An Pinakadakulang Tawo na Nabuhay Kasuarin Pa Man

Kapitulo 59: Siisay Man Nanggad si Jesus?

KAN an sakayan na linulunadan ni Jesus asin kan saiyang mga disipulo magduong sa Betsaida, an mga tawo nagdara sa saiya nin sarong buta asin nakimaherak na duotan nia an lalaki asin paomayan sia. Kinabit ni Jesus an lalaki paluwas sa baryo asin, pakalutabi sa saiyang mga mata, naghapot: “Nakakaheling ka nin ano man?”

“Nakakaheling ako nin mga tawo,” an simbag kan lalaki, “huli ta namamasdan ko an garo mga kahoy, alagad sinda nagraralakaw.” Idinodoon an saiyang mga kamot sa mga mata kan lalaki, ibinalik ni Jesus an pagheling kaini kaya nakakaheling na ini nin malinaw. Dangan pinapuli ni Jesus an lalaki na pinagbotan na dai sia maglaog sa siudad.

Pahale na ngonyan si Jesus kaiba an saiyang mga disipulo tanganing magduman sa mga baryo nin Cesarea ni Felipe, an pinakapurong amihanan nin Palestina. Iyan sarong halawig na biyahe patukad, na minakobre nin mga 50 kilometros, pasiring sa magayon na lugar nin Cesarea ni Felipe, mga 350 metros an langkaw sa dagat. An biyahe posibleng duwang aldaw.

Mantang nasa dalan, si Jesus suminuhay na sia sana tanganing mamibi. Mga siyam o sampulo na sanang bulan an natatada bago kan saiyang kagadanan, asin nahahadit sia manongod sa saiyang mga disipulo. Dakol na an buminaya sa pagsunod sa saiya. An iba malinaw na nariribong asin nadidisganar huli ta sinayumahan nia an mga paghihingoa kan mga tawo na gibohon siang hade asin huli ta dai sia, kan angaton kan saiyang mga kaiwal, nagtao nin sarong tanda hale sa langit tanganing patunayan an saiyang pagigin hade. Ano an pagtubod kan saiyang mga apostol manongod sa kun siisay sia? Kan dumuman sinda sa lugar na pinapamibian nia, si Jesus naghapot: “Siisay daa ako an sabi kan mga kadaklan?”

“An iba nagsasabing si Juan Bautista,” an simbag ninda, “an iba si Elias, an iba pa si Jeremias o saro kan mga propeta.” Iyo, naghona an mga tawo na si Jesus saro sa mga tawong ini na ibinangon hale sa mga gadan!

“Alagad kamo, ano an sabi nindo kun siisay ako?” an hapot ni Jesus.

Si Pedro tolos na nagsimbag: “Ika an Cristo, an Aki kan nabubuhay na Dios.”

Pakapahayag nin pag-oyon sa simbag ni Pedro, si Jesus nagsabi: “Sinasabi ko sa saimo, Ika si Pedro, asin sa ibabaw kan gapong ini papatindogon ko an sakong kongregasyon, asin an mga tata nin Hades dai makakadaog kaiyan.” Digdi enot na ipinapaisi ni Jesus na mapatindog sia nin sarong kongregasyon asin na minsan an kagadanan dai makakabihag sa mga miembro kaiyan pakatapos kan saindang maimbod na pamumuhay digdi sa daga. Dangan sinabihan nia si Pedro: “Itatao ko sa saimo an mga liyabe kan kahadean kan kalangitan.”

Ihinahayag kun siring ni Jesus na si Pedro maako nin espesyal na mga pribilehiyo. Dai, si Pedro dai tinawan nin enot na lugar sa tahaw kan mga apostol, ni sia ginibong pasisikadan kan kongregasyon. Si Jesus mismo an Gapo na sa ibabaw kaiyan patitindogon an saiyang kongregasyon. Pero si Pedro tatawan nin tolong liyabe na paagi kaiyan garo baga bubuksan an mga oportunidad para sa mga grupo nin mga tawo na makalaog sa Kahadean kan kalangitan.

Gagamiton ni Pedro an enot na liyabe sa Pentecostes 33 C.E. tanganing ipaheling sa nagsosolsol na mga Judio an kaipuhan nindang gibohon tanganing maligtas. Gagamiton nia an ikaduwa pakatapos tolos kaiyan tanganing buksan sa nagtutubod na mga Samaritano an oportunidad na makalaog sa Kahadean nin Dios. Dangan, sa 36 C.E. gagamiton nia an ikatolong liyabe tanganing buksan sa dai tinuring mga Hentil, si Cornelio asin an saiyang mga katood, an iyo man sanang oportunidad.

Ipinadagos ni Jesus an saiyang pakipag-olay sa saiyang mga apostol. Pinadisganar nia sinda paagi sa pag-estorya kan dapit sa mga pagsakit asin kagadanan na madali na niang atubangon sa Jerusalem. Huli sa dai pakasabot na si Jesus bubuhayon liwat sa langitnon na buhay, isinuhay ni Pedro si Jesus: “Maherak ka sa saimong sadiri, Kagurangnan,” an sabi nia. “Dai ini mangyayari sa saimo.” Sa pagsalingoy, nagsimbag si Jesus: “Padian ka sa hudian ko, Satanas! Ika sarong singkogan sa sako, huli ta iniisip mo, bakong an mga kaisipan nin Dios, kundi an sa mga tawo.”

Malinaw na may iba pa apuwera sa mga apostol na nagbibiyahe kaiba ni Jesus, kaya pinarani nia sinda sa saiya asin ipinaliwanag na dai magigin pasil na magin saiyang parasunod. “Kun an siisay man boot na sumunod sa sako,” an sabi nia, “paindahan nia an saiyang sadiri asin pasanon an saiyang hariging pasakitan patin padagos na sumunod sa sako. Huli ta an siisay man na boot na magligtas kan saiyang kalag mawawaran kaiyan; alagad an siisay man na mawaran kan saiyang kalag huli sa sako asin sa maogmang bareta magliligtas kaiyan.”

Iyo, kun patutunayan ninda na angay sindang mag-ako kan saiyang pag-oyon, an mga parasunod ni Jesus kaipuhan na magin mapuso asin mapagsakripisyo sa sadiri. Sia nagsaysay: “Huli ta kun an siisay man ikasopog ako asin an sakong mga tataramon sa parasambay asin makasalan na kapag-arakian na ini, ikasosopog man sia kan Aki nin tawo kun sia dumatong na sa kamurawayan kan saiyang Ama kaiba an banal na mga anghel.” Marcos 8:​22-38; Mateo 16:​13-28; Lucas 9:​18-27.

▪ Taano ta nahahadit si Jesus manongod sa saiyang mga disipulo?

▪ Ano an paghona kan mga tawo manongod sa kun siisay si Jesus?

▪ Anong mga liyabe an itinao ki Pedro asin paano iyan gagamiton?

▪ Anong pagtatanos an inako ni Pedro, asin taano?