Bareta kan mga Parabalangibog kan Kahadean
An Tataramon nin Dios Mapuwersa
“AN TATARAMON nin Dios buhay asin mapuwersa.” (Hebreo 4:12) An mga tataramon na ini napatunayan na totoo dakol nang panahon an nakaagi kan an mga tawong nadaya kan falsong relihiyon nakaaram sa mga katotoohan sa Biblia. Siring kan ipinaheheling sa minasunod na eksperyensia hale sa Republika nin Dominican, an puwersa kan Biblia puwedeng makabakle sa buhay nin mga tawo asin magtao nin paglaom.
Sinongko kan mga Saksi ni Jehova an sarong prominenteng babaeng Katoliko na nagadanan pa sana nin duwang sadit na aki. Labi-labi an saiyang kamondoan asin nanambitan kan saiyang trahedya aroaldaw. Ipinaheling saiya kan mga Saksi an sinasabi kan Biblia sa Juan 5:28, 29 manongod sa paglaom na pagkabuhay liwat. Pakatapos nin dugang pang pakipag-olay sa mga Saksi, bako sanang naranga sia kan paglaom na pagkabuhay liwat kundi narealisar nia na dinadaya sia kan saiyang Katolikong mga namomoon sa relihiyon.
Nagdemitir tolos sia sa Iglesya Katolika, asin nag-ako sia nin regular na pakipag-adal sa Biblia sa mga Saksi ni Jehova. Alagad, an saiyang agom dai uminoyon sa saiyang mga punto-de-vista. Huling ini saro man na prominenteng Katoliko, iinareglo kaini na songkoon an saiyang agom kan midbid na mga katood sa politika asin relihiyon sa pagprobar na padisganaron sia sa saiyang ginigibo asin ibalik sia sa Katolisismo. Kan huri hinuma sia kaini nin diborsio, na sarong beses pinaisi pa ngani an mga paryentes kaini asin kamiembro sa iglesya na magdidiborsio sinda.
Pero dai nag-aser an estratehiya kaini. Sa kabaliktaran, orog pang nagin determinado an saiyang agom na ipadagos an saiyang mga pag-adal sa Biblia. Huli kan saiyang pag-oswag sa espirituwal asin kan saiyang pakapatalubo nin marahay na Kristianong mga kuwalidad, nagdesisyon an agom na magdanay sa saiya imbes na makidiborsio. Sarong aldaw uminoyon pa ngani ini na siyasaton an babasahon sa Biblia na saiyang pinag-aadalan—pero sa sarong kondisyon. Gusto kaining gamiton an sadiring Katolikong bersion kan Biblia.
Sa pagngalas kaini, paagi sa tabang kan babasahon hale sa mga Saksi ni Jehova, nagpoon siang makanood nin bagong mga bagay na direktang gikan sa sidiri kaining Biblia. Narealisar kaini na pinili kan saiyang agom an tamang dalan, asin dai nahaloy andam na niang sunodon an halimbawa kan saiyang agom. Iyo nanggad, naheling kaini an pangangaipo na gumibo nin mga pagliliwat sa saiya mismong buhay. An sarong depisil na angat iyo an pagpondo sa saiyang pagsigarilyo. Pakatapos na basahon an Hulyo–Setyembre, 1989 (g89-E 7/8) na luwas kan magasin na Magmata! na may titulo sa tutob na “Kagadanan an Tinda—Sampulong Paagi na Makaontok sa Pagsisigarilyo,” desidido siang pondohon an bakong Makakasuratan na bisyong ini. Bilang kasalihid kan kinatodan na pakete nin sigarilyo na parateng nasa saiyang bulsa, pinonan niang darahon an luwas na iyan kan Magmata! Kada bes na nakakamate siang magsigarilyo, binabasa nia an mga artikulo dapit sa pagsigarilyo. Nag-aser an paaging iyan! Pakatapos na mabasa nin dakol na beses an mga artikulo, nakaya niang pondohon an pagsigarilyo.
Ngonyan an mag-agom parehong naglilingkod ki Jehova bilang bautisadong mga ministro. Kun tinotogotan kan mga kamugtakan, naglilingkod sia bilang pambilog na panahon na ministro, na idinudusay an dakol sa saiyang oras sa paghuhulit kan maogmang bareta kan Kahadean nin Dios, asin naglilingkod sia bilang ministeryal na lingkod sa lokal na kongregasyon kan mga Saksi ni Jehova. Sindang mag-agom naglalaom sa pagkabuhay liwat na puwede nindang sabaton an saindang mga aki na buhay sa sarong bagong kinaban. Iyo, an Tataramon nin Dios, an Biblia, buhay asin mapuwersa!