An Pinakadakulang Tawo na Nabuhay Kasuarin Pa Man

Kapitulo 42: Tinuyaw ni Jesus an mga Fariseo

KUN paagi sa kapangyarihan ni Satanas na nagpapaluwas sia nin mga demonyo, an pangangatanosan ni Jesus, kun siring si Satanas nababanga tumang sa saiyang sadiri. “Baga man gibohon nindong marahay an kahoy asin marahay an bunga kaiyan,” an pagpadagos nia, “o gibohon na lapa an kahoy asin lapa an bunga kaiyan; huli ta sa bunga kaiyan an kahoy namimidbid.”

Karungawan na magsahot na an marahay na bunga nin pagpaluwas nin mga demonyo resulta nin paglilingkod ni Jesus ki Satanas. Kun an bunga marahay, an kahoy dai puwedeng magin lapa. Sa ibong na kampi, an lapang mga bunga kan mga Fariseo na daing kamanungdanan na mga sahot asin mayong basihan na pagtumang ki Jesus patotoo na sinda mismo mga lapa. “Kapag-arakian nin mga rimoranon,” an makosog na sabi ni Jesus, “paano kamo makakataram nin marahay na mga bagay, mantang kamo maraot? Huli ta gikan sa kapanoan kan puso nagtataram an ngoso.”

Mantang an satong mga tataramon nagpapabanaag kan kamugtakan kan satong puso, an satong sinasabi nagtatao nin basihan para sa paghokom. “Sinasabi ko sa saindo,” an sabi ni Jesus, “na an lambang basang na tataramon na sabihon nin mga tawo, paninimbagan ninda iyan sa Aldaw nin Paghokom; huli ta paagi sa saindong mga tataramon kamo ipapahayag na matanos, asin paagi sa saindong mga tataramon kamo sisilotan.”

Sa ibong kan gabos na mapangyaring gibo ni Jesus, an mga eskriba asin Fariseo nakiolay: “Paratokdo, minamawot ming makaheling nin sarong tanda hale saimo.” Minsan ngani an partikular na mga tawong ini hale sa Jerusalem tibaad dai pa personal na nakaheling kan saiyang mga milagro, nag-eeksister an dai makukustion na patotoo kan mga nakaheling manongod sa mga iyan. Kaya sinabihan ni Jesus an Judiong mga namomoon: “An maraot asin parasambay na kapag-arakian padagos na naghahanap nin tanda, alagad mayo nin ibang tanda na itatao dian kundi an tanda ni Jonas na propeta.”

Ipinaliliwanag an boot niang sabihon, si Jesus nagpadagos: “Kun paanong si Jonas yaon sa tulak kan dakulang sira sa laog nin tolong aldaw asin tolong banggi, siring man an Aki nin tawo mamumugtak sa puso kan daga sa laog nin tolong aldaw asin tolong banggi.” Pakatapos na halonon kan sira, si Jonas nagluwas na garo baga binuhay liwat, kaya si Jesus naghuhula na sia magagadan asin sa ikatolong aldaw ibabangon na buhay. Alagad, an Judiong mga namomoon, dawa kan huri binuhay liwat si Jesus, isinikwal an “tanda ni Jonas.”

Kaya sinabi ni Jesus na an mga taga-Ninive na nagsolsol sa paghuhulit ni Jonas mabubuhay liwat sa paghokom tanganing kondenaron an mga Judio na nagsikwal ki Jesus. Kaagid kaiyan, ikinomparar man nia an reyna nin Seba, na nagdatong hale sa kaporoporohi kan daga tanganing dangogon an kadonongan ni Salomon asin naghanga sa saiyang naheling asin nadangog. “Alagad, uya!” sabi ni Jesus, “an sarong labi pa ki Salomon yaon digdi.”

Dangan itinao ni Jesus an ilustrasyon dapit sa sarong tawo na linuwasan nin sarong marompot na espiritu. Alagad, an bakante dai pinano kan lalaki nin mararahay na bagay, kaya sinaniban sia nin pitong orog pa karaot na espiritu. “Siring man kaiyan an mangyayari sa maraot na kapag-arakian na ini,” an sabi ni Jesus. An nasyon na Israelita nalinigan asin nag-agi na nin mga pagbabago​—arog sa temporaryong paghale kan marompot na espiritu. Alagad an pagsikwal kan nasyon sa mga propeta nin Dios, na suminagkod sa pagtumang kaiyan ki Cristo mismo, naghahayag kan maraot na kamugtakan kaiyan na orog pa karaot kisa sa kapinonan kaiyan.

Mantang si Jesus nagtataram, an saiyang ina asin mga tugang nia nag-arabot asin nagtirindog sa kataed kan kadaklan. Kaya may saro na nagsabi: “Uya! An saimong ina asin an saimong mga tugang nagtitirindog sa luwas, nagmamawot na makipag-olay saimo.”

“Siisay an sakong ina, asin sairisay an sakong mga tugang?” an ihinapot ni Jesus. Iinuunat an saiyang kamot sa saiyang mga disipulo, sia nagsabi: “Uya! An sakong ina asin an sakong mga tugang! Huli ta an siisay man na naggigibo kan kabotan kan sakong Ama na nasa langit, sia man an sakong tugang na lalaki, asin tugang na babae, patin ina.” Sa paaging ini ipinaheling ni Jesus na dawa gurano sia kadayupot sa saiyang mga paryentes, mas dayupot pa man giraray an saiyang relasyon sa saiyang mga disipulo. Mateo 12:33-50; Marcos 3:​31-35; Lucas 8:​19-21.

▪ Paano dai nagibo kan mga Fariseo na magin marahay kapwa an “kahoy” asin an “bunga”?

▪ Ano an “tanda ni Jonas,” paano iyan isinikwal kan huri?

▪ Paanong an enot na siglong nasyon na Israelita nakakaagid sa tawong linuwasan nin marompot na espiritu?

▪ Paano idinoon ni Jesus an saiyang dayupot na relasyon sa saiyang mga disipulo?