An Pinakadakulang Tawo na Nabuhay Kasuarin Pa Man

Kapitulo 31: Pagpukit nin Trigo Kun Sabbath

Dai nahaloy si Jesus asin an saiyang mga disipulo naghale sa Jerusalem tanganing bumalik sa Galilea. Panahon na nin tigsoli, asin sa kaomahan may mga tipasi sa mga ohoy. Gutom na an mga disipulo. Kaya nagpurukit sinda nin mga tipasi asin nagkarakan. Pero huling Sabbath kaidto, naheling an saindang ginibo.

An relihiyosong mga namomoon sa Jerusalem hiningoa pa sanang gadanon si Jesus huli sa alegasyon na mga pagbalga sa Sabbath. Ngonyan nag-aakusar an mga Fariseo. “Uya! An saimong mga disipulo naggigibo nin bakong sono sa katogonan na gibohon kun aldaw nin sabbath,” an sahot ninda.

An mga Fariseo naghihingako na pag-ani asin pagginik an pagpukit nin trigo patin pagpiripisi kaiyan sa kamot tanganing kakanon. Pero an saindang estriktong pag-interpretar sa kun ano man nanggad an trabaho nagpagin magabat sa Sabbath, mantang katuyohan kaiyan na magin panahon na magayagaya, nakapakokosog sa espirituwal. Kaya si Jesus nagsimbag paagi sa Makakasuratan na halimbawa tanganing ipaheling na nungkang katuyohan ni Jehova Dios an siring kaestriktong pagpaotob sa Saiyang pagboot dapit sa Sabbath.

Si Jesus nagsabi na kan si David asin an saiyang mga tawohan nagutom, sinda uminontok sa tabernakulo asin kinakan an mga dolot na tinapay. An mga tinapay na idto hinale na sa atubangan ni Jehova asin sinalidahan nin mga bago, asin sa parate irinireserba an mga iyan tanganing kakanon kan mga saserdote. Alagad, sa siring na mga kamugtakan, si David asin an saiyang mga tawohan dai kinondenar sa pagkakan kaiyan.

Sa pagtao nin saro pang halimbawa, si Jesus nagsabi: “Dai daw nindo nabasa sa Katogonan na sa mga sabbath an mga saserdote sa templo ibinibilang an sabbath na bakong banal asin nagpapadagos na daing sala?” Iyo, dawa kun Sabbath an mga saserdote naggigibo nin pagbuno asin iba pang trabaho sa templo sa pag-andam nin mga hayop na iaatang! “Alagad sinasabi ko saindo,” an sabi ni Jesus, “na uya digdi an sarong bagay na orog pa sa templo.”

Hinahatolan an mga Fariseo, si Jesus nagpadagos: “Kun nasabotan nindo an kahulogan kaini, ‘Minamawot ko an pagkaherak, asin bakong an atang,’ dai kutana nindo kinondenar an mga daing sala.” Dangan sia nagkonklusyon: “Huli ta Kagurangnan kan Sabbath an Aki nin tawo.” Ano an boot sabihon kaiyan ni Jesus? Sinasambit ni Jesus an sangribong taon na matoninong na pamamahala kan saiyang Kahadean.

Sa laog nin 6,000 na taon na ngonyan, an katawohan nagtitios nin mapagalon na pagkaoripon sa irarom ni Satanas na Diablo, na an kadahasan asin guerra an nangyayari aroaldaw. Sa ibong na kampi, an dakulang pamamahala ni Cristo sa Sabbath magigin panahon nin kapahingaloan sa gabos na pagtios asin kaapihan na iyan. Mateo 12:​1-8; Levitico 24:​5-9; 1 Samuel 21:​1-6; Bilang 28:9; Oseas 6:6.

▪ Anong sahot an ginibo tumang sa mga disipulo ni Jesus, asin paano iyan sinimbag ni Jesus?

▪ Anong pagkasala kan mga Fariseo an ipinamidbid ni Jesus?

▪ Sa anong paagi na si Jesus an “Kagurangnan kan Sabbath”?