Bareta kan mga Parabalangibog kan Kahadean
“Maogma an Tawo na Nakanompong nin Kadonongan”
AN TALINHAGANG ini napatunayan na totoo sa Korea, na kun saen igwa na ngonyan nin labi sa 71,000 na maogmang mga Saksi ni Jehova. (Talinhaga 3:13) Asin isip-isipa, 42 porsiento kan mga ministrong ini an nasa pambilog na panahon na paglilingkod! An minasunod na mga eksperyensia magpapaheling na an kaogmahan iyo an kakamtan kan mga naghahanap nin tunay na kadonongan.
An sarong babae sa Pusan nagsimba sa saro sa mga iglesya nin Kakristianohan sa laog nin 16 na taon. Naobserbaran nia an kadakoldakol na bakong Makakasuratan na gibohon na nagpoon siang mag-isip na puwedeng mayong Dios. Sa ibong na lado, dai nia madedeharan an pag-eksister nin Dios, kaya odok sa boot siang namibi sa Dios na manompongan nia logod an tunay na iglesya kun igwa nin siring na bagay. Sa puntong ini tolos niang nagirumdoman an mga Saksi ni Jehova, asin nagirumdoman nia na an saiyang iglesya minenus sinda saka pinatanidan an mga parasimba tumang sainda huli ta an mga Saksi dai nagtutubod sa Trinidad, impiernong may kalayo, asin iba pang doktrina nin Kakristianohan. Tibaad sinda an tunay na iglesya? Paagi sa tabang nin sarong kataed, nanompongan nia an lugar kan Kingdom Hall. Kan sumunod man sanang aldaw, nag-atender sia sa pagtiripon.
Nagngalas sia sa pagigin areglado kan pagtiripon. Mayo nin panatikong pagkururahaw o emosyonal na pagkanta arog sa saiyang iglesya. Iinintrodusir sia sa sarong Saksi na andam na makipag-adal kan Biblia sa saiya, asin an enot na pag-adal luminawig nin pirang oras huli sa saiyang dakol na hapot. Sa ikaduwang pag-adal, iinanunsiar nia na sia mahale sa saiyang iglesya asin magigin sarong Saksi. Sinabihan nia an tugang na babae na dai nia kaipuhan na makipag-adal pa saiya, ta puwede siang mag-atender na sana nin mga pagtiripon. Pero ipinaheling saiya an halaga kan pagkakaigwa nin personal na pag-adal sa Biblia dugang pa sa pag-atender sa mga pagtiripon. Inako nia an suhestion, nagmaigot sa saiyang pag-adal, asin pag-abot nin panahon binautismohan.
Ngonyan ogmahon siang marhay na nanompongan nia an kadonongan kan tunay na Dios, si Jehova, asin igwa kan paglaom na mabuhay sagkod lamang sa bagong kinaban nin Dios.
An Retiradong Heneral Nakanood kan Katotoohan
An agom nin sarong heneral sa hukbo binautismohan kan 1962. Kan enot kinontra sia kan saiyang agom, alagad dai nahaloy nagpondo ini sa pagkontra saiya, asin paporopondo sa laog nin 28 taon, laen-laen na tugang na lalaki an nakipag-adal saiya, na pinagmamaigotan na pukawon sia sa katotoohan. Nag-atender sia nin nagkapirang pagtiripon asin kombension, pero saro sia sa mga dai isinasaboot an katotoohan. Kan 1990 sia asin an saiyang agom na babae nagduman sa Hapon, kun saen nag-atender sinda nin pandistritong kombension. Sa okasyon na ini atento siang naghinanyog sa mga pahayag—sarong bagay na dai pa nia ginibo kaidto. Nakubhan sia sa prangkang mga pahayag na nagbubuyagyag sa falsong relihiyon, pero an mga ini talagang nagbukas kan saiyang mga mata sa pagsaginsagin nin Kakristianohan. Naghanga sia sa pagkaareglado asin kaogmahan kan banwaan nin Dios sa Hapon, na pareho man sana kan naheling nia sa Korea. Sa pagbalik sa Korea, pinonan nia an seryosong pag-adal sa Biblia asin sa katapustapusi nabautismohan.
Kaya pakapabautismo ano an saiyang maninigong gibohon? Naghale sia sa saiyang katongdan bilang presidente nin sarong bantog na hotel nin turista asin inibanan an saiyang agom sa pambilog na panahon na ministeryo bilang payunir. Namamatean nia na an pagigin regular payunir iyo an pinakamarahay na paagi tanganing makabawi sa 28 taon na nawara nia mantang nagduduwaduwa.
Narerealisar nia ngonyan na an talinhaga na “maogma an tawo na nakanompong nin kadonongan” minaaplikar man saiya!