An Pinakadakulang Tawo na Nabuhay Kasuarin Pa Man

Kapitulo 108: Dai Ninda Nasiod si Jesus

Huling nagtotokdo si Jesus sa templo asin nagsaysay pa sana nin tolong ilustrasyon sa saiyang relihiyosong mga kaiwal na nagbuyagyag kan saindang karatan, naanggot an mga Fariseo asin nagpaharatolhatol na siodon sia sa pagsabi nin sarong bagay na magigin dahelan na sia ikapaaresto ninda. Naggibo sinda nin sarong plano asin isinugo an mga disipulo ninda, kaiba an mga parasunod sa partido ni Herodes, tanganing hingoahon na mapasala sia.

“Paratokdo,” an sabi kan mga tawong ini, “aram mi na ika sadiosan asin nagtotokdo kan dalan nin Dios sa katotoohan, asin dai ka nakikilabot sa kiisay man, huli ta dai mo pinagheheling an panluwas na itsura nin mga tawo. Kaya, sabihi kami, Ano sa paghona mo? Sono daw sa katogonan na magbayad nin buhis ki Cesar o bako?”

Si Jesus dai nadaya kan putik na pag-omaw. Narerealisar nia na kun sabihon niang, ‘Dai, bakong sono sa katogonan o bakong tama na magbayad kan buhis na ini,’ magkakasala sia nin pagrebelde tumang sa Roma. Pero, kun sabihon niang, ‘Iyo, maninigo kamong magbayad kan buhis na ini,’ an mga Judio, na ikinasusuya an pagsakop sa sainda kan Roma, maoongis sa saiya. Kaya sia nagsimbag: “Taano ta binabalo nindo ako, mga parasaginsagin? Pahelingan nindo sako an pirak na sa buhis.”

Kan sia darahan ninda nin saro, sia naghapot: “Kiisay na ladawan asin inskripsion ini?”

“Ki Cesar,” an simbag ninda.

“Kaya itao ki Cesar an mga bagay na ki Cesar, alagad sa Dios an mga bagay na sa Dios.” Bueno, kan madangog kan mga tawong ini an mahusay na simbag ni Jesus, sinda nagngalas. Asin sinda naghale asin pinabayaan sia.

Kan maheling an mga Fariseo na daing nakuang ano man na ikakasahot tumang ki Jesus, an mga Saduceo, na nagsasabing mayong pagkabuhay liwat, nagdolok sa saiya asin naghapot: “Paratokdo, si Moises nagsabi, ‘Kun an siisay man na lalaki magadan na dai nagkaigwa nin mga aki, kukuanon bilang agom kan saiyang tugang na lalaki an agom nia asin magbubuhay nin mga aki para sa saiyang tugang.’ Ngonyan igwa sa samo nin pitong magturugang na lalaki; asin an enot nag-agom asin nagadan, asin, sa dai pagkaigwa nin aki, iwinalat nia an saiyang agom sa saiyang tugang na lalaki. Siring man an nangyari sa ikaduwa asin sa ikatolo, sagkod sa gabos na pito. Sa katapustapusi nagadan an babae. Huli kaini, sa pagkabuhay liwat, kiisay sa pito sia magigin agom? Huli ta sia naagom ninda gabos.”

Bilang simbag nagsabi si Jesus: “Bako daw dahel kaini na kamo nasasala, an dai nindo pakaaram kan Kasuratan o kan kapangyarihan man nin Dios? Huli ta kun sinda magbangon na hale sa mga gadan, an mga lalaki dai na maaragom ni ipapaaragom an mga babae, kundi siring sa mga anghel sa kalangitan. Alagad mapadapit sa mga gadan, na sinda ibinabangon, dai daw nindo nabasa sa libro ni Moises, sa kasaysayan dapit sa kilitis, kun paanong an Dios nagsabi sa saiya, ‘Ako an Dios ni Abraham asin Dios ni Isaac patin Dios ni Jacob’? Sia Dios, bakong kan mga gadan, kundi kan mga nabubuhay. Kamo nasasalang marhay.”

Sa giraray nagngalas an mga kadaklan sa simbag ni Jesus. Pati an nagkapirang eskriba nag-ako: “Paratokdo, mahusay an pagkataram mo.”

Kan maheling kan mga Fariseo na napasilensio ni Jesus an mga Saduceo, nagdolok sinda sa saiya sa sarong grupo. Tanganing baloon pa sia, an sarong kaiba nindang eskriba naghapot: “Paratokdo, arin an pinakadakulang togon sa Pagboot?”

Si Jesus nagsimbag: “An enot, ‘Dangoga, O Israel, si Jehova na satong Dios sarong Jehova, asin kamotan mo si Jehova na saimong Dios sa bilog mong puso asin sa bilog mong kalag asin sa bilog mong isip patin sa bilog mong kosog.’ An ikaduwa iyo ini, ‘Kamotan mo an saimong kataed siring sa saimo man sana.’ Mayo na nin ibang pagboot na orog kaini.” An totoo, idinugang pa ni Jesus: “Sa duwang pagboot na ini nasasarig an bilog na Pagboot, asin an Mga Propeta.”

“Paratokdo, mahusay an pagkasabi mo kaoyon sa katotoohan,” an pag-oyon kan eskriba. “‘Sia Saro sana, asin mayo nang iba apuwera sa Saiya’; asin an pagkamoot na ini sa saiya sa bilog na puso asin sa bilog na pakasabot asin sa bilog na kosog asin an pagkamoot na ini sa kataed nin siring sa sadiri orog na mahalaga kisa gabos na dolot na tinotong asin atang.”

Nasasabotan na an eskriba nagsimbag na may kadonongan, sinabihan sia ni Jesus: “Bako kang harayo sa kahadean nin Dios.”

Tolong aldaw na ngonyan​—Domingo, Lunes, asin Martes—​na si Jesus nagtotokdo sa templo. An mga tawo nawiling maghinanyog sa saiya, minsan siring gusto siang gadanon kan mga namomoon sa relihiyon, alagad nasudya an saindang mga pagprobar. Mateo 22:​15-40; Marcos 12:​13-34; Lucas 20:​20-40.

▪ Anong plano an ginibo kan mga Fariseo tanganing siodon si Jesus, asin ano an ibubunga kun magsimbag sia nin iyo o dai?

▪ Paano sinudya ni Jesus an mga pagprobar kan mga Saduceo na siodon sia?

▪ Ano pang pagprobar an ginibo kan mga Fariseo tanganing baloon si Jesus, asin ano an resulta?

▪ Durante kan saiyang ultimong ministeryo sa Jerusalem, pirang aldaw si Jesus nagtokdo sa templo, asin may anong epekto?