An Pinakadakulang Tawo na Nabuhay Kasuarin Pa Man

Kapitulo 61: Naomayan an Aking Lalaki na Sinasaniban

MANTANG mayo duman si Jesus, Pedro, Santiago asin Juan, na posibleng nasa alitoktok kan Bukid nin Hermon, an ibang disipulo napaatubang sa sarong problema. Pagbalik nia, naheling tolos ni Jesus na igwa nin problema. Pinagtitiriponan nin kadaklan an saiyang mga disipulo, asin an mga eskriba nakikisuhay sa sainda. Kan maheling si Jesus, nabiglang marhay an mga tawo asin nagdaralagan tanganing taratarahon sia. “Ano an ipinakikidiskutiran nindo sainda?” an hapot nia.

Hale sa kadaklan, sarong lalaki an luminuhod sa atubangan ni Jesus asin nagpaliwanag: “Paratokdo, dinara ko saimo an sakong aking lalaki huli ta igwa sia nin dai nakakataram na espiritu; asin saen man sia atakihon kaiyan ilinalampog sia kaiyan sa daga, asin nagsasabo an saiyang ngoso asin nagraragot an saiyang mga ngipon asin nawawaran kan saiyang kosog. Asin sinabihan ko an saimong mga disipulo na paluwason iyan, alagad dai ninda kaya.”

Malinaw na inaaprobetsaran kan mga eskriba an dai pakapaomay kan mga disipulo sa aki, na puwedeng pinagtutuya an saindang mga paghihingoa. Sa delikadong oras nanggad na ini, nag-abot si Jesus. “O daing pagtubod na kapag-arakian,” an sabi nia, “sagkod noarin ako magpapadagos sa saindo? Sagkod noarin pagtitiosan ko kamo?”

Garo baga ipinanonongod ni Jesus an saiyang mga tataramon sa gabos na yaon duman, pero mayong duwa-duwa na iyan ipinapanongod partikularmente sa mga eskriba, na nagpaparibok sa saiyang mga disipulo. Sunod, nagsabi si Jesus dapit sa aki: “Daraha nindo sia sako.” Alagad pagdolok ki Jesus kan aki, an demonyo na nakasasanib sa saiya ilinampog sia sa daga asin pinakisaykisay sia nin makuri. An aki nagligid sa daga asin nagsabo an ngoso.

“Gurano na kahaloy na nangyayari ini sa saiya?” an hapot ni Jesus.

“Poon pa sa pagkaaki,” an simbag kan ama. “Paorootro na iinaapon sia [kan demonyo] kapwa sa kalayo asin sa tubig tanganing laglagon sia.” Dangan nakimaherak an ama: “Kun kaya mong gibohon an ano man, maherak ka samo asin tabangan mo kami.”

Puwedeng sa laog nin dakol na taon, an ama nagpaparahanap na nin tabang. Asin ngonyan, sa dai pakapaomay kan mga disipulo ni Jesus, dakula an saiyang pagkadesesperar. Nasasabotan an desesperadong pakiolay kan lalaki, si Jesus nakapakokosog na nagsabi: “An pananaram na iyan, ‘Kun kaya mo’! Tara, an gabos na bagay puwedeng mangyari sa saro kun an saro igwa nin pagtubod.”

“Nagtutubod ako!” an tolos na ikinurahaw kan ama, pero nakimaherak sia: “Tabangan mo ako kun saen ako nangangaipo nin pagtubod!”

Naririsa na an kadaklan nagdadaralagan pasiring sainda, tinuyaw ni Jesus an demonyo: “Ika na dai nakakataram asin bongog na espiritu, pinagbobotan taka, lumuwas ka saiya asin dai ka na maglaog pa sa saiya.” Mantang pahale an demonyo, pinakurahaw giraray kaini an aki asin pinakisaykisay sia nin dakol na beses. Dangan mayong hiro-hirong nakahigda sa daga an aki, kaya an kadaklan na tawo nagpoon na magsabi: “Gadan na sia!” Pero kinapotan ni Jesus sa kamot an aki, asin buminuhat ini.

Bago kaini, kan sugoon na maghulit an mga disipulo, sinda nagpaluwas nin mga demonyo. Kaya ngonyan, pakadagos ninda sa sarong harong, hinapot ninda si Jesus sa hilom: “Tadaw ta dai niamo napaluwas idto?”

Sa pagsabi na huli iyan sa saindang kakulangan nin pagtubod, si Jesus nagsimbag: “An klaseng ini dai nakakaluwas paagi sa ano man apuwera paagi sa pamibi.” Malinaw na kinakaipuhan an pag-andam tanganing mapaluwas an nangongorog kakosog na demonyo na kalabot sa kasong ini. Kinaipuhan an makosog na pagtubod na may kaibang pamibi na hinahagad an nagtataong kapangyarihan na tabang nin Dios.

Dangan idinagdag ni Jesus: “Sa katotoohan ako nagsasabi saindo, Kun kamo igwa nin pagtubod na siring kadakula kan pisog nin mustasa, masasabihan nindo an bukid na ini, ‘Bumalyo ka hale digdi pasiring duman,’ asin iyan mabalyo, asin mayo nin ano man na dai nindo magigibo.” Puwede nanggad na magin mapuwersa an pagtubod!

An mga kabalakidan asin kasakitan na nakakaolang sa pag-oswag sa paglilingkod ki Jehova puwedeng magin garo baga dai puwedeng mapangganahan asin dai puwedeng haleon siring sa literal na dakulang bukid. Minsan siring, ipinaheheling ni Jesus na kun pinapatalubo niato an pagtubod sa satong puso, na binabaribi iyan asin dinadagka iyan na tumubo, iyan mahiwas pasiring sa pagkamaygurang asin papangyayarihon kita na pangganahan an siring na garo-bukid na mga kabalakidan asin kasakitan. Marcos 9:​14-29; Mateo 17:​19, 20; Lucas 9:​37-43.

▪ Anong situwasyon an napaatubang ki Jesus kan magbalik sia hale sa Bukid nin Hermon?

▪ Anong pampakosog an itinao ni Jesus sa ama kan aking lalaki na sinasaniban nin demonyo?

▪ Taano ta dai nahimo kan mga disipulo na paluwason an demonyo?

▪ Ipinaheling ni Jesus na an pagtubod puwedeng magin gurano kapuwersa?