An Pinakadakulang Tawo na Nabuhay Kasuarin Pa Man
Kapitulo 67: Dai Ninda Sia Naaresto
MANTANG nagpapadagos pa an Kapiyestahan nin mga Tabernakulo, an mga namomoon sa relihiyon nagsugo nin mga opisyal nin pulisiya tanganing arestohon si Jesus. Dai sia nagprobar na magtago. Imbes, si Jesus nagpadagos na nagtotokdo sa publiko, na nagsasabi: “Kadikit na sanang panahon na ako magpapadagos sa kaibahan nindo bago ako magduman sa saiya na nagsugo sako. Hahanapon nindo ako, alagad dai nindo ako manonompongan, asin kun saen ako dai kamo makakaduman.”
An mga Judio dai nakakasabot, kaya nagpaharapothapot sinda sa sainda man sana: “Saen intension kan tawong ini na magduman, kaya dai niato sia manonompongan? Dai nia intension na magduman sa mga Judio na nagkawararak sa mga Griego asin magtokdo sa mga Griego, bako daw? Ano an boot sabihon kan kasabihan na ini na sinabi nia, ‘Hahanapon nindo ako, alagad dai nindo ako manonompongan, asin kun saen ako dai kamo makakaduman’?” Siyempre, si Jesus nagtataram dapit sa saiyang nagdadangadang na kagadanan asin pagkabuhay liwat sa buhay sa langit, kun saen dai sia masusundan kan saiyang mga kaiwal.
Uminabot an ikapito asin ultimong aldaw kan kapiyestahan. Kada aga kan kapiyestahan, sarong saserdote an nagbububo nin tubig, na sinakdo nia sa Tangke nin Siloam, kaya iyan nagbobolos pasiring sa ibaba kan altar. Posibleng pinagigirumdom an mga tawo dapit sa aroaldaw na seremonyang ini, si Jesus nagkurahaw: “Kun an siisay man napapaha, pumadigdi sia sa sako asin uminom. An minatubod sa sako, siring sa sinabi kan Kasuratan, ‘Hale sa kairairaromi niang kabtang magbobolos an mga salog nin tubig na buhay.’”
Aktuwalmente, si Jesus nagtataram digdi manongod sa dakulang mga mangyayari kun ibubo na an banal na espiritu. Kan suminunod na taon an pagbubong ini kan banal na espiritu nangyari kan Pentecostes. Duman, buminolos an mga salog nin tubig na buhay kan an 120 disipulo magpoon na maglingkod sa mga tawo. Alagad sagkod kan panahon na iyan, mayo pa nin espiritu sa sentido na mayo ni saro sa mga disipulo ni Jesus na linahidan nin banal na espiritu asin inapod pasiring sa langitnon na buhay.
Bilang reaksion sa pagtotokdo ni Jesus, an iba nagpoon na magsabi: “Sierto nanggad na iyo ini An Propeta,” na malinaw na ipinanonongod sa propeta na mas dakula kisa ki Moises na ipinanugang madatong. An iba nagsasabi: “Ini iyo an Cristo.” Pero an iba kuminontra: “An Cristo dai man maluwas sa Galilea, ano? Bako daw na sinabi kan Kasuratan na an Cristo madatong hale sa banhi ni David, asin hale sa Betlehem an baryo na dating iniistaran ni David?”
Kaya nangyari an pagkabaranga sa tahaw kan kadaklan. An iba gustong maaresto si Jesus, pero mayo ni saro na duminakop saiya. Kan bumalik an mga opisyal nin pulisiya na dai dara si Jesus, an poon na mga saserdote asin mga Fariseo naghapot: “Taano ta dai nindo sia dinara?”
“Dai pa nin ibang tawo na nagtaram nin arog kaini,” an simbag kan mga opisyal.
Pano nin kaanggotan, an mga namomon sa relihiyon guminamit nin pag-olog-olog, pagmisrepresentar, asin panlilibak. Sinda nanuya: “Ano nadaya man kamo? Mayo ni saro sa mga poon o mga Fariseo na nagtubod sa saiya, bako daw? Alagad an kadaklan na ini na dai tatao kan Pagboot mga tawong sinumpaan.”
Ngonyan, si Nicodemo, sarong Fariseo asin poon kan mga Judio (an boot sabihon, sarong miembro kan Sanhedrin), nangahas na magtaram para ki Jesus. Puwedeng magirumdoman nindo na kan nakaaging duwa may kabangang taon, si Nicodemo nagduman ki Jesus sa banggi asin nagpahayag nin pagtubod sa saiya. Ngonyan si Nicodemo nagsabi: “An satong pagboot dai naghuhusgar sa sarong tawo kun dai nguna iyan madangog gikan sa saiya asin maaraman kun ano an saiyang ginigibo, bako daw?”
Orog na naanggot an mga Fariseo na an saro sa kaiba ninda idipensa si Jesus. “Bako ka man taga-Galilea, bako daw?” an prangkang sinabi ninda. “Pagsiyasat asin helinga na mayong propeta na maluwas sa Galilea.”
Minsan ngani an Kasuratan dai direktang nagsasabi na may sarong propeta na maluwas hale sa Galilea, saindang itinotokdo na an Cristo maluwas hale dian, na nagsasabi na an “dakulang liwanag” maheheling sa rehiyon na ini. Saro pa, si Jesus namundag sa Betlehem, asin saro siang aki ni David. Minsan ngani puwedeng aram ini kan mga Fariseo, sinda an posibleng may paninimbagan sa pagpalakop nin salang pakamidbid kan mga tawo manongod ki Jesus. Juan 7:32-52; Isaias 9:1, 2; Mateo 4:13-17.
▪ Ano an nangyayari kada aga sa kapiyestahan, asin paano si Jesus puwedeng nag-aapod nin atension digdi?
▪ Taano si Jesus ta dai naaresto kan mga opisyal, asin ano an nagin reaksion kan mga namomoon sa relihiyon?
▪ Siisay si Nicodemo, ano an saiyang kaisipan manongod ki Jesus, asin paano sia trinatar kan saiyang mga kapwa Fariseo?
▪ Ano an ebidensia na an Cristo maluwas hale sa Galilea?