An Pinakadakulang Tawo na Nabuhay Kasuarin Pa Man

Kapitulo 60: Sarong Patanaw sa Kamurawayan kan Kahadean ni Cristo

SI Jesus nakaabot sa mga parte nin Cesarea ni Felipe, asin nagtotokdo sia sa sarong kadaklan na kabilang an saiyang mga apostol. Ginibo nia an nakakakilag na paising ini sa sainda: “Sa katotoohan ako nagsasabi saindo na igwa nin nagkapira sa mga uya digdi na sa ano man na paagi dai magnanamit nin kagadanan sagkod na dai nguna ninda maheling an Aki nin tawo na minadatong sa saiyang kahadean.”

‘Ano daw an boot sabihon ni Jesus?’ an siertong pinagparaisip kan mga disipulo. Pakalihis nin mga sarong semana, ipinag-iba ni Jesus si Pedro, Santiago, asin Juan, asin nagtukad sinda sa sarong halangkaw na bukid. Posibleng banggi iyan, huling nagtutungka an mga disipulo. Mantang namimibi si Jesus, naliwat an lalauogon nia sa atubangan ninda. An saiyang lalauogon nagpoon na sumirang siring sa aldaw, asin an saiyang mga gubing nangintab siring sa liwanag.

Dangan, may duwa, na namidbid na sinda “Moises asin Elias,” na nagtunga asin nagpoon na makipag-olay ki Jesus manongod sa saiyang ‘paghale na mangyayari sa Jerusalem.’ An paghale malinaw na napapanongod sa kagadanan asin sa kasunod na pagkabuhay liwat ni Jesus. Sa siring, an pag-orolay na ini nagpapatunay na an saiyang hamak na kagadanan bakong bagay na dapat likayan, siring sa gustong mangyari ni Pedro.

Biyo nang mata ngonyan, an mga disipulo nagmasid asin naghinanyog na may pagngalas. Minsan ngani ini sarong bisyon, iyan garo tunay na marhay kaya si Pedro nagpoon na umentra sa eksena, na an sabi: “Kagurangnan, marahay na digdi kita. Kun boot mo, matogdok ako nin tolong tolda digdi, saro saimo asin saro ki Moises asin saro ki Elias.”

Mantang nagtataram si Pedro, sarong maliwanag na panganoron an naglindong sainda, asin an sarong tingog hale sa panganoron nagsabi: “Ini an sakong Aki, an namomotan, na sakong inoyonan; maghinanyog kamo saiya.” Kan madangog an tingog, an mga disipulo nagralaob. Alagad nagsabi si Jesus: “Buhat asin dai kamo matakot.” Pagbuhat ninda, mayo na sindang naheling na siisay man apuwera ki Jesus.

Mantang palugsot sinda hale sa bukid kan suminunod na aldaw, si Jesus nagboot: “Dai nindo pagsabihon an bisyon sa kiisay man sagkod na an Aki nin tawo bangonon hale sa mga gadan.” An pagpaheling ni Elias sa bisyon nagpalataw nin sarong hapot sa isip kan mga disipulo. “Taano,” an hapot ninda, “ta nagsasabi an mga eskriba na kaipuhan na dumatong nguna si Elias?”

“Si Elias nagdatong na,” an sabi ni Jesus, “asin dai ninda sia namidbid.” Alagad, si Jesus nagtataram manongod ki Juan na Bautisador, na nag-otob sa sarong kabtang na kapareho kan ki Elias. Iinandam ni Juan an dalan para ki Cristo, siring kan ginibo ni Elias para ki Eliseo.

Nagin nakapakokosog nanggad an bisyon na ini, kapwa ki Jesus asin sa mga disipulo! An bisyon garo baga patanaw sa kamurawayan kan Kahadean ni Cristo. Garo man sana naheling kan mga disipulo “an Aki nin tawo na minadatong sa saiyang kahadean,” siring sa ipinanuga ni Jesus sarong semana bago kaiyan. Pagkagadan ni Jesus, nagsurat si Pedro manongod sa saindang ‘pagigin mga saksing nakaheling sa kamurawayan ni Cristo mantang kaiba nia sinda sa banal na bukid.’

An mga Fariseo naghagad ki Jesus nin sarong tanda tanganing patunayan na sia an saro na ipinanuga sa Kasuratan na magigin piniling Hade nin Dios. Dai sinda tinawan nin siring kaiyan na tanda. Sa ibong na kampi, an dayupot na mga disipulo ni Jesus tinogotan na maheling an transpigurasyon ni Jesus bilang pagpapatunay sa mga hula kan Kahadean. Kaya, si Pedro kan huri nagsurat: “Kaya an makahulang tataramon orog pa niatong nasierto.” Mateo 16:13, Mat 16:28–17:13; Marcos 9:​1-13; Lucas 9:​27-37; 2 Pedro 1:​16-19.

▪ Bago makanamit nin kagadanan, paano naheling nin nagkapira an pagdatong ni Cristo sa saiyang Kahadean?

▪ Sa bisyon, ano an ipinakipag-olay ni Moises asin Elias ki Jesus?

▪ Taano an bisyon na ini ta nakapakokosog nanggad na tabang sa mga disipulo?