An Pinakadakulang Tawo na Nabuhay Kasuarin Pa Man

Kapitulo 63: Dugang Pang Sadol sa Pagtatanos

MIENTRAS na si Jesus asin an saiyang mga apostol nasa harong pa sa Capernaum, may saro pang pinag-orolayan apuwera sa diriskutiran kan mga apostol kun siisay an pinakadakula. Ini puwedeng nangyari man sa saindang pagbalik sa Capernaum, kan si Jesus personal na mayo duman. Si apostol Juan nagbareta: “Nakaheling kami nin sarong lalaki na nagpapaluwas nin mga demonyo sa ngaran mo asin sinaway mi sia, ta dai sia nakikiiba sa sato.”

Malinaw na an pagheling ni Juan sa mga apostol sarong esklusibo, nagkakapot nin titulong grupo nin mga parapaomay. Kaya hinohona nia na an lalaki naggigibo nin mga ngangalasan sa salang paagi huli ta bako siang kabtang kan saindang grupo.

Alagad, nagsadol si Jesus: “Dai sia nindo pagsawayon, huli ta mayo nin siisay man na magibo nin ngangalasan huli sa ngaran ko na sa panale makakapagpakaraot sa sako; huli ta an bakong tumang sa sato apabor sa sato. Huli ta an siisay man na tumao sa saindo nin sarong basong tubig na inomon sa dahelan na kamo rogaring ni Cristo, sa katotoohan sinasabi ko sa saindo, dai nanggad sia mawawaran kan balos sa saiya.”

Dai kinaipuhan sa tawong ini na personal na sumunod ki Jesus tanganing mapasakampi nia. An Kristianong kongregasyon dai pa napapatindog, kaya an dai nia pagigin kabtang kan saindang grupo dai nangahulogan na sia nasa sarong suhay na kongregasyon. An tawo talagang igwa nin pagtubod sa ngaran ni Jesus asin sa siring nagin mapanggana sa pagpaluwas nin mga demonyo. Naggigibo sia nin sarong bagay na angay na ikakokomparar sa sinabi ni Jesus na maninigong tawan nin balos. Ipinaheling ni Jesus na huli sa paggibo kaini, dai sia mawawaran kan saiyang balos.

Pero kumusta kun an lalaki nasingkog sa mga tataramon asin hiro kan mga apostol? Seryoso nanggad ini! Nagkomento si Jesus: “An siisay man na magpasingkog sa saro kan saradit na ini na nagtutubod, mas marahay pa sa saiya na bitayan sa liog nin sarong gapong gilingan arog kan pinabibirik nin asno asin itapok sia sa dagat.”

Sinabi ni Jesus na maninigong haleon kan saiyang mga parasunod sa saindang buhay an ano man na siring kahalaga sa sainda nin sarong kamot, bitis, o mata na puwedeng makapasingkog sa sainda. Mas marahay na mayo kan pinahahalagahan na bagay na ini asin lumaog sa Kahadean nin Dios kisa magdanay na igwa kaiyan asin iapon sa Gehenna (sarong naglalaad na tambak nin basura na harani sa Jerusalem), na nagsisimbolo sa daing sagkod na kalaglagan.

Nagpatanid man si Jesus: “Mag-ingat kamo na dai nindo halean nin halaga an saro kan mga saradit na ini; huli ta isinasabi ko sa saindo na an saindang mga anghel sa langit danay na nagheheling sa lalauogon kan sakong Ama na yaon sa langit.” Dangan saiyang iinilustrar an kahalagahan kan “saradit” kan iestorya nia an dapit sa sarong tawo na igwang sadiring sanggatos na karnero pero nawaran nin saro. Babayaan kan tawo an 99 tanganing hanapon an sarong nawara, an ipinaliwanag ni Jesus, asin kun makua iyan maoogma sia kaiyan nin orog kisa sa 99. “Siring man,” dangan ikinonklusyon ni Jesus, “bakong kawiliwili para sa sakong Ama na nasa langit na an saro kan saradit na ini mapahamak.”

Posibleng nasa isip an diriskutiran sa sainda man sana kan saiyang mga apostol, si Jesus nagsadol: “Magkaigwa kamo nin asin sa saindo man sana, asin papagdanayon an katoninongan sa tahaw nindo.” An matabang na mga kakanon ginigibong mas masiram paagi sa asin. Kaya, an piguratibong asin pinagigin mas madaling akoon an sinasabi nin saro. An pagkaigwa kan siring na asin makakatabang na mapadanay an katoninongan.

Pero huli sa pagkabakong sangkap nin tawo, kun beses mangyayari an seryosong pagpasuruhay. Itinao man ni Jesus an mga giya sa paghusay kaiyan. “Kun magkasala an saimong tugang,” an sabi ni Jesus, “magduman asin ihayag an saiyang kasalan na kamo sanang duwa. Kun maghinanyog sia saimo, ikinaligtas mo an saimong tugang.” Kun dai sia maghinanyog, an sadol ni Jesus, “magdara ka nin saro o duwa pa, tanganing sa ngoso nin duwa o tolong saksi mapatotoohan an lambang bagay.”

Solamente bilang ultimong remedyo, sabi ni Jesus, darahon an bagay sa “kongregasyon,” an boot sabihon, sa responsableng mga magurang kan kongregasyon na puwedeng tumao nin hudisyal na desisyon. Kun an nagkasala dai masunod sa saindang desisyon, nagkonklusyon si Jesus, “ibilang mo sia na arog kan tawo kan mga nasyon asin parasingil nin buhis.”

Sa paggibo nin siring na desisyon, kaipuhan kan mga paraataman na sumunod na marhay sa mga instruksion sa Tataramon ni Jehova. Sa siring, kun manompongan nindang may sala an indibiduwal asin angay na tawan nin padusa, an paghokom ‘ikinagapos na sa langit.’ Asin kun ‘maghubad sinda sa daga,’ an boot sabihon, makuang daing sala an saro, iyan ‘nahubadan na sa langit.’ Sa hudisyal na mga pag-orolay na iyan, sabi ni Jesus, “kun saen an duwa o tolo na nagkakatiripon sa ngaran ko, yaon ako sa tanga ninda.” Mateo 18:​6-20; Marcos 9:​38-50; Lucas 9:​49, 50.

▪ Taano ta dai kaipuhan kan kaaldawan ni Jesus na umiba sa saiya?

▪ Gurano kaseryoso an bagay na pagpasingkog sa sadit, asin paano iinilustrar ni Jesus an kahalagahan kan saradit na iyan?

▪ Ano an posibleng dahelan kan pagpakosog ni Jesus sa mga apostol na magkaigwa nin asin sa sainda mismo?

▪ Ano an kahulogan kan ‘paggapos’ asin ‘paghubad’?