An Pinakadakulang Tawo na Nabuhay Kasuarin Pa Man

Kapitulo 56: Ano an Nagpaparamog sa Tawo?

NAG-OROG an pagtumang ki Jesus. Bako sanang huminale an dakol sa saiyang mga disipulo kundi an mga Judio sa Judea naghihingoang gadanon sia, arog kan ginibo ninda kan yaon sia sa Jerusalem durante kan Paskua nin 31 C.E.

Paskua ngonyan nin 32 C.E. Posible, sono sa kahagadan nin Dios na umatender, na nagduman si Jesus sa Paskua sa Jerusalem. Alagad, nag-ingat siang marhay huli ta namemeligro an saiyang buhay. Pakatapos kaiyan nagbalik sia sa Galilea.

Puwedeng nasa Capernaum si Jesus kan dumolok sa saiya an mga Fariseo asin eskriba na hale sa Jerusalem. Naghahanap sinda nin mga basihan na ikasasahot nin pagbalga sa pagboot nin relihiyon. “Taano ta linalapas kan saimong mga disipulo an tradisyon nin mga tawo kan enot na mga panahon?” an hapot ninda. “Halimbawa, dai ninda hinahanawan an saindang mga kamot bago magkakan?” Bako ining bagay na hinahagad nin Dios, pero ibinibilang kan mga Fariseo na magabat na kasalan an dai paggibo kan tradisyonal na rituwal na ini, na kabale an paghanaw sagkod sa mga siko.

Imbes na simbagon sinda manongod kan saindang sahot, itinokdo ni Jesus an saindang maraot asin tuyong pagbalga sa Pagboot nin Dios. “Taano man ta linalapas nindo an togon nin Dios huli sa saindong tradisyon?” an boot niang maaraman. “Halimbawa, an Dios nagsabi, ‘Igalang mo an saimong ama asin an saimong ina’; asin, ‘An nagtataram nin maraot sa ama o ina gadanon.’ Alagad kamo nagsasarabi, ‘An siisay man na magsabi sa saiyang ama o ina: “An ano man na nasa sako na puwede nindong pakinabangon sa sako sarong balaog na idinusay sa Dios,” dai na sia kaipuhan na gumalang pa sa saiyang ama.’”

Iyo nanggad, itinokdo kan mga Fariseo na an kuwarta, rogaring, o ano man na bagay na idinusay bilang balaog sa Dios pagsadiri kan templo asin dai puwedeng gamiton sa ibang katuyohan. Alagad, an totoo, an idinusay na balaog nasasaray kan tawo na nagdusay kaiyan. Sa paaging ini an sarong aki, paagi sana sa pagsabi na an saiyang kuwarta o rogaring “corban”​—sarong balaog na idinusay sa Dios o sa templo—​minadulag sa saiyang paninimbagan na tabangan an saiyang gurang nang mga magurang, na puwedeng nasa desesperadong kamugtakan.

Tama nanggad na maanggot sa maraot na pagbiribid kan mga Fariseo sa Pagboot nin Dios, si Jesus nagsabi: “Hinalean nindo nin halaga an tataramon nin Dios huli sa saindong tradisyon. Kamong mga parasaginsagin, marahay nanggad an pagkahula ni Isaias dapit sa saindo, kan sia magsabi, ‘An mga tawong ini nagtataong onra sako sa saindang mga ngabil, alagad an saindang puso harayo sako. Sayang sana na sinda nagsasamba sako, huli ta itinotokdo ninda bilang mga doktrina an mga pagboot nin mga tawo.’”

Puwedeng nagsiribog an kadaklan tanganing togotan an mga Fariseo na magkustion ki Jesus. Ngonyan, kan an mga Fariseo mayong ikasimbag sa makosog na pagsagwe sa sainda ni Jesus, inapod nia an kadaklan na rumani sa saiya. “Hinanyoga ako,” an sabi nia, “asin sabota an kahulogan. Mayo nin ano man na hale sa luwas nin tawo na minaagi sa laog nia na nakakaparamog sa tawo; alagad an mga bagay na minaluwas sa tawo an mga bagay na nagpaparamog sa tawo.”

Kan huri, paglaog ninda sa sarong harong, an saiyang mga disipulo naghapot: “Aram mo daw na an mga Fariseo nagkasiringkog kan madangog an sinabi mo?”

“An gabos na tinanom na dai itinanom kan sakong langitnon na Ama gagaboton,” an simbag ni Jesus. “Pabayae nindo sinda. Sinda mga butang parakabit. Kaya, kun an buta magkabit sa buta, pareho sinda mahoholog sa kali.”

Garo baga nabigla si Jesus kan, sa pagtaram para sa mga disipulo, si Pedro maghagad nin paglinaw manongod sa nakakaparamog sa tawo. “Kamo man mayo pa nin pakasabot?” an simbag ni Jesus. “Dai daw nindo aram na an gabos na minalaog sa ngoso minadagos sa bituka asin minaluwas sa sekretong lugar? Alagad, an mga bagay na minaluwas sa ngoso gikan sa puso, asin an mga iyan an nakakaparamog sa tawo. Halimbawa, gikan sa puso minaluwas an maraot na kaisipan, paggadan, pagsambay, pakikisaro, paghabon, pagputik, paglanghad. Ini an mga bagay na nakakaparamog sa tawo; alagad an pagkakan na dai naghugas nin mga kamot dai nakakaparamog sa tawo.”

Dai digdi dinidisganar ni Jesus an normal na kalinigan. Dai sia nangangatanosan na dai na kaipuhan na hanawan nin saro an saiyang mga kamot bago mag-andam nin kakanon o magkakan. Imbes, kinokondenar ni Jesus an pagsaginsagin kan mga namomoon sa relihiyon na tusong naghihingoa na biribidon an matanos na mga pagboot nin Dios paagi sa pag-insister nin bakong Makakasuratan na mga tradisyon. Iyo, an maraot na mga gibo an nakakaparamog sa tawo, asin ipinapaheling ni Jesus na an mga ini minagikan sa puso nin saro. Juan 7:1; Deuteronomio 16:16; Mateo 15:​1-20; Marcos 7:​1-23; Exodo 20:​12; 21:17; Isaias 29:13.

▪ Anong pagtumang ngonyan an napapaatubang ki Jesus?

▪ Anong sahot an ginibo kan mga Fariseo, pero oyon ki Jesus, paano tuyong binabalga kan mga Fariseo an Pagboot nin Dios?

▪ Ano an ihinayag ni Jesus na mga bagay na nakakaparamog sa tawo?