An Pinakadakulang Tawo na Nabuhay Kasuarin Pa Man

Kapitulo 66: Sa Kapiyestahan nin mga Tabernakulo

SI Jesus nagin bantog durante kan haros tolong taon poon kan saiyang bautismo. Dakol na ribo an nakaheling sa saiyang mga milagro, asin an mga bareta manongod sa saiyang mga aktibidad nakalakop sa bilog na nasyon. Ngonyan, mantang an mga tawo nagkakatiripon para sa Kapiyestahan nin mga Tabernakulo sa Jerusalem, hinanap ninda sia duman. “Haen an tawong iyan?” an boot nindang maaraman.

Si Jesus nagin tema nin pagpasuruhay. “Sia marahay na tawo,” an sabi nin iba. “Bako, kundi ilinalagalag nia an kadaklan,” an pag-insister nin iba. Kadakol kan siring na klase nin hiringhingan durante kan enot na mga aldaw kan kapiyestahan. Pero mayo ni saro na nagkaigwa nin kosog nin boot na magtaram sa publiko para ki Jesus. Ini sa dahelan na an mga tawo natatakot na baloson kan mga namomoon na Judio.

Kan nangangabangaan na an kapiyestahan, si Jesus nag-abot. Nagsakat sia sa templo, kun saen an mga tawo napangalas sa saiyang pambihirang abilidad sa pagtotokdo. Huling si Jesus dai noarin man nag-adal sa mga eskuwelahan nin mga rabi, may pagngalas na nag-isip an mga Judio: “Taano ta may kaaraman an tawong ini sa mga letra, mantang dai man sia nag-adal sa mga paadalan?”

“An sakong itinotokdo bako ko,” an paliwanag ni Jesus, “kundi kaidtong nagsugo sa sako. Kun an siisay man boot na gumibo kan Saiyang kabotan, makakaaram sia kan katokdoan kun baga iyan hale sa Dios o kun baga ako nagtataram nin sa sako man sana.” An katokdoan ni Jesus kaoyon na marhay kan pagboot nin Dios. Kaya, malinaw na minamawot nia an kamurawayan nin Dios, bakong an saiya man sana. “Itinao saindo ni Moises an Pagboot, bako daw?” an hapot ni Jesus. Paagi sa pagsagwe, sia nagsabi: “Mayo ni saro saindo na nagkukuyog sa Pagboot.”

“Taano ta minamawot nindong gadanon ako?” dangan naghapot si Jesus.

An mga tawong nasa kadaklan, na posibleng mga bisita sa kapiyestahan, dai nakakaaram dapit sa siring na mga paghihingoa. Dai sinda makapaniwala na an siisay man magmamawot na gadanon an siring kamakangangalas na paratokdo. Kaya nagtutubod sinda na may diperensia si Jesus na mag-isip sia kaini. “Ika igwang demonyo,” sabi ninda. “Siisay an nagmamawot na gadanon ka?”

An mga namomoon na Judio gustong gadanon si Jesus, minsan ngani tibaad dai iyan naaaraman kan kadaklan. Kan paomayan ni Jesus an sarong lalaki sa Sabbath kan nakaaging saro may kabangang taon, hiningoa kan mga namomoon na gadanon sia. Kaya ihinayag ngonyan ni Jesus an saindang pagkabakong matanos paagi sa paghapot sainda: “Kun an sarong tawo nag-aako nin pagturi sa sabbath tanganing an pagboot ni Moises dai malapas, ikinaanggot daw nindo akong marhay huli ta biyo kong pinarahay sa sabbath an salud nin sarong tawo? Ontok na kamo sa paghokom sa panluwas na itsura, kundi maghokom kamo na igwang matanos na paghokom.”

An mga nag-eerok sa Jerusalem, na nakakaaram sa situwasyon, nagsarabi ngonyan: “Ini an tawo na gusto nindang gadanon, bako daw? Asin minsan siring, helinga! sia nagtataram sa publiko, asin mayo sindang sinasabi saiya. An mga poon dai pa nakakasierto na ini iyo an Cristo, bako daw?” An mga residenteng ini sa Jerusalem nagpaliwanag kun taano ta dai sinda nagtutubod na si Jesus iyo an Cristo. “Aram niamo kun saen hale an tawong ini; alagad kun dumatong an Cristo, mayo nin makakaisi kun saen sia hale.”

Si Jesus nagsimbag: “Pareho midbid nindo ako asin aram nindo kun saen ako hale. Siring man, dai ako nagdatong sa sadiri kong kabotan, alagad an nagsugo sako totoo, asin dai nindo sia midbid. Midbid ko sia, huli ta ako sarong representante hale sa saiya, asin an Sarong iyan an nagsugo sako.” Digdi hiningoa ninda na dakopon sia, tibaad tanganing ibilanggo sia o gadanon sia. Pero dai sinda nagin mapanggana huling bako pa ini an oras na magagadan si Jesus.

Minsan siring, dakol an nagtubod ki Jesus, na talagang maninigo sainda. Tara, naglakaw sia sa ibabaw nin tubig, pinakalma an doros, pinatoninong an binabagyong kadagatan, milagrosong pinakakan an rinibo sa nagkapirang tinapay asin sira, pinaomayan an mga may helang, pinalakaw an mga pilay, binuklat an mga mata kan mga buta, pinaomayan an mga daoton, asin nagbuhay pa ngani nin mga gadan. Kaya naghapot sinda: “Kun an Cristo dumatong na, dai sia maggigibo nin orog pang tanda kisa sa ginibo kan tawong ini, bako daw?”

Kan madangog kan mga Fariseo na an kadaklan naghuhurudinghuding dapit kan mga bagay na ini, sinda asin an poon na mga saserdote nagsugo nin mga opisyal tanganing arestohon si Jesus. Juan 7:​11-32.

▪ Kasuarin si Jesus nag-abot sa kapiyestahan, asin ano an sinasabi kan mga tawo manongod sa saiya?

▪ Taano an iba ta nakapagsabing igwa nin demonyo si Jesus?

▪ Ano an pakamidbid ki Jesus kan mga nag-eerok sa Jerusalem?

▪ Taano ta dakol an nagtubod ki Jesus?