An Pinakadakulang Tawo na Nabuhay Kasuarin Pa Man
Kapitulo 44: Pagpatoninong sa Makatatakot na Bagyo
AN ALDAW ni Jesus pano nin aktibidad, kabale an pagtokdo sa mga kadaklan na nasa baybayon asin pakatapos kaiyan pagpaliwanag kan mga ilustrasyon sa saiyang mga disipulo na sinda sana. Pagkabanggi, sia nagsabi: “Bumalyo kita sa ibong na baybayon.”
Yaon sa ibong kan sirangan na baybayon kan Dagat nin Galilea an rehiyon na inaapod Decapolis, hale sa Griego na deʹka, na nangangahulogan “sampulo,” asin poʹlis, na nangangahulogan “siudad.” An mga siudad sa Decapolis sentro nin kulturang Griego, minsan ngani mayong duwa-duwa na iyan man an istaran nin dakol na Judio. Alagad, limitadong gayo an aktibidad ni Jesus sa rehiyon. Maski sa pagsongkong ini, siring kan satong maheheling sa huri, sia binawalan na maghaloy.
Kan hagadon ni Jesus na sinda humale paduman sa saro pang baybayon, pinasakay sia kan mga disipulo sa sakayan. Alagad, naheling an saindang paghale. An iba tolos na suminakay sa saindang mga sakayan tanganing umiba sa sainda. Bako man harayoon paibong. Sa aktuwal, an Dagat nin Galilea saro sanang dakulang danaw na mga 13 milyas an laba asin sa pinakadakula 7 1/2 milyas an lakbang.
Siyempre pagal na si Jesus. Kaya, dai nahaloy paglawod ninda, naghigda sia sa likod kan sakayan, ipinatong an saiyang payo sa sarong ulunan, asin nakatorog nin nanok. An nagkapira sa mga apostol eksperyensiadong mga marinero, palibhasa haloy na sa paninira sa Dagat nin Galilea. Kaya sinda an nag-asikaso sa paglayag kan sakayan.
Alagad bako ining pasil na biyahe. Huli kan mas mainit na temperatura sa tubig kan danaw, na mga 700 piye an rarom sa patag kan dagat, asin kan mas malipot na aire sa kataed na mga bulod, an makosog na doros paminsanminsan minaagi asin nagkacausa nin biglaan na makokosog na bagyo sa danaw. Ini an nangyayari ngonyan. Dai nahaloy an mga alon minasalpok sa sakayan asin nakakalaog dian, kaya haros malunod na iyan. Alagad, si Jesus padagos sa pagtorog!
An eksperyensiadong mga marinero may pagkahandal na nagmaigot na giyahan an sakayan. Mayong duwa-duwa na nakapagmaniobra sinda sa mga bagyo kaidto. Pero ngonyan mayo na sindang maisip na gibohon. Sa takot na namemeligro an saindang buhay, pinukaw ninda si Jesus. ‘Kagurangnan, dai kang pakilabot? Malulunod na kita!’ an pagkagsing ninda. ‘Iligtas mo kami, malalamos na kami!’
Pagbangon nia, pinagbotan ni Jesus an doros asin an dagat: “Toninong! Ontok!” Asin an makosog na doros uminontok asin an dagat nagin kalmado. Sa pagsalingoy sa saiyang mga disipulo, naghapot sia: ‘Taano ta natatakot kamong marhay? Dai pa kamo nin ano man na pagtubod?’
Huli kaiyan, nakamate nin pambihirang takot an mga disipulo, ‘Siisay daw man nanggad an tawong ini?’ an paghinarapotan ninda, ‘huli ta pinagbobotan nia minsan an doros asin an tubig, asin sinda nagkukuyog sa saiya.’
Kanigoan na kapangyarihan an ipinaheling ni Jesus! Nakapakokosog nanggad na maaraman na an satong Hade igwa nin kapangyarihan sa natural na mga elemento asin na kun an saiyang bilog na atension itao na sa satong daga durante kan saiyang pamamahala sa Kahadean, an gabos na tawo mag-eerok na ligtas sa makatatakot na natural na mga kalamidad!
Kan kuminulpa na an bagyo, si Jesus asin an saiyang mga disipulo ligtas na nag-abot sa sirangan na baybayon. Puwedeng an ibang sakayan nakaligtas sa kosog kan bagyo asin ligtas na nakapuli. Marcos 4:35–5:1; Mateo 8:18, 23-27; Lucas 8:22-26.
▪ Ano an Decapolis, asin saen iyan?
▪ Anong pisikal na mga bagay an napangyari sa makokosog na bagyo sa Dagat nin Galilea?
▪ Kan dai sinda ikaligtas kan saindang mga abilidad sa paglayag, ano an ginibo kan mga disipulo?