An Pinakadakulang Tawo na Nabuhay Kasuarin Pa Man

Kapitulo 43: Pagtokdo Paagi sa mga Ilustrasyon

SI Jesus malinaw na nasa Capernaum kan tuyawon nia an mga Fariseo. Kan huri kan aldaw man sanang iyan, naghale sia sa harong asin naglakaw pasiring sa haraning Dagat nin Galilea, kun saen nagkakatiripon an mga kadaklan. Duman suminakay sia sa sarong sakayan, ruminayorayo sa tampi, asin nagpoon na magtokdo sa mga tawong nasa baybayon manongod sa Kahadean kan kalangitan. Ginibo nia iyan paagi sa surunodsunod na parabola, o mga ilustrasyon, na an kada saro igwa nin eksena na pamilyar sa mga tawo.

Enot, si Jesus nagsaysay dapit sa sarong parasabwag na nagsabwag nin banhi. An ibang banhi naholog sa gilid kan dalan asin tinuka nin mga gamgam. An ibang banhi naholog sa daga na igwang darakulang gapo sa irarom. Huling hababaw an mga gamot, an bagong mga tinanom naluyos huli sa nakakatotong na aldaw. An iba pang banhi naholog sa matunok, na luminamos sa mga tinanom kan iyan magturubo. Sa katapustapusi, an ibang banhi naholog sa marahay na daga asin namunga nin mananggatos, an iba manganom na polo, asin an iba manolong polo.

Sa saro pang ilustrasyon, ikinomparar ni Jesus an Kahadean nin Dios sa sarong tawo na nagsabwag nin banhi. Sa pag-agi nin mga aldaw, mantang an tawo nagtotorog asin kan pagmata nia, an banhi tuminubo. Dai aram kan tawo kun paano nangyari. Iyan basta na sana tuminubo asin namunga. Kan mahinog an mga bunga, inani iyan kan tawo.

Si Jesus nagsaysay nin ikatolong ilustrasyon manongod sa sarong tawo na nagsabwag kan tamang klase nin banhi, alagad “mantang natotorog an mga tawo,” may nagdatong na kaiwal asin nagsabwag nin mga doot sa tanga kan trigo. An mga surugoon kan tawo naghapot kun maninigo nindang garaboton an mga doot. Alagad sia nagsimbag: ‘Dai, magagabot nindo an ibang trigo kun gigibohon nindo iyan. Pabayae nindong tumubo sindang magkaibanan sagkod sa pag-ani. Dangan sasabihan ko an mga paraani na laenon an mga doot asin soloon iyan dangan ibugtak an trigo sa kamalig.’

Sa pagpadagos kan saiyang pahayag sa mga kadaklan na nasa baybayon, si Jesus nagtao nin duwa pang ilustrasyon. Saiyang ipinaliwanag na “an kahadean nin kalangitan” nakakaagid sa sarong pisog nin mustasa na itinanom nin sarong tawo. Minsan ngani iyan an pinakasadit sa gabos na pisog, sabi nia, iyan tuminubo na iyo an pinakadakula sa gabos na gugulayon. Iyan nagin kahoy na minadian an mga gamgam, minasirong sa mga sanga kaiyan.

An nagkapira ngonyan minakontra na igwa nin mas saradit pang pisog kisa sa mga pisog nin mustasa. Alagad si Jesus dai nagtatao nin leksion sa botanika. Manongod sa mga pisog na pamilyar sa mga taga-Galilea kan saiyang kaaldawan, an pisog nin mustasa talagang iyo an pinakasadit. Kaya nasabotan ninda an bagay dapit sa makangangalas na pagtubo na iiniilustrar ni Jesus.

Sa katapustapusi, ikinomparar ni Jesus “an kahadean nin kalangitan” sa lebadura na kinua nin sarong babae asin isinalak sa tolong darakulang takad nin harina. Paghaloyhaloy, sabi nia, iyan nakakasarumsom na sa gabos na parte kan masa.

