An Pinakadakulang Tawo na Nabuhay Kasuarin Pa Man
Kapitulo 109: Idinenunsiar ni Jesus an mga Nagtutumang sa Saiya
Napasopog na marhay ki Jesus an relihiyosong mga nagtutumang sa saiya kaya natakot na sindang maghapot pa nin ano man saiya. Kaya sia na mismo an nag-enot na ibuyagyag an saindang pagkaignorante. “Ano an paghona nindo sa Cristo?” an hapot nia. “Kiisay siang aki?”
“Ki David,” an simbag kan mga Fariseo.
Minsan ngani dai pinapaindahan ni Jesus na si David an apoon sa laman kan Cristo, o Mesiyas, sia naghapot: “Kun siring, taano ta paagi sa pasabong [sa Salmo 110] inaapod sia ni David na ‘Kagurangnan,’ na nagsasabi, ‘Si Jehova nagsabi sa sakong Kagurangnan: “Tumukaw ka sa too ko sagkod na ibugtak ko an saimong mga kaiwal sa irarom kan saimong mga bitis”’? Kun siring, kun inaapod sia ni David na ‘Kagurangnan,’ paano na sia aki nia?”
Daing girong an mga Fariseo, huli ta dai sinda tatao kun siisay man nanggad an Cristo, o linahidan na saro. An Mesiyas bako sanang tawong gikan ni David, siring kan malinaw na paniniwala kan mga Fariseo, kundi sia nabuhay na sa langit asin mas halangkaw ki, o Kagurangnan ni, David.
Kinakaolay ngonyan an mga kadaklan asin an saiyang mga disipulo, si Jesus nagpatanid dapit sa mga eskriba asin Fariseo. Mantang itinotokdo kan mga ini an Pagboot nin Dios, na “nagturukaw sa tukawan ni Moises,” si Jesus nagsadol: “An gabos na bagay na isinasabi ninda sa saindo, giboha asin kuyoga nindo.” Alagad idinagdag nia: “Dai nindo arogon an saindang mga ginigibo, huli ta sinda nagtataram alagad dai naggigibo.”
Sinda mga parasaginsagin, asin idinenunsiar sinda ni Jesus sa kaagid nanggad na tataramon na ginamit nia mantang nagkakakan sa harong nin sarong Fariseo mga bulan na an nakaagi. “An gabos nindang gibo,” an sabi nia, “ginigibo ninda sa pagpaheling sa mga tawo.” Asin sia nagtao nin mga halimbawa, na nagsasabi:
“Pinapahalakbang ninda an may laog na kasuratan na mga lalagan na saindang isinusulot bilang mga proteksion.” An sadit na mga lalagan na ini, na isinusulot sa angog o sa takyag, igwa kan apat na kabtang kan Pagboot: Exodo 13:1-10, 11-16; asin Deuteronomio 6:4-9; 11:13-21. Alagad an mga lalagan na ini pinadadakula kan mga Fariseo tanganing magsagin na sinda may kaigotan manongod sa Pagboot.
Nagpadagos si Jesus sa pagsabi na saindang “pinapadakula an mga kabingkabing kan saindang mga gubing.” Sa Bilang 15:38-40 an mga Israelita pinagbotan na gibohan nin mga kabingkabing an saindang mga gubing, alagad mas pinadakula kan mga Fariseo an saindang kabingkabing kisa sa kiisay pa man. An gabos ginigibo sa pagpasale! “Boot ninda an pinakaprominenteng lugar,” an ipinahayag ni Jesus.
Makamomondo, an saiya mismong mga disipulo naapektaran kan pagmawot na ini na magin prominente. Kaya sia naghatol: “Alagad kamo, dai kamo magpaapod nin Rabi, huling saro an saindong paratokdo, mantang kamo gabos magturugang. Siring man, dai kamo mag-apod nin ama sa kiisay man sa daga, nin huli ta saro an saindong Ama, an langitnon na Saro. Dai man kamo magpaapod na ‘mga poon,’ huli ta an saindong Poon saro, an Cristo.” Dapat na isikwal kan mga disipulo an pagmawot na magin numero uno! “An pinakadakula saindo kaipuhan na iyo an saindong paralingkod,” an sadol ni Jesus.
Dangan nagpahayag sia nin sunod-sunod na kasakitan sa mga eskriba asin Fariseo, na paorootrong inaapod sindang parasaginsagin. ‘Pinipintoan ninda an kahadean kan kalangitan sa mga tawo,’ an sabi nia, asin “sinda an mga nagsasamsam sa mga harong kan mga balo asin huli sa sarong sarahotan namimibi nin haralawig na pamibi.”
“Herak man sa saindo, butang mga parakabit,” an sabi ni Jesus. Kinondenar nia an kadaihan nin espirituwal na mga pamantayan kan mga Fariseo, na maheheling sa kapritsosong pagpapalaen na saindang ginigibo. Halimbawa, sinda nagsasabi, ‘Mayong ano man kun an siisay man ipanumpa an templo, alagad an saro nasa irarom nin obligasyon kun ipanumpa nia an bulawan sa templo.’ Paagi sa saindang orog na pagdodoon sa bulawan kan templo kisa sa espirituwal na halaga kan lugar na iyan nin pagsamba, ihinahayag ninda an saindang pagkabuta sa moral.
Dangan, arog kan saiyang ginibo kaidto, kinondenar ni Jesus an mga Fariseo huli sa dai pag-intindi sa “mas magabat na mga bagay kan Pagboot, an hustisya asin pagkaherak patin kaimbodan” mantang tinatawan nin dakulang atension an pagbayad nin tinagba, o ikasampulong kabtang, nin bakong mahalagang mga tinanom.
Inapod ni Jesus an mga Fariseo na “butang mga parakabit, na sinasara an noknok alagad hinahalon an kamelyo!” Sinasara ninda an noknok sa saindang arak bako sanang huli ta insekto iyan kundi huli ta maati iyan sa seremonyal na paagi. Pero, an pagpalimanliman ninda sa mas magabat na mga bagay kan Pagboot ikakokomparar sa paghalon nin kamelyo, maati man na hayop sa seremonyal na paagi. Mateo 22:41–23:24; Marcos 12:35-40; Lucas 20:41-47; Levitico 11:4, 21-24.
▪ Taano ta daing girong an mga Fariseo kan hapoton sinda ni Jesus manongod kan sinabi ni David sa Salmo 110?
▪ Taano ta pinadadakula kan mga Fariseo an saindang may laog na Kasuratan na mga lalagan asin an mga kabingkabing sa saindang mga gubing?
▪ Anong hatol an itinao ni Jesus sa saiyang mga disipulo?
▪ Anong kapritsosong mga pagpapalaen an ginibo kan mga Fariseo, asin paano sinda kinondenar ni Jesus huli sa dai pag-intindi sa mas magabat na mga bagay?