An Pinakadakulang Tawo na Nabuhay Kasuarin Pa Man

Kapitulo 32: Ano an Sono sa Katogonan Kun Sabbath?

SA SARO pang Sabbath kaidto na si Jesus nagsongko sa sarong sinagoga na harani sa Dagat nin Galilea. Yaon duman an sarong lalaki na alang an toong kamot. An mga eskriba asin Fariseo nagmamasid na gayo tanganing helingon kun baga paoomayan sia ni Jesus. Sa katapustapusi sinda naghapot: “Sono daw sa katogonan na magbolong sa aldaw nin sabbath?”

An relihiyosong mga namomoon na Judio nagtutubod na sono sa katogonan an pagpaomay kun Sabbath kun may namemeligro sanang buhay. Sinda nagtotokdo, halimbawa, na kun Sabbath bakong sono sa katogonan na maghilot o magbenda nin lapo. Kaya an mga eskriba asin Fariseo hinahapot si Jesus sa paghihingoa na makakua nin ikasasahot tumang sa saiya.

Minsan siring, aram ni Jesus an saindang mga pangangatanosan. Kadungan kaiyan, nasasabotan nia na sinda igwa nin sobra, bakong Makakasuratan na pagsabot sa kun ano an pagbalga sa kahagadan sa aldaw nin Sabbath na nangangalad nin pagtrabaho. Kaya nag-andam si Jesus para sa sarong dramatikong pakipaghampangan paagi sa pagsabi sa lalaking alang an kamot: “Buhat asin pumaduman ka sa tahaw.”

Ngonyan, sa pagkaolay sa mga eskriba asin Fariseo, si Jesus nagsabi: “Siisay na tawo sa tahaw nindo na igwa nin sarong karnero asin, kun ini maholog sa sarong kotkot sa sabbath, dai iyan aagapan asin iyan ihahawas?” Huling an sarong karnero nagrerepresentar nin pinansial na pangangapital, dai ninda iyan pababayaan na maagahan sa kotkot, na tibaad magkahelang asin ikalugi ninda. Apesar, an Kasuratan nagsasabi: “An matanos nag-aataman sa kalag nin saiyang magarong hayop.”

Sa pagpaheling nin pagkakaagid, si Jesus nagpadagos: “Kun hohorophoropon, gurano pa daw an kalabihan sa halaga kan sarong tawo kisa sarong karnero! Kaya sono sa katogonan na gumibo nin marahay kun aldaw nin sabbath.” An relihiyosong mga namomoon dai nakapagrason sa siring na lohiko, maheherakon na pangangatanosan, asin sinda nagdanay na daing girong.

Sa grabeng kaanggotan, patin kamondoan huli sa saindang may katagasan na kamangmangan, si Jesus nagmasid sa palibot. Dangan sinabihan nia an lalaki: “Unata an saimong kamot.” Asin saiyang inunat iyan asin an kamot naomayan.

Imbes na maogma na naomayan an kamot kan lalaki, an mga Fariseo nagruluwas asin tolos-tolos na nakipagkasapakat sa partido na mga parasunod ni Herodes tanganing gadanon si Jesus. An politikal na partidong ini malinaw na kabale an mga miembro kan relihiyosong mga Saduceo. Sa parate, an politikal na partidong ini asin an mga Fariseo hayag na magkakatumang, pero sinda marigon na nagkakasararo sa saindang pagtumang ki Jesus. Mateo 12:​9-14; Marcos 3:​1-6; Lucas 6:​6-11; Talinhaga 12:10; Exodo 20:​8-10.

▪ Ano an eksena para sa dramatikong paghampangan ni Jesus asin kan relihiyosong mga namomoon na Judio?

▪ Ano an pagtubod kan relihiyosong mga namomoon na Judiong ini manongod sa pagpaomay kun Sabbath?

▪ Anong ilustrasyon an ginamit ni Jesus tanganing pahimutikan an saindang salang mga pagsabot?