Pakatapos na itao an limang ilustrasyon na ini, pinaharale na ni Jesus an mga kadaklan asin nagbalik sia sa harong na saiyang dinadagusan. Dai nahaloy an saiyang 12 apostol asin iba pa nagdorolok saiya duman.

Pakikinabang sa mga Ilustrasyon ni Jesus

Kan magdorolok ki Jesus an mga disipulo pakatapos kan saiyang pahayag sa mga kadaklan na nasa baybayon, sinda interesado dapit sa saiyang bagong paagi nin pagtotokdo. A, nadangog na ninda siang naggamit nin mga ilustrasyon kaidto, pero bako nanggad detalyadong gayo. Kaya naghapot sinda: “Taano ta nagtataram ka sa sainda paagi sa mga ilustrasyon?”

An sarong dahelan na ginibo nia iyan iyo na tanganing otobon an mga tataramon kan propeta: “Bubukaon ko an sakong ngoso na may mga ilustrasyon, ipapahayag ko an mga bagay na natatago poon sa pagkatindog.” Alagad labi pa dian an boot sabihon kaiyan. An paggamit nia nin mga ilustrasyon nakaootob sa katuyohan na tabangan na ihayag an saboot kan puso kan mga tawo.

Sa aktuwal, an kadaklan na tawo interesado sana ki Jesus bilang ekspertong paraestorya asin paragibo nin milagro, bakong saro na dapat paglingkodan bilang Kagurangnan asin sunodon nin daing kapasloan. Habo nindang maribong sa saindang pagmansay sa mga bagay o sa saindang paagi nin pamumuhay. Habo ninda na an mensahe makataros nin siring kararom.

Si Jesus nagsabi: “Ini an dahelan na ako nagtataram sa sainda paagi sa mga ilustrasyon, huli ta, sa pagheling, dai sinda nakakaheling, asin sa pagdangog, dai sinda nakakadangog, ni nasasabotan man ninda iyan; asin sa sainda an hula ni Isaias naootob, na nagsasabi, ‘ . . . Huling tuminagas na an puso kan mga tawong ini.’”

“Alagad,” an padagos na pagsabi ni Jesus, “maogma an saindong mga mata huling an mga iyan nakakamansay, asin an saindong mga talinga huling iyan nakakadangog. Huli ta sa katotoohan sinasabi ko saindo, Dakol na propeta asin matanos an nagmawot na maheling an mga bagay na naheheling nindo asin dai ninda naheling an mga iyan, asin na madangog an mga bagay na nadadangog nindo asin dai ninda nadangog an mga iyan.”

Iyo, an 12 apostol asin an kairiba ninda igwa nin puso na andam na maghimate. Kaya si Jesus nagsabi: “Itinao sa saindo an pakasabot kan banal na mga hilom kan kahadean nin mga langit, alagad dai iyan itinao sa mga tawong idto.” Huli kan saindang pagmawot na magkaigwa nin pakasabot, tinawan ni Jesus an saiyang mga disipulo nin paliwanag sa ilustrasyon dapit sa parasabwag.

“An banhi iyo an tataramon nin Dios,” sabi ni Jesus, asin an daga iyo an puso. Manongod sa banhi na isinabwag sa matagas na daga sa gilid nin dalan, sia nagpaliwanag: “An Diablo nagdatong asin hinale an tataramon sa saindang puso tanganing dai sinda magtubod asin makaligtas.”

Sa ibong na kampi, an banhi na isinabwag sa daga na may darakulang gapo sa irarom nanonongod sa puso nin mga tawo na nag-aako sa tataramon na may kagayagayahan. Alagad, huling an tataramon dai makagamot nin hararom sa siring na mga puso, an mga tawong ini nagbaraya pag-abot kan panahon nin pagbalo o paglamag.

