An Pinakadakulang Tawo na Nabuhay Kasuarin Pa Man
Kapitulo 53: Sarong Minamawot na Hade na Lihis sa Tawo an Kapangyarihan
KAN milagrosong pinakakan ni Jesus an rinibo, napangalas an mga tawo. “Totoong iyo ini an propeta na mapadigdi sa kinaban,” an sabi ninda. Bako sanang nagkonklusyon sinda na si Jesus siertong iyo an propetang orog kadakula kisa ki Moises kundi na sia magigin man an pinakamamawot na hade. Kaya plinano nindang kuanon sia nin pirit asin gibohon siang hade.
Alagad, aram ni Jesus an pinaplano kan mga tawo. Kaya tolos-tolos siang huminale tanganing malikayan an puwersahan na pagpili ninda saiya. Pinaharale nia an mga kadaklan asin pinirit an saiyang mga disipulo na lumunad sa saindang sakayan asin bumalik sa Capernaum. Dangan suminuhay sia pasiring sa bukid tanganing mamibi. Kan bangging idto yaon duman si Jesus na nagsosolo.
Kan maagahon na nagtanaw si Jesus hale sa saiyang halangkaw na kinamumugtakan asin minasdan an mga alon na iinaapwak nin makosog na doros sa dagat. Sa liwanag kan haros kabilogan nin bulan, huling harani na an Paskua, natanaw ni Jesus an sakayan lunad an saiyang mga disipulo na nasasakitan sa pagsabat sa mga alon. Nagsasagwan an mga lalaki sa bilog nindang makakaya.
Kan maheling ini, naglugsot si Jesus hale sa bukid asin nagpoon na maglakaw paibong sa mga alon pasiring sa sakayan. An sakayan nakarayo na nin mga tolo o apat na milya kan abotan iyan ni Jesus. Alagad, nagpadagos sia na garo baga malampas sana sia. Kan maheling sia kan mga disipulo, sinda nagkurahaw: “Iyan sarong fantasma!”
Si Jesus nakararangang nagsimbag: “Ako ini; dai kamo matakot!”
Pero si Pedro nagsabi: “Kagurangnan, kun ika iyan, pagbotan mo akong pumadian sa saimo sa ibabaw kan tubig.”
“Madia!” an simbag ni Jesus.
Dangan, si Pedro, paglusad nia sa sakayan, luminakaw sa ibabaw kan tubig pasiring ki Jesus. Pero kan maheling an bagyo, natakot si Pedro, asin kan nag-iirarom na, sia nagkurahaw: “Kagurangnan, ligtasan ako!”
Tolos-tolos sa pag-unat kan saiyang kamot, binutong sia ni Jesus, na nagsasabi: “Ika na kakadikit an pagtubod, taano ta tinawan mo nin dalan an pagduwaduwa?”
Pakabalik ni Pedro asin Jesus sa sakayan, uminontok an doros, asin nagngaralas an mga disipulo. Pero maninigo daw sindang magngalas? Kun nasabotan ninda an “kahulogan kan tinapay” paagi sa pag-apresyar sa dakulang milagro na ginibo ni Jesus mga pirang oras pa sana an nakaagi kan saiyang pinakakan an rinibo paagi sana sa limang tinapay asin duwang saradit na sira, kun siring bako kutanang garo makangangalas na puwede siang lumakaw sa ibabaw kan tubig asin pakulpaon an doros. Minsan siring, an mga disipulo ngonyan naghuruhod ki Jesus asin nagsabi: “Tunay nanggad na ika an Aki nin Dios.”
Dai nahaloy, nakaabot sinda sa Genesaret, sarong magayon, mabungang kaplanodohan na harani sa Capernaum. Duman ninda idinuong an sakayan. Pero pag-abot ninda sa baybayon, namidbid si Jesus kan mga tawo asin nagduruman sa nakapalibot na siudad, na hinahanap an mga naghehelang. Kan darahon an mga ini na nasa saindang mga hamak asin makatikwil sana sa gayad kan pan-ibabaw na gubing ni Jesus, sinda biyong naomayan.
Mientras tanto, naaraman kan kadaklan na nakaheling sa milagrosong pagpakakan sa rinibo na naghale na si Jesus. Kaya kan mag-arabot an saradit na sakayan hale sa Tiberia, linunadan ninda iyan asin naglayag pasiring sa Capernaum tanganing hanapon si Jesus. Kan manompongan ninda sia, sinda naghapot: “Rabi, kasuarin ka nag-abot digdi?” Tinuyaw sinda ni Jesus, siring kan satong maheheling sa masunod. Juan 6:14-25; Mateo 14:22-36; Marcos 6:45-56.
▪ Pakatapos na milagrosong pakakanon ni Jesus an rinibo, ano an gustong gibohon sa saiya kan mga tawo?
▪ Ano an natanaw ni Jesus hale sa bukid na saiyang dinumanan, dangan ano an saiyang ginibo?
▪ Taano ta dai maninigong ipagngalas na gayo kan mga disipulo an mga bagay na ini?
▪ Ano an nangyari pag-abot ninda sa baybayon?