An Pinakadakulang Tawo na Nabuhay Kasuarin Pa Man

Kapitulo 58: An Tinapay Asin an Lebadura

DARAKULANG kadaklan an nagduruman ki Jesus sa Decapolis. Dakol an hale sa harayo pasiring sa rehiyon na ini na an kadaklan mga Hentil tanganing maghinanyog sa saiya asin maomayan sa saindang mga kamatean. May dara sindang darakulang basket, o kararaw, na napagkatodan nindang gamiton sa pagdara nin mga gamit kun nagbibiyahe sa mga lugar nin Hentil.

Alagad, sa katapustapusi inapod ni Jesus an saiyang mga disipulo asin nagsabi: “Naheherak ako sa kadaklan, ta tolong aldaw na sindang nagdanay sa harani ko asin mayo sinda nin makakakan; asin kun papulion ko sinda sa saindang harong na nagugutom, panluluyahon sinda sa dalan. Sa katotoohan, an iba sa sainda harayo an pinaghalean.”

“Saen makua an siisay man digdi sa sarong puwerang lugar nin tinapay na ikakapabasog sa mga tawong ini?” an ihinapot kan mga disipulo.

Naghapot si Jesus: “Pirang tinapay igwa kamo?”

“Pito,” an simbag ninda, “asin nagkapirang saradit na sira.”

Pakapagboot sa mga tawo na magturukaw sa daga, kinua ni Jesus an mga tinapay asin sira, namibi sa Dios, binaraak iyan, asin pinonan na itao iyan sa saiyang mga disipulo. Sinda naman an nagtao sa mga tawo, na gabos nagkarakan sagkod na nagkabarasog. Pakatapos kaiyan, kan tiniripon an mga tada, may pitong napano na lalagan na basket, maski ngani nakakakan na an mga 4,000 na lalaki, siring man mga babae asin aki!

Pinaharale ni Jesus an mga kadaklan, naglunad sia sa sarong sakayan kaiba kan saiyang mga disipulo, asin nagbalyo pasiring sa solnopan na baybayon kan Dagat nin Galilea. Digdi an mga Fariseo, ngonyan kaibanan kan mga miembro nin relihiyosong sekta kan mga Saduceo, nagprobar na sugotan si Jesus paagi sa pagpakiolay sa saiya na magpaheling nin tanda hale sa langit.

Naaraman an saindang mga paghihingoa na sugotan sia, si Jesus nagsimbag: “Kun banggi na pinagkatodan na nindong sabihon, ‘Magkakaigwa nin marahay na panahon, ta an langit mapula’; asin kun aga, ‘Ngonyan magkakaigwa nin malipot, maoran na panahon, ta an langit mapula, alagad madampog.’ Tatao kamong magsabot kan itsura kan langit, alagad dai kamo nakakasabot sa mga tanda kan mga panahon.”

Huli kaiyan, inapod sinda ni Jesus na maraot asin nagsasambay na kapag-arakian asin pinatanidan sinda na, arog kan sabi nia kan nakaagi sa mga Fariseo, mayong tanda na itatao sainda apuwera sa tanda ni Jonas. Kan paghale, sia asin an saiyang mga disipulo naglunad sa sarong sakayan asin nagpasiring sa Betsaida sa amihanan na sirangan na baybayon kan Dagat nin Galilea. Kan nagbibiyahe narisa kan mga disipulo na nalingawan nindang magbalon nin tinapay, na an yaon sasaro sanang tinapay para sa sainda.

Nasa isip an pakipaghampangan pa sana nia sa mga Fariseo asin sa mga Saduceo na nagsusuportar ki Herodes, si Jesus nasadol: “Papagdanayon na muklat an saindong mga mata, magmaan sa lebadura kan mga Fariseo asin sa lebadura ni Herodes.” Malinaw na an pagkasambit sa lebadura nagpaisip sa mga disipulo na an boot sabihon ni Jesus iyo an pagkalingaw nindang magbalon nin tinapay, kaya nagpoon sindang magdiriskutiran dapit sa bagay. Narisa an saindang dai pagkasinarabotan, si Jesus nagsabi: “Tadaw ta nagpapasuruhay kamo huli sa dai nindo pagkaigwa nin tinapay?”

Dai pa sana nahahaloy, si Jesus milagrosong nagtao nin tinapay sa rinibong tawo, na ginibo an ultimong milagrong ini tibaad saro o duwa pa sanang aldaw an nakaagi. Maninigo nindang maaraman na dai sia nahahadit manongod sa kadaihan nin literal na tinapay. “Dai daw nindo nagigirumdoman” an pagirumdom nia sainda, “kan pinagputolputol ko an limang tinapay para sa limang ribong lalaki, pirang basket na pano nin mga tada an natipon nindo?”

“Kagduwa,” an simbag ninda.

“Kan pinagputolputol ko an pito para sa apat na ribong lalaki, pirang lalagan na basket na pano nin mga tada an natipon nindo?”

“Pito,” an simbag ninda.

“Dai pa daw nindo nakukua an kahulogan?” an hapot ni Jesus. “Tadaw ta dai nindo nasasabotan na dai ako nagtaram saindo manongod sa tinapay? Kundi magmaan kamo sa lebadura kan mga Fariseo asin Saduceo.”

Sa katapustapusi nakasabot an mga disipulo. An lebadura, sarong sustansia na nagpapaalsom asin nagpapausbog sa tinapay, sarong terminong ginagamit na an kahulogan karatan. Kaya nasasabotan ngonyan kan mga disipulo na si Jesus naggagamit nin simbolismo, na sia nagpapatanid sainda na mag-ingat tumang sa “katokdoan kan mga Fariseo asin Saduceo,” na an katokdoan igwa nin nakararaot na epekto. Marcos 8:​1-21; Mateo 15:​32–16:12.

▪ Taano an mga tawo ta may darang darakulang lalagan na basket?

▪ Pakahale sa Dacapolis, pasaen an pagbiyahe ni Jesus sa sakayan?

▪ Ano an dai pagkasinarabotan kan mga disipulo mapadapit sa sinabi ni Jesus manongod sa lebadura?

▪ Ano an boot sabihon ni Jesus sa mga tataramon na “lebadura kan mga Fariseo asin Saduceo”?

(Ipagpapadagos sa masunod na luwas.)