Kun manongod sa banhi na naholog sa matunok, an pagpadagos ni Jesus, ini nanonongod sa mga tawong nakadangog sa tataramon. Alagad, an mga ini napasuhay huli sa mga kahaditan asin kayamanan patin kasingawan sa buhay na ini, kaya sinda biyong nagkaralamos asin mayong ano man na dinara sa pagkasangkap.

Sa katapustapusi, kun manongod sa banhi na isinabwag sa marahay na daga, sabi ni Jesus, ini iyo an mga, pakadangog kan tataramon na may marahay asin mahusay na puso, nag-ingat kaiyan asin namunga na may pakatagal.

Kanigoan na bendisyon an nakamtan kan mga disipulong ini na naghanap ki Jesus tanganing makakua nin paliwanag dapit sa saiyang mga katokdoan! Katuyohan ni Jesus na an saiyang mga ilustrasyon masabotan tanganing makatao nin katotoohan sa iba. “An lampara dai dinadara tanganing ibugtak sa irarom nin pantakad na basket o sa irarom nin higdaan, bako daw?” an ihinapot nia. Dai, “iyan dinadara tanganing ibugtak sa kandelero.” Kaya idinugang ni Jesus: “Kun siring, mag-ingat kun paano an saindong paghinanyog.”

Binendisyonan nin Dakol Pang Pagtotokdo

Pakatapos na akoon an paliwanag ni Jesus sa ilustrasyon dapit sa parasabwag, an mga disipulo boot na makanood nin dakol pa. “Paliwanagan sa samo,” an pakiolay ninda, “an ilustrasyon dapit sa mga doot sa oma.”

Laen nanggad an kaisipan kan mga disipulo kisa duman sa mga nasa kadaklan na nasa baybayon! An mga tawong idto mayo nin odok na pagmawot na manodan an kahulogan kan mga ilustrasyon, na kontento na sana sa estorya kan mga bagay na iinatubang sa sainda. Ipinaheheling an pagkakalaen kan mga nagdadangog na idto na nasa gilid kan dagat asin kan saiyang mahinapot na mga disipulo na nagdolok saiya sa harong, si Jesus nagsabi:

“An sokol na isinosokol nindo, iyo man an isosokol saindo, iyo, labi pa an itatao sa saindo.” An mga disipulo nakakasokol sa odok na interes asin atension ni Jesus, asin sa siring sinda binendisyonan na umako nin dakol pang pagtotokdo. Kaya, bilang simbag sa hapot kan saiyang mga disipulo, si Jesus nagpaliwanag:

“An nagsabwag kan marahay na banhi iyo an Aki nin tawo; an oma iyo an kinaban; kun manongod sa marahay na banhi, an mga ini iyo an mga aki kan kahadean; alagad an mga doot iyo an mga aki kan maraot, asin an kaiwal na nagsabwag sa sainda iyo an Diablo. An pag-ani sarong pagtatapos nin palakaw nin mga bagay, asin an mga paraani mga anghel.”

Pakatapos na ipamidbid an kada kabtang kan saiyang ilustrasyon, ilinadawan ni Jesus an kaaabtan. Sa pagtatapos kan palakaw nin mga bagay, sia nagsabi na an mga paraani, o mga anghel, ibubulag an arog-doot na palsipikadong mga Kristiano hale sa tunay na mga “aki kan kahadean.” Dangan, “an mga aki kan maraot” tatandaan para sa kalaglagan, alagad an mga aki kan Kahadean nin Dios, “an mga matanos,” masirang nin maliwanagon sa Kahadean kan saindang Ama.

Sunod binendisyonan ni Jesus an saiyang mahinapot na mga disipulo nin tolo pang ilustrasyon. Enot, sinabi nia: “An kahadean nin kalangitan nakakaagid sa sarong kayamanan na tinago sa oma, na nakua nin sarong tawo asin tinago; asin sa kaogmahan nia sia naglakaw asin nagpabakal kan gabos niang sadiri asin binakal an oma.”

