An Pinakadakulang Tawo na Nabuhay Kasuarin Pa Man

Kapitulo 30: Pagsimbag sa mga Nagsasahot sa Saiya

KAN an relihiyosong mga namomoon na Judio pinagsahotan si Jesus nin pagbalga sa Sabbath, sia nagsimbag: “An sakong Ama sagkod ngonyan padagos na naggigibo, asin ako padagos na naggigibo.”

Apesar kan paghingako kan mga Fariseo, an gibo ni Jesus bakong an klase na ipinangangalad kan pagboot sa Sabbath. An saiyang gibong paghuhulit asin pagpaomay sarong asignasyon gikan sa Dios, asin bilang pag-arog sa halimbawa nin Dios, padagos niang ginigibo iyan aroaldaw. Alagad, an saiyang simbag orog pa nganing ikinaanggot kan mga Judio kisa kan dati, asin hiningoa nindang gadanon sia. Taano?

Iyan huli ta ngonyan sinda bako sanang nagtutubod na binabalga ni Jesus an Sabbath kundi ibinibilang man nindang paglanghad an paghingako nia bilang personal na Aki nin Dios. Alagad, si Jesus dai natakot asin sinimbag pa sinda manongod sa saiyang inooyonan na relasyon sa Dios. “An Ama namomoot sa Aki,” an sabi nia, “asin ipinaheheling sa saiya an gabos na saiyang ginigibo.”

“Kun paanong an Ama minabangon kan mga gadan,” an pagpadagos ni Jesus, “binubuhay man kan Aki an mga boot niang buhayon.” Iyo nanggad, an Aki nagbabangon na nin mga gadan sa espirituwal na paagi! “An nagdadangog sa sakong tataramon asin nagtutubod sa saiya na nagsugo sa sako,” an sabi ni Jesus, “nakabalyo na hale sa kagadanan pasiring sa buhay.” Iyo, ipinadagos pa nia: “An oras madatong, asin iyan ngonyan na, na an mga gadan makakadangog sa tingog kan Aki nin Dios asin an mga naghinanyog magkakaburuhay.”

Minsan ngani mayo nin rekord na si Jesus literal nang nagbangon nin siisay man hale sa mga gadan, sinabihan nia an mga nagsasahot saiya na an siring na literal na pagbuhay liwat sa mga gadan mangyayari. “Dai kamo magngalas kaini,” an sabi nia, “huli ta an oras maabot na an gabos na nasa mga lolobngan nin girumdoman makadadangog kan saiyang tingog asin maruluwas.”

Sagkod sa panahon na ini, si Jesus malinaw na dai pa noarin man hayag na ilinadawan an saiyang mahalagang kabtang sa katuyohan nin Dios sa siring kapambihira asin kadepinidong paagi. Pero an mga nagsasahot ki Jesus igwa nin labi pa kisa saiya mismong patotoo manongod sa mga bagay na ini. “Nagsugo kamo nin mga tawo ki Juan,” an pagirumdom sainda ni Jesus, “asin sia nagpatotoo sa katotoohan.”

Duwang taon pa sana an nakaagi, si Juan na Bautisador sinabihan an relihiyosong mga namomoon na Judiong ini manongod kan Saro na madatong kasunod nia. Pinagigirumdom sinda dapit kan dati nindang paggalang sa nabibilanggo ngonyan na si Juan, si Jesus nagsabi: “Kamo sa halipot na panahon nagmamawot na mag-ogmang marhay sa saiyang liwanag.” Ipinagigirumdom ini sa sainda ni Jesus sa paglaom na matabangan, iyo, ikaligtas, sinda. Pero dai sia nagdepende sa patotoo ni Juan.

“An mga gibo mismo na sakong ginigibo [kabale an milagro na ginibo pa sana nia] nagpapatotoo dapit sako na isinugo ako kan Ama.” Pero apuwera kaiyan, si Jesus nagpadagos: “An Ama na nagsugo sako nagpapatotoo mismo dapit sako.” An Dios nagpatotoo manongod ki Jesus, halimbawa, sa pagbautismo sa saiya, na nagsasabing: “Ini an sakong Aki, an namomotan.”

Tunay nanggad, an mga nagsasahot ki Jesus mayong sarahotan sa pagsikwal sa saiya. An mismong Kasuratan na hinihingako nindang sinisiyasat nagpapatotoo manongod sa saiya! “Kun nagtubod kamo ki Moises matubod kamo sa sako,” an konklusyon ni Jesus, “huli ta an sarong iyan nagsurat dapit sa sako. Alagad kun dai kamo nagtutubod sa mga surat kan sarong iyan, paano kamo matubod sa sakong mga tataramon?” Juan 5:​17-47; 1:​19-27; Mateo 3:17.

▪ Taano an gibo ni Jesus ta bakong pagbalga sa Sabbath?

▪ Paano ilinadawan ni Jesus an saiyang mahalagang kabtang sa katuyohan nin Dios?

▪ Tanganing patunayan na sia Aki nin Dios, kiisay na patotoo an idinoon ni Jesus?