An Pinakadakulang Tawo na Nabuhay Kasuarin Pa Man

Kapitulo 54: “Tunay na Tinapay Hale sa Langit”

TUNAY na dakol an nangyari kan nakaaging aldaw. Milagrosong pinakakan ni Jesus an rinibo dangan dinulagan an pagprobar kan mga tawo na gibohon siang hade. Kan bangging idto naglakaw sia sa mabagyong Dagat nin Galilea; ilinigtas si Pedro, na nagpoon na umirarom kan sia lumakaw sa ibabaw kan tubig na sinasalpok nin bagyo; asin pinakalma an mga alon tanganing iligtas an saiyang mga disipulo sa pagkalunod.

Ngonyan an mga tawong milagrosong pinakakan ni Jesus sa amihanan na sirangan kan Dagat nin Galilea nanompongan sia harani sa Capernaum asin naghapot: “Kasuarin ka nag-abot digdi?” Sa pagtuyaw sa sainda, si Jesus nagsabi na nagdatong sinda sa paghanap sa saiya huli sana ta naglalaom sindang makakakan na naman nin daing bayad. Sinadol nia sindang magtrabaho, bakong para sa kakanon na nalalapa, kundi para sa kakanon na nagdadanay para sa buhay na daing katapusan. Kaya naghapot an mga tawo: “Ano an gigibohon mi tanganing gibohon an mga gibo nin Dios?”

Saro sanang gibo an sinambit ni Jesus na pinakamahalaga. “Ini iyo an gibo nin Dios,” an paliwanag nia, “na kamo maggibo nin pagtubod sa saiya na isinugo kan Sarong iyan.”

Alagad, an mga tawo dai nagtutubod ki Jesus, apisar kan gabos na milagrong ginibo nia. Bakong kapanipaniwala, dawa pakatapos kan gabos na makangangalas na bagay na ginibo nia, sinda naghapot: “Ano, kun siring, an ginigibo mo bilang tanda, tanganing maheling niamo iyan asin magtubod sa saimo? Anong gibo an ginigibo mo? Kinakan kan satong mga apoon an mana sa kaawagan, siring sa nasusurat, ‘Tinawan nia sinda nin tinapay hale sa langit na makakakan.’”

Bilang simbag sa saindang paghagad nin sarong tanda, liniwanag ni Jesus an Gikanan kan milagrosong mga probisyon, na nagsasabi: “Bakong si Moises an nagtao sa saindo kan tinapay hale sa langit, kundi an sakuyang Ama an nagtatao sa saindo kan tunay na tinapay hale sa langit. Huli ta an tinapay nin Dios iyo an saro na naghilig hale sa langit asin nagtatao nin buhay sa kinaban.”

“Kagurangnan,” an sabi kan mga tawo, “tawe kami nin dayaday kan tinapay na ini.”

“Ako an tinapay nin buhay,” an paliwanag ni Jesus. “An minadolok sa sako dai nanggad magugutom, asin an naggigibo nin pagtubod sa sako dai na noarin man mapapaha. Alagad sinabi ko na saindo, Naheling na ngani nindo ako alagad ta dai kamo nagtutubod. An gabos na itinao sa sako kan Ama madolok sa sako, asin an minadolok sa sako dai ko nanggad isisikwal; huli ta ako naghilig hale sa langit sa paggibo, bakong kan boot ko, kundi kan boot kaidtong nagsugo sa sako. Ini iyo an kabotan nia na nagsugo sako, na mayo ako nin mawara sa gabos na itinao nia sa sako kundi na buhayon ko iyan liwat sa huring aldaw. Huli ta iyo ini an kabotan kan sakong Ama, na an gabos na nakakaheling sa Aki asin naggigibo nin pagtubod sa saiya magkaigwa nin buhay na daing katapusan.”

Huli kaini an mga Judio nagpoon na maggurumodgumod ki Jesus huli ta sia nagsabing, “Ako an tinapay na naghilig hale sa langit.” Mayo sindang naheheling sa saiya kundi saro sanang aki nin tawong mga magurang asin sa siring sa iyo man sanang paagi na ginibo kan mga taga-Nazaret, kuminontra sinda, na nagsasabi: “Bakong iyo ini si Jesus na aki ni Jose, na an ama asin ina midbid ta? Paano ngani na ngonyan nagsasabi siang, ‘Ako naghilig sa langit’?”

“Dai kamo maggurumodgumod sa saindo man sana,” an simbag ni Jesus. “Dai nin nakadodolok sa sako kun dai sia dagkahon kan Ama, na nagsugo sa sako; asin bubuhayon ko sia liwat sa huring aldaw. Nasusurat sa mga Propeta, ‘Asin sinda gabos totokdoan ni Jehova.’ An gabos na nakadangog sa Ama asin nakanood minadolok sa sako. Bako na an siisay man na tawo nakaheling sa Ama, apuwera sa saiya na hale sa Ama; an sarong ini an nakaheling sa Ama. Sa katotoohan ako nagsasabi saindo, An minatubod igwa nin buhay na daing katapusan.”

Sa pagpadagos, inotro ni Jesus: “Ako an tinapay nin buhay. An saindong mga apoon nagkarakan kan mana sa kaawagan alagad nagkagaradan. Ini iyo an tinapay na naghihilig hale sa langit, tanganing an siisay man kumakan kaiyan asin dai magadan. Ako iyo an nabubuhay na tinapay na naghilig hale sa langit; kun an siisay man kumakan sa tinapay na ini sia mabubuhay sagkod lamang.” Iyo, paagi sa paggibo nin pagtubod ki Jesus, an saro na isinugo nin Dios, an mga tawo puwedeng magkamit nin buhay na daing katapusan. Mayong mana, o ano pa man na ibang tinapay, an makakatao kaiyan!

An orolay manongod sa tinapay na hale sa langit malinaw na nagpoon pakatapos tolos na manompongan si Jesus kan mga tawo harani sa Capernaum. Pero nagpadagos iyan, na suminagkod sa huri mantang si Jesus nagtotokdo sa sarong sinagoga sa Capernaum. Juan 6:​25-51, 59; Salmo 78:24; Isaias 54:13; Mateo 13:​55-57.

▪ Anong mga pangyayari an naenot sa pagpaliwanag ni Jesus manongod sa tinapay hale sa langit?

▪ Huli sa ginibo pa sana ni Jesus, taano ta bako nanggad na angay an paghagad nin tanda?

▪ Taano an mga Judio ta naggurumodgumod sa pagsabi ni Jesus na sia an tunay na tinapay hale sa langit?

▪ Saen nangyari an orolay manongod sa tinapay hale sa langit?