“Sa liwat,” an pagpadagos nia, “an kahadean nin kalangitan nakakaagid sa sarong parabariwas na naghahanap nin magagayon na perlas. Kan sia makakua nin sarong perlas na dakulaon an halaga, napaduman sia asin ipinabakal tolos an gabos niang sadiri asin binakal iyan.”

Si Jesus mismo kaagid kan tawo na nakakua nin natatagong kayamanan asin kaagid kan parabariwas na nakakua nin perlas na dakulaon an halaga. Ipinabakal nia an gabos, sabi ngani, na binayaan an kagalanggalang na kamugtakan sa langit tanganing magin hamak na tawo. Dangan, bilang tawo digdi sa daga, sia nagtios nin kasopganan asin makaoongis na paglamag, na nagpapatunay na angay na magin Hade sa Kahadean nin Dios.

An angat iinaatubang sa mga parasunod ni Jesus na ipabakal man an gabos tanganing magkamit kan mamuraway na balos nin pagigin magsalang kaibang hade ni Cristo o daganon na sakop kan Kahadean. Ibibilang daw niato an pagkakaigwa nin kabtang sa Kahadean nin Dios na orog kahalaga kisa sa ano pa man sa buhay, bilang dakulaon na kayamanan o sarong mamahalon na perlas?

Sa katapustapusi, iinagid ni Jesus “an kahadean nin kalangitan” sa sarong hikot na nakakatipon nin gabos na klaseng sira. Kan pagbulagbulagon an mga sira, an mga dai maninigo itinapok pero itinada an mga marahay. Kaya, an sabi ni Jesus, iyan an mangyayari sa pagtatapos kan palakaw nin mga bagay; ibubulag kan mga anghel an mga maraot sa mga matanos, na itinatagama an mga maraot tanganing laglagon.

Pinonan mismo ni Jesus an proyektong ini nin paninira, na inapod an saiyang enot na mga disipulo na magin “mga parasira nin mga tawo.” Sa pagbabantay nin mga anghel, an gibohon na paninira nagpapadagos sa laog na nin mga siglo. Sa katapustapusi maabot an panahon tanganing ihawas na an “hikot,” na nagsisimbolo sa mga organisasyon digdi sa daga na naghihingakong Kristiano.

Minsan ngani an bako maninigong mga sira iaapon sa kalaglagan, salamat nanggad na ikakabilang kita sa ‘marahay na sira’ na itinada. Paagi sa pagpaheling kan kaparehong odok na pagmawot para sa orog pang kaaraman asin pakasabot siring kan ginibo kan mga disipulo ni Jesus, kita bibendisyonan bako sana nin dakol pang pagtotokdo kundi kan bendisyon nin Dios na buhay na daing sagkod. Mateo 13:​1-52; Marcos 4:​1-34; Lucas 8:​4-18; Salmo 78:2; Isaias 6:​9, 10.

▪ Kasuarin asin saen si Jesus nagtaram sa mga kadaklan paagi sa mga ilustrasyon?

▪ Anong limang ilustrasyon an isinaysay ngonyan ni Jesus sa mga kadaklan?

▪ Taano ta sinabi ni Jesus na an pisog nin mustasa an pinakasadit sa gabos na pisog?

▪ Taano si Jesus ta nagtaram paagi sa mga ilustrasyon?

▪ Paano ipinaheling kan mga disipulo ni Jesus na sinda mismo napapalaen sa mga kadaklan?

▪ Anong paliwanag an itinao ni Jesus sa ilustrasyon dapit sa parasabwag?

▪ Paano an mga disipulo napapalaen sa mga kadaklan na nasa baybayon?

▪ Siisay o ano an irinirepresentar kan parasabwag, kan oma, kan marahay na banhi, kan kaiwal, kan pag-ani, asin kan mga paraani?

▪ Anong tolong dagdag na ilustrasyon an itinao ni Jesus, asin ano an satong manonodan dian?