An Pinakadakulang Tawo na Nabuhay Kasuarin Pa Man

Kapitulo 65: Hilom na Pagbiyahe Pasiring sa Jerusalem

TIGHOLOG kaidto nin 32 C.E., asin harani na an Kapiyestahan nin mga Tabernakulo. Ikinonsentrar ni Jesus an kadaklan kan saiyang aktibidad sa Galilea poon kan Paskua nin 31 C.E., kan hingoahon siang gadanon kan mga Judio. Posibleng poon kaidto si Jesus nagsongko na sana sa Jerusalem sa pag-atender sa tolong taonan na kapiyestahan kan mga Judio.

An mga tugang ni Jesus nagsadol sa saiya ngonyan: “Maghale ka digdi asin paduman ka sa Judea.” An Jerusalem iyo an pangenot na siudad nin Judea asin an relihiyosong sentro kan bilog na nasyon. An saiyang mga tugang nangatanosan: “Mayo nin minagibo sa hilom mantang sia naghihingoang mahayag sa publiko.”

Minsan ngani si Santiago, Simon, Jose, asin Judas dai nagtutubod na an saindang matuang tugang, si Jesus, iyo talaga an Mesiyas, gusto nindang ipaheling nia an saiyang milagrosong kapangyarihan duman sa gabos na nagkakatiripon sa kapiyestahan. Alagad, si Jesus nakakaaram kan peligro. “An kinaban mayo nin dahelan na maongis sa saindo,” an sabi nia, “alagad iyan naoongis sa sako, huli ta ako nagpapatotoo manongod kaiyan na an mga gibo kaiyan maraot.” Kaya sinabihan ni Jesus an saiyang mga tugang: “Paduman kamo sa kapiyestahan; ako dai pa maduman sa kapiyestahan na ini.”

An Kapiyestahan nin mga Tabernakulo pitong aldaw na selebrasyon. Sa ikawalong aldaw iyan tinatapos paagi sa solemneng mga aktibidad. An kapiyestahan nagtatanda sa katapusan kan taon nin pag-oma asin sarong panahon nin dakulang paggayagaya asin pagpasalamat. Nagkapirang aldaw pakahale kan mga tugang ni Jesus tanganing umatender kaiba an kadaklan kan mga nagbibiyahe, sia asin an saiyang mga disipulo nagduman nin hilom, na dai nagpapaheling sa publiko. An saindang ruta maagi sa Samaria, imbes na an saro na inaagihan nin kadaklan na tawo na harani sa Salog nin Jordan.

Huling si Jesus asin an saiyang kairiba mangangaipo nin mga dadagusan sa sarong baryo nin mga Samaritano, patienot na siang nagsugo nin mga mensahero tanganing mag-andam. Alagad, an mga tawo nagsayumang gumibo nin ano man para ki Jesus pakatapos na maaraman na sia pasiring sa Jerusalem. Anggot na naghapot si Santiago asin Juan: “Kagurangnan, ano boot mo na pumahilig kami nin kalayo hale sa langit asin totongon sinda?” Sinagwe sinda ni Jesus huli sa pagsuherir nin siring na bagay, asin nagbiyahe sinda pasiring sa saro pang baryo.

Mantang naglalakaw sinda sa dalan, may sarong eskriba na nagsabi ki Jesus: “Paratokdo, ako masunod saimo saen ka man paduman.”

“An mga amid igwa nin mga lungib asin an mga gamgam nin langit igwa nin mga hapunan,” an simbag ni Jesus, “alagad an Aki nin tawo mayo man lamang nin mahihigdaan.” Ipinaliliwanag ni Jesus na an eskriba makakaeksperyensia nin kadepisilan kun sia magin Saiyang parasunod. Asin garo baga ipinaririsa na an eskriba mapalangkaw na marhay tanganing akoon an klaseng ini nin buhay.

Sa saro pang lalaki, si Jesus nagsabi: “Sumunod ka sako.”

“Togoti nguna ako na humale asin ilobong an sakong ama,” an simbag kan lalaki.

“Pabayae an mga gadan na maglobong kan saindang gadan,” an simbag ni Jesus, “alagad lumakaw ka asin magbalangibog ka kan kahadean nin Dios.” Malinaw na an ama kan lalaki dai pa nagagadan, ta kun gadan na ini, imposible na an saiyang aki yaon digdi na naghihinanyog ki Jesus. Malinaw na an aki naghahagad nin panahon na halaton an kagadanan kan saiyang ama. Bako siang andam na enoton sa saiyang buhay an Kahadean nin Dios.

Mantang naglalakaw sinda sa dalan pasiring sa Jerusalem, may saro pang lalaki na nagsabi ki Jesus: “Ako masunod saimo, Kagurangnan; alagad togoti nguna akong magpaaram sa mga nasa harong ko.”

Bilang simbag si Jesus nagsabi: “Mayo nin siisay man na nagkapot sa arado asin nagsalingoy sa mga bagay na nasa hudian na magkakanigo sa kahadean nin Dios.” An magigin mga disipulo ni Jesus kaipuhan na itorohok an saindang mga mata sa paglilingkod sa Kahadean. Kun paanong an mga kali-kali posibleng magigin tiko kun an nag-aarado dai nagdadanay na diretso an pagheling sa enotan, kaya an siisay man na nagsasalingoy sa daan na palakaw na ini nin mga bagay puwede man na masingkog sa dalan na pasiring sa buhay na daing sagkod. Juan 7:​2-10; Lucas 9:​51-62; Mateo 8:​19-22.

▪ Sairisay an mga tugang ni Jesus, asin ano an saboot ninda manongod sa saiya?

▪ Taano an mga Samaritano ta daing modo, asin ano an gustong gibohon ni Santiago asin Juan?

▪ Ano an tolong pakipag-olay ni Jesus sa dalan, asin paano nia idinoon an pangangaipo para sa mapagsakripisyo sa sadiring paglilingkod?