An Pinakadakulang Tawo na Nabuhay Kasuarin Pa Man
Kapitulo 29: Paggibo nin Marahay na mga Gibo Kun Sabbath
TIGSOLI ngonyan nin 31 C.E. Pirang bulan na an nakaagi magpoon kan si Jesus nakipag-olay sa sarong babae sa may bobon sa Samaria mantang minaagi hale sa Judea pasiring sa Galilea.
Ngonyan, pakatapos nin mahiwas na pagtotokdo sa bilog na Galilea, si Jesus sa giraray naghale pasiring sa Judea, kun saen sia nagtokdo sa mga sinagoga. Kun ikokomparar sa itinataong atension kan Biblia sa saiyang ministeryo sa Galilea, diit an sinasabi kaiyan dapit sa aktibidad ni Jesus sa Judea durante kan pagsongkong ini asin durante kan mga bulan na ginamit nia digdi kasunod kan nakaaging Paskua. Malinaw na an saiyang ministeryo sa Judea dai nagkaigwa nin siring kapaborableng reaksion kisa kan sa Galilea.
Dai nahaloy si Jesus paduman na sa pangenot na siudad kan Judea, an Jerusalem, para sa Paskua nin 31 C.E. Digdi, harani sa Tata nin mga Karnero, yaon an tangke na inaapod Betzata, na dinudumanan nin dakol na may helang, buta, asin pilay. Naniniwala sinda na an mga tawo puwedeng maomayan paagi sa paglugbo sa tubig kan tangke kun iyan nahihiro.
Sabbath ngonyan, asin si Jesus may naheling na sarong lalaki sa may tangke na 38 taon nang naghehelang. Naririsa an haloyon nang helang kan lalaki, si Jesus naghapot: “Boot kang maomayan?”
Sia nagsimbag ki Jesus: “Ginoo, mayo ako nin tawo na malugbo sako sa tangke kun an tubig nahihiro; alagad mantang ako papaduman may iba na naeenot sako na bumaba.”
Si Jesus nagsabi saiya: “Buhat, kuana an saimong hamak asin lakaw.” Huli kaiyan an lalaki tolos na naomayan, inalsa an saiyang hamak, asin nagpoon na lumakaw!
Alagad kan an lalaki maheling kan mga Judio, sinda nagsarabi: “Sabbath ngonyan, asin bakong sono sa katogonan para sa saimo na darahon an hamak.”
An lalaki nagsimbag: “An saro na nagpaomay sako nagsabi sa sako, ‘Kuana an saimong hamak asin lakaw.’”
“Siisay an tawong nagsabi saimong, ‘Kuana iyan asin lakaw’?” an hapot ninda. Si Jesus naghale na huli kan kadaklan, asin an pinaomayan dai aram an ngaran ni Jesus. Pero, kan huri, si Jesus asin an lalaki nagkatagboan sa templo, asin naaraman kan lalaki kun siisay an nagpaomay sa saiya.
Kaya hinanap kan naomayan na lalaki an mga Judio tanganing isabi sainda na si Jesus an nagpaomay sa saiya. Kan maaraman ini, an mga Judio nagduruman ki Jesus. Sa anong dahelan? Tangani daw na maaraman kun sa anong paagi na nagigibo nia an mga ngangalasan na ini? Bako. Kundi tanganing hanapan sia nin sala huli ta ginigibo nia an marahay na mga bagay na ini kun Sabbath. Asin pinonan pa ngani nindang paglamagon sia! Lucas 4:44; Juan 5:1-16.
▪ Mga gurano na kahaloy magpoon kan ultimong songkoon ni Jesus an Judea?
▪ Taano ta bantog na marhay an tangke na inaapod Betzata?
▪ Anong milagro an ginibo ni Jesus sa may tangke, asin ano an reaksion kan mga Judio?