An Pinakadakulang Tawo na Nabuhay Kasuarin Pa Man

Kapitulo 64: Sarong Leksion sa Pagpapatawad

SI Jesus malinaw na nasa harong pa sa Capernaum kaiba kan saiyang mga disipulo. Ipinapaliwanag nia sa sainda kun paano huhusayon an mga dai pagkakasundo sa pag-oltanan nin magturugang, kaya naghapot si Pedro: “Kagurangnan, makapirang magkakasala tumang sa sako an sakong tugang asin patatawadon ko sia?” Mantang an Judiong mga paratokdo sa relihiyon nagtotokdo nin pagpapatawad sagkod sa makatolo, posibleng ibinilang iyan ni Pedro na karahayan nanggad nin boot na magsuherir na “sagkod sa pitong beses?”

Pero sala an bilog na ideya na pagsaray nin siring na rekord. Itinanos ni Jesus si Pedro: “Sinasabi ko sa saimo, bakong, Sagkod sa pitong beses, kundi, Sagkod sa pitong polo may pitong beses.” Ipinaheheling nia na mayo nin limitasyon na maninigong ibugtak sa kun pirang beses na patatawadon ni Pedro an saiyang tugang.

Tanganing idoon sa mga disipulo an saindang obligasyon na magin mapagpatawad, isinaysay sainda ni Jesus an sarong ilustrasyon. Manongod iyan sa sarong hade na gustong makipagkuwenta sa saiyang mga oripon. Dinara sa saiya an sarong oripon na may babayadan na dakulaon na utang na 60,000,000 na denario. Mayo nin paagi na puwede niang mabayadan iyan. Kaya, siring sa paliwanag ni Jesus, ipinagboot kan hade na ipabakal sia asin an saiyang agom patin saiyang mga aki asin bayadan an utang.

Huli kaiyan an oripon luminaob sa pamitisan kan saiyang kagurangnan asin nakimaherak: “Halathalaton mo ako asin babayadan ko an gabos sa saimo.”

Napahiro nin pagkaherak sa saiya, maheherakon na kinanselar kan kagurangnan an dakulaon na utang kan oripon. Pero dai pa nahahaloy na ginibo nia iyan, an pagpadagos ni Jesus, an oripon na ini naghale asin nanompongan an sarong kapwa oripon na may utang sa saiya na 100 na denario sana. Tinakma kan lalaki sa liog an saiyang kapwa oripon asin pinonan na tilokon ini, na nagsasabi: “Bayadi an ano man na utang mo.”

Pero mayong kuwarta an kapwa oripon. Kaya naglaob sia sa pamitisan kan oripon na pinagkautangan nia, na nakikimaherak: “Halathalaton mo ako asin babayadan taka.” Bakong arog kan saiyang kagurangnan, an oripon bakong maheherakon, asin ipinabilanggo nia an saiyang kapwa oripon.

Bueno, nagpadagos si Jesus, an ibang oripon na nakaheling sa nangyari nagduman asin nag-osip sa kagurangnan. Anggot niang ipinaapod an oripon. “Maraot na oripon,” an sabi nia, “kinanselar ko an gabos na utang na idto para saimo, kan makimaherak ka sako. Bako daw na maninigo ka man na maherak sa saimong kapwa oripon, kun paanong ako naherak man sa saimo?” Napukaw sa pagkaanggot, itinao kan kagurangnan an daing pagkaherak na oripon sa mga parabilanggo sagkod na bayadan nia an saiyang gabos na utang.

Dangan nagkonklusyon si Jesus: “Siring man an gigibohon saindo kan sakong langitnon na Ama kun sa saindong puso dai kamo magpatarawadtawad.”

Kanigoan karahay na leksion sa pagpapatawad! Kun ikokomparar sa dakulang utang na kasalan na ipinatawad sa sato nin Dios, sadit nanggad an ano man na kasalan na tibaad makomitir tumang sa sato nin sarong tugang na Kristiano. Dugang pa, pinatawad kita ni Jehova Dios nin rinibong beses. Sa parate, dai ngani niato naririsa an satong mga kasalan tumang sa saiya. Kun siring, dai daw niato puwedeng patawadon nin nagkapirang beses an satong tugang, dawa kun igwa kita nin lehitimong dahelan na magreklamo? Girumdomon, siring sa itinokdo ni Jesus sa Sermon sa Bukid, ‘ipapatawad nin Dios sa sato an satong mga utang, siring na kita man nagpatawad sa mga may utang sa sato.’ Mateo 18:​21-35; 6:12; Colosas 3:13.

▪ Ano an dahelan kan paghapot ni Pedro manongod sa pagpapatawad sa saiyang tugang, asin taano ta tibaad ibinilang niang karahayan nin boot an saiyang suhestion na pagpapatawad sa saro nin pitong beses?

▪ Paano an simbag kan hade sa pakimaherak kan saiyang oripon napapalaen sa simbag kan oripon sa pakimaherak nin sarong kapwa oripon?

▪ Ano an satong manonodan sa ilustrasyon ni Jesus?

(Ipagpapadagos sa masunod na luwas.)