An Pinakadakulang Tawo na Nabuhay Kasuarin Pa Man

Kapitulo 33: Pag-otob sa Hula ni Isaias

PAKATAPOS na maaraman ni Jesus na an mga Fariseo asin an partido na mga parasunod ni Herodes nagpaplanong gadanon sia, sia asin an saiyang mga disipulo naghale pasiring sa Dagat nin Galilea. Digdi an darakulang kadaklan hale sa gabos na lugar nin Palestina, asin pati sa luwas kan mga linderos kaiyan, nagtiripon sa saiya. Dakol an pinaomayan nia, na dahelan na an gabos na grabe an helang nagruso tanganing madootan sia.

Huling dakulaon an kadaklan, sinabihan ni Jesus an saiyang mga disipulo na kumua nin sarong sakayan na danay niang magagamit. Paagi sa pagrayo sa baybayon, malilikayan nia an pagruso saiya kan kadaklan. Puwede siang magtokdo sainda gikan sa sakayan o magbiyahe pasiring sa ibang lugar na nasa mga baybayon tanganing tabangan an mga tagaduman.

Isinurat ni disipulo Mateo na an aktibidad ni Jesus nakaotob sa “itinaram paagi ki Isaias na propeta.” Dangan kinotar ni Mateo an hula na inotob ni Jesus:

“Uya! An sakong lingkod na sakong pinili, an sakong namomotan, na naooyonan kan sakong kalag! Ibubugtak ko an sakong espiritu sa saiya, asin kun ano an hustisya liliwanagon nia sa mga nasyon. Dai sia makikipag-iwal, ni makurahaw man, ni madadangog nin siisay man an saiyang tingog sa mahiwas na mga dalan. Mayong nalanog na gaho an saiyang roronoton, asin mayong nagbabagang linong mitsa an saiyang paparongon, sagkod na sia magpaluwas nin hustisya na may kapangganahan. An totoo, sa saiyang ngaran maglalaom an mga nasyon.”

Sabihon pa, si Jesus iyo an namomotan na lingkod na naooyonan nin Dios. Asin liniliwanag ni Jesus kun ano an tunay na hustisya, na pinalilibog nin falsong relihiyosong mga tradisyon. Huli sa saindang bakong makatanosan na pagpaotob sa pagboot nin Dios, an mga Fariseo dai man lamang minarani sa pagtabang sa sarong tawong may helang kun Sabbath! Sa pagpaliwanag sa hustisya nin Dios, pinaginhawa ni Jesus an mga tawo sa kagabatan nin bakong makatanosan na mga tradisyon, asin huli kaini, an relihiyosong mga namomoon naghingoang gadanon sia.

Ano an boot sabihon na ‘dai sia makikipag-iwal, ni ilalangkaw an saiyang tingog tanganing madangog sa mahiwas na mga dalan’? Kun nagpapaomay nin mga tawo, si Jesus ‘estrikto sindang pinagbobotan na dai sia ihayag.’ Habo niang magkaigwa nin maribok na pagpaisi kan saiyang sadiri sa mga tinampo o magkaigwa nin nabiribid na mga bareta na nasobrahan an pagkasabi.

Siring man, ipinaabot ni Jesus an saiyang nakararangang mensahe sa mga tawo na sa piguratibong paagi arog sa nalanog na gaho, barari na asin pinagtirutirimakan. Sinda siring sa nagbabagang linong mitsa, na an ultimong kilyab nin buhay haros nasigbo na. Dai rinonot ni Jesus an nalanog na gaho o pinarong an nagpipirawpitaw, nag-aasong mitsa. Kundi may kabootan asin pagkamoot, eksperto niang binubuhat an mga mahoyo. Tunay nanggad, si Jesus an saro na puwedeng laoman kan mga nasyon! Mateo 12:​15-21; Marcos 3:​7-12; Isaias 42:​1-4.

▪ Paano liniwanag ni Jesus an hustisya, na dai nakikipag-iwal o ilinalangkaw an saiyang tingog sa mahiwas na mga dalan?

▪ Sairisay an siring sa nalanog na gaho asin linong mitsa, asin paano sinda trinatar ni Jesus?