Bareta kan mga Parabalangibog kan Kahadean
“An Dios Dai Nagpapalaen”
DESINUWEBENG gatos na taon na an nakaagi, an pinasabngan na si apostol Pedro nagsabi: “An Dios dai nagpapalaen, kundi sa lambang nasyon an tawo na natatakot sa saiya asin naggigibo nin katanosan saiyang inaako.” (Gibo 10:34, 35) Sa tahaw kan mga Saksi ni Jehova manonompongan an mga tawo gikan sa gabos na rasa asin relihiyon. Nagmamawot sinda nin katanosan, asin natatakot sinda sa Dios. Sinda gabos inaako ni Jehova sa sosyedad nin bagong kinaban, siring baga, halimbawa, sa ginibo nia sa sarong babae sa Chad.
An babaeng ini bakong kontento sa saiyang relihiyon. Dakol nang taon an nakaagi uminako sia nin sarong kopya kan librong Your Youth—Getting the Best Out Of It, na ipinublikar kan mga Saksi ni Jehova, asin inapresyar nia an marahay na sadol na yaon sa libro. Naponan an pag-adal sa Biblia, asin permi siang yaon para sa pag-adal. Alagad, kan dagkahon na umatender sa mga pagtiripon sa Kingdom Hall, dai sia naghiro. Taano? Minsan ngani an saiyang agom dai nagkontra sa saiyang pag-adal, nagsayuma ining togotan sia na umatender sa mga pagtiripon sa Kingdom Hall.
Kan gusto kan agom na babae na umatender sa pansirkitong asamblea, an Saksi na nagkokondukta kan pag-adal ipinaheling sa agom na lalaki an programa, na itinatampok an marahay na sadol na iaatubang. Tinogotan nia an pagduman kan saiyang agom nin “saro sanang beses.” Nag-atender ini asin naogmang marhay sa programa. Pakapaliwanag nia sa saiyang agom na lalaki kan saiyang nanodan, dai kaini kinontra an saiyang pag-atender sa iba pang pagtiripon. Huminanga sia sa bagay na an kongregasyon kompuwesto nin mga tawo hale sa laen-laen na etnikong grupo na nagmamakolog na gayo sa kada saro. Dai nahaloy nag-atender sia sa pandistritong kombension asin napano nin kaogmahan sa pakaheling na an saiyang mga aki kinukulkol nin mga Saksi hale sa ibang nasyon. An mga Saksi hinirasan nin pagkakan an mga aki asin trinato sindang garo kapamilya. Ini an nakapabago sa saiya.
Pero suminunod an paglamag. Dawa ngani masosopgon an naturalesa, nagpoon siang magkomento sa mga pagtiripon asin mapusong naninindogan sa negatibong mga komento kan saiyang mga paryentes asin kataraed. Minsan dakol na taon na siang nakisaro sa saiyang agom na lalaki, tradisyonal sana an saindang pag-agoman na mayong kasamiento. Paano daw nia bubuksan an tema manongod sa legal na pagpakasal? Pakapamibi nin odok sa boot ki Jehova, kinaolay nia an saiyang agom, na nagsabi na hehelingon kaini an posibilidad kaiyan. Sa katapustapusi iyan ginibo kan lalaki, asin an mag-agom nagpakasal nin legal.
An sarong kunyada na nag-iistar kaiba ninda nagcausa nin dakol na problema, pero an agom na lalaki nanindogan apabor sa saiyang agom. Dangan an ama kan lalaki suminongko. Pinagbotan kaini an saiyang aki na idiborsio an saiyang agom, ta sinalidahan kan babae an saiyang relihiyon. Sinabihan kan ama an saiyang aki na matao sia nin dote para sa sarong “mas marahay na agom na babae.” An simbag kan aki: “Dai, dai ko gigibohon iyan. Marahay siang agom. Kun boot niang humale, laen iyan, alagad dai ko sia sasabihan na humale.” Magalang na marhay an agom na babae sa saiyang panugangan na lalaki, asin napasopog ini sa saiyang paggawe. Pero, kan pumuli an panugangan na lalaki sa saiyang baryo, sinuratan nia an saiyang aki, na ngonyan nagtatao nin ultimatum. Sinabi nia na kun magsayuma an saiyang aki na palayason an saiyang agom, bako na siang aki nia. Sa giraray nanindogan an agom na lalaki para sa saiyang agom. Imahinara an kagayagayahan kan agom na babae sa pakaheling sa saiyang agom na gumibo nin siring kadepinidong paninindogan.
Ngonyan an duwa nindang sadit na aking lalaki nawiwiling ibanan an saindang ina sa Kingdom Hall. Naghagad pa ngani sinda sa saindang ama nin mga kurbata, mantang naheling ninda an gabos na tugang na lalaki na nagpapahayag na nakasulot kaiyan. Ngonyan an babaeng ini bautisado nang tugang.
Saro sia sa 345 maogmang Saksi sa Chad na nagpapahayag kan maogmang bareta manongod sa Kahadean ni Jehova asin inaapresyar na, totoo nanggad, “an Dios dai nagpapalaen.”