An Pinakadakulang Tawo na Nabuhay Kasuarin Pa Man

Kapitulo 57: Pagkaherak sa mga Nagsasakit

PAKATAPOS na idenunsiar an mga Fariseo huli sa saindang mga tradisyon na nagpapanigo sa sadiri, naghale si Jesus kaiba kan saiyang mga disipulo. Dai pa nahahaloy, puwedeng magirumdoman nindo, an saiyang pagprobar na humale sa sainda tanganing makapahingalo nin kadikit naolang kan maheling sinda kan kadaklan. Ngonyan, kaiba kan saiyang mga disipulo, naghale sia pasiring sa mga rehiyon nin Tiro asin Sidon, dakol na milya pa-amihanan. Malinaw na ini sana an pagbiyahe ni Jesus kaiba kan saiyang mga disipulo sa luwas kan mga linderos nin Israel.

Pakakua nin harong na madadagusan, ipinaaram ni Jesus na habo niang makaisi an siisay man kun haen sinda. Alagad, dawa sa teritoryong ini na bakong Israelita, naheling pa man giraray sia. Sarong babaeng Griego, na namundag digdi sa Fenicia nin Siria, nakua sia asin nagpoon na makimaherak: “Maherak ka sa sako, Kagurangnan, Aki ni David. An sakong aking babae sinasaniban nin makuri nin demonyo.” Alagad, ni sarong tataramon dai nagsimbag si Jesus.

Kan huri, an saiyang mga disipulo nagsabi ki Jesus: “Sobolan sia; huli ta sia padagos na nagkukurahaw sa hudian niato.” Sa pagpaliwanag kan saiyang dahelan sa dai pag-intindi sa saiya, si Jesus nagsabi: “Dai ako isinugo sa arin pa man kundi sa lagalag na mga karnero kan harong ni Israel.”

Minsan siring, dai suminuko an babae. Dinolok nia si Jesus asin naghuruhod sa atubangan nia. Sia nakimaherak, “Kagurangnan, tabangi ako!”

Siertong napahiro an puso ni Jesus kan odok na pakimaherak kan babae! Pero, idinoon giraray nia an saiyang enot na paninimbagan, na maglingkod sa banwaan nin Dios na Israel. Kadungan kaiyan, minalataw na tanganing baloon an saiyang pagtubod, sinambit nia an salang pagmidbid kan mga Judio sa mga tagaibang nasyon, na nangangatanosan: “Bakong maninigo na kuanon an tinapay kan mga aki asin iapon iyan sa saradit na ayam.”

Paagi sa saiyang maheherakon na tono nin boses asin ekspresyon nin lalauogon, siertong ihinayag ni Jesus an saiya mismong kabootan sa mga bakong Judio. Saiya pa nganing pinalomoy an pagkomparar kan mga Hentil sa mga ayam paagi sa pagsambit sa sainda na “saradit na ayam,” o ido. Imbes na magraot an boot, inaprobetsaran kan babae an pagsambit ni Jesus sa pagpalaenlaen kan mga Judio asin mapakumbabang nagkomento: “Iyo, Kagurangnan; alagad an totoo an saradit na ayam nagkakakan kan mga rakdag na nahoholog sa lamesa kan saindang mga kagurangnan.”

“O babae, dakula an saimong pagtubod,” an simbag ni Jesus. “Mangyari logod sa saimo siring sa saimong pinagmamawot.” Asin talagang nangyari! Pagpuli nia sa saiyang harong, inabotan nia an saiyang aking babae na nasa higdaan, na biyong naomayan.

Magpoon sa baybayon na rehiyon nin Sidon, si Jesus asin an saiyang mga disipulo nangaragi sa siudad, pasiring sa pinakagikanan kan Salog nin Jordan. Malinaw na buminalyo sinda sa Jordan sa may parteng amihanan kan Dagat nin Galilea asin luminaog sa rehiyon kan Decapolis sa sirangan kan dagat. Duman nagsakat sinda sa sarong bukid, pero nanompongan sinda kan mga kadaklan asin dinara ki Jesus an saindang mga pilay, kimay, buta, asin pula, asin dakol pang naghehelang asin may diperensia. Ibinurugtak sinda sa may pamitisan ni Jesus, asin pinaomayan nia sinda. Napangalas an mga tawo, kan saindang maheling na nagtataram an mga pula, naglalakaw an mga pilay, asin nakakaheling an mga buta; asin inomaw ninda an Dios nin Israel.

Tinawan ni Jesus nin espesyal na atension sa sarong lalaking bongog asin dai nanggad nakakataram. An mga bongog parateng madaling masopog, nangorogna sa tanga nin kadaklan. Puwedeng narisa ni Jesus an napapalaen na pagkanerbiyos kan lalaking ini. Kaya maheherakon na ibinulag sia ni Jesus sa kadaklan na dai naaaraman. Kan sinda na sanang duwa, ipinaheling ni Jesus an gigibohon nia sa saiya. Ibinugtak nia an saiyang mga moro sa mga talinga kan lalaki asin, pakalutab, dinootan an saiyang dila. Dangan, nakatangad sa langit, si Jesus huminangos nin hararom asin nagsabi: “Mabukas.” Huli kaiyan, nakabalik an pandangog kan lalaki, asin normal na siang nakakataram.

Kan ginibo ni Jesus an dakol na pagbolong na ini, an mga kadaklan nagsimbag na may pag-apresyar. Sinda nagsarabi: “Marahay an pagkagibo nia sa gabos na bagay. Ginigibo pa ngani niang makadangog an mga bongog asin makataram an dai nakakataram.” Mateo 15:​21-31; Marcos 7:​24-37.

▪ Taano ta dai tolos pinaomayan ni Jesus an aki kan babaeng Griego?

▪ Pakatapos kaidto, saen dinara ni Jesus an saiyang mga disipulo?

▪ Paano maheherakon na binolong ni Jesus an lalaking bongog na dai nanggad nakakataram?