na sindang kalabot sa paghuhulit kan mensahe manongod sa sarong matoninong na bagong kinaban.
An mga adikto sa asin ahente nin droga buminirik na man sa katotoohan. An sarong soltero na ngonyan Saksi na namahala sa sarong patanoman nin droga asin sarong laboratoryo nin cocaina sa kadlagan sa laog nin limang taon bago sia huminale sa siring na klase nin buhay. Nanompongan nia an kaogmahan sa pakanood asin paggibo kan mga prinsipyo sa Biblia. Sa sarong bilanggoan an mga nasentensiahan sa kasalan na paggadan na napahiro kan sinserong pag-adal sa Biblia odok sa boot na namimibi na patawadon ni Jehova an saindang mga kasalan asin akoon sinda bilang saiyang mga lingkod.
Kaya an gabos na klase nin tawo naghihimate sa mensahe kan Kahadean. Sa Colombia, siring sa ibang lugar, kun siring pinapano ni Jehova nin kamurawayan an saiyang harong.
[Nota sa Ibaba]
a Para sa dugang na impormasyon, helingon an 1994 Calendar of Jehovah’s Witnesses.
[Kahon sa pahina 8]
SUMARYO KAN NASYON
1993 na Taon nin Paglilingkod
PINAKAHALANGKAW NA BILANG NIN NAGPAPATOTOO: 60,854
KATIMBANG: 1 Saksi sa 558
NAG-ATENDER SA MEMORIAL: 249,271
PROMEDYONG MGA PARAHAYAG NA PAYUNIR: 8,487
PROMEDYONG MGA PAG-ADAL SA BIBLIA: 100,927
BILANG NIN NABAUTISMOHAN: 5,183
BILANG NIN MGA KONGREGASYON: 751
SANGANG OPISINA: FACATATIVÁ
[Ritrato sa pahina 9]
An mga tawohan sa sangang opisina asin mga misyonero kan 1956
[Ritrato sa pahina 9]
Retrato kan sangang opisina na kinua hale sa eroplano