An Pinakadakulang Tawo na Nabuhay Kasuarin Pa Man

Kapitulo 107: An Ilustrasyon Dapit sa Punsion sa Kasal

Paagi sa duwang ilustrasyon, ibinuyagyag ni Jesus an mga eskriba asin mga poon na saserdote, asin boot nindang gadanon sia. Alagad si Jesus dai pa nanggad tapos sa sasabihon sa sainda. Nagpadagos sia sa pagsabi sa sainda nin saro pang ilustrasyon, na nagsasabi:

“An kahadean kan kalangitan nakakaagid sa sarong tawo, sarong hade, na nag-andam nin punsion sa kasal para sa saiyang aking lalaki. Asin isinugo nia an saiyang mga oripon tanganing apodon an mga imbitado sa punsion sa kasal, alagad ta harabo sindang magduman.”

Si Jehova Dios an Hade na nag-andam nin punsion sa kasal para sa saiyang Aki, si Jesu-Cristo. Pag-abot nin panahon, an nobya na 144,000 na linahidan na mga parasunod makakasaro ni Jesus sa langit. An mga sakop kan Hade iyo an mga taga-Israel, na, kan darahon sa tipan nin Pagboot kan 1513 B.C.E., nag-ako kan oportunidad na magin “kahadean nin mga saserdote.” Kaya, sa pangyayaring idto, sinda an orihinal na pinaabotan kan imbitasyon sa punsion sa kasal.

Minsan siring, an enot na pag-apod sa mga inimbitaran nagpoon kaidto sanang tigholog nin 29 C.E., kan ponan ni Jesus asin kan saiyang mga disipulo (an mga oripon kan hade) an saindang gibohon na paghuhulit kan Kahadean. Alagad an mga Israelita sa laman na nakaako kan pag-apod na ini na ipinaabot kan mga oripon poon kan 29 C.E. sagkod kan 33 C.E. habong umatender. Kaya an nasyon nin mga imbitado tinawan nin Dios nin saro pang oportunidad, siring sa isinaysay ni Jesus:

“Sa giraray sia nagsugo nin ibang mga oripon, na an sabi, ‘Sabihan nindo an mga imbitado: “Uya! inandam ko na an sakong pagkakan, an sakong mga baka asin mga pinatabang hayop binorono na, asin andam na an gabos. Madia kamo sa punsion sa kasal.”’” An ikaduwa asin ultimong pag-apod na ini sa mga imbitado nagpoon kan Pentecostes 33 C.E., kan an banal na espiritu ibubo sa mga parasunod ni Jesus. An pag-apod na ini nagpadagos sagkod kan 36 C.E.

Minsan siring, an pag-apod na ini sinayumahan man kan dakulang mayoriya kan mga Israelita. “Sa dai pag-intindi sinda nagpadagos sa saindang lakaw,” an sabi ni Jesus, “an saro sa saiyang oma, an saro man sa saiyang negosyo; alagad an iba, sa pagdakop sa saiyang mga oripon, pinagringisan sinda asin ginaradan sinda.” “Alagad,” an pagpadagos ni Jesus, “an hade naanggot, asin isinugo an saiyang mga hukbo asin ginaradan idtong mga paragadan patin sinolo an saindang siudad.” Nangyari ini kan 70 C.E., kan an Jerusalem gabaon kan mga Romano, asin ginadan an mga paragadan na idto.

Dangan ipinaliwanag ni Jesus an mientras tantong nangyari: “Dangan sinabihan [kan hade] an saiyang mga oripon, ‘An punsion sa kasal andam na, alagad an mga imbitado bakong maninigo. Kun siring paduman kamo sa mga dalan na paluwas sa siudad, asin an siisay man na saindong manompongan imbitaran nindo sa punsion sa kasal.’” Ginibo ini kan mga oripon, asin “an kuwarto para sa pagkasal napano kan mga nagsasandig sa lamesa.”

An pagtipon na ini sa mga bisita hale mga dalan sa luwas kan siudad kan mga imbitado nagpoon kan 36 C.E. An Romanong opisyal sa hukbo na si Cornelio asin an saiyang pamilya iyo an enot sa mga tinipon na dai tinuring bakong Judio. An pagtipon sa bakong mga Judiong ini, na gabos pansalihid sa mga enot na nagsayuma sa pag-apod, nagpadagos sagkod sa ika-20 siglo.

Durante kan ika-20 siglo na napano an kuwarto sa pagkasal. Isinaysay ni Jesus an nangyari sa panahon na iyan, na an sabi: “Kan an hade maglaog sa pagheling sa mga bisita naheling nia duman an sarong tawo na dai nagsulot nin gubing sa kinasal. Kaya sia nagsabi sa saiya, ‘Katood, paano ka nakalaog digdi na mayo ka nin gubing sa kinasal?’ Sia dai nakagirong. Dangan an hade nagsabi sa saiyang mga lingkod, ‘Gaposa sia nindo sa kamot asin bitis asin tapokan sia nindo sa kadikloman sa luwas. Duman sia mananangis asin magraragot an saiyang mga ngipon.’”

An tawo na daing sulot na gubing sa kinasal naglaladawan sa palsipikadong mga Kristiano nin Kakristianohan. An mga ini nungkang minidbid nin Dios na igwang tamang midbidan bilang espirituwal na mga Israelita. Nungka sindang linahidan nin Dios nin banal na espiritu bilang mga paramana kan Kahadean. Kaya iinapon sinda sa kadikloman sa luwas kun saen maagi sinda nin kalaglagan.

Tinapos ni Jesus an saiyang ilustrasyon paagi sa pagsabi: “Huli ta kadakol kan inimbitaran, alagad kakadikit kan pinili.” Iyo, dakol an inimbitaran sa nasyon nin Israel na magin mga miembro kan nobya ni Cristo, alagad kakadikit sanang Israelita sa laman an pinili. An kadaklan sa 144,000 na bisita na nag-ako kan langitnon na balos bakong mga Israelita. Mateo 22:​1-14; Exodo 19:​1-6; Kapahayagan 14:​1-3.

▪ Sairisay an enot na mga inimbitaran sa punsion sa kasal, asin kasuarin ipinaabot sa sainda an imbitasyon?

▪ Kasuarin an pag-apod enot na nakaabot sa mga imbitado, asin sairisay an mga oripon na ginamit sa pagpaabot kaiyan?

▪ Kasuarin ipinaabot an ikaduwang pag-apod, asin sairisay an naimbitaran pakatapos kaiyan?

▪ Sairisay an ilinaladawan kan tawo na daing sulot na gubing sa kinasal?

▪ Sairisay an kadakol na inapod, asin an kakadikit na pinili?