An Pinakadakulang Tawo na Nabuhay Kasuarin Pa Man

Kapitulo 106: Ibinuyagyag Paagi sa mga Ilustrasyon Dapit sa Ubasan

Nasa templo si Jesus. Bago pa sana niang sopogon an mga namomoon sa relihiyon na boot na maaraman kun paagi kiisay na kapangyarihan na ginigibo nia an mga bagay. Bago sinda naulian sa saindang pagkaribaraw, si Jesus naghapot: “Ano sa paghona nindo?” Dangan paagi sa sarong ilustrasyon, ipinaheling nia sainda kun ano man nanggad na klase nin tawo sinda.

“An sarong lalaki igwa nin duwang aki,” an pagsaysay ni Jesus. “Sa pagduman sa enot, sia nagsabi, ‘Aki ko, paduman asin magtrabaho ka ngonyan sa ubasan.’ Sa pagsimbag nagsabi ini, ‘Maduman po ako,’ pero dai sia nagduman. Sa pagdolok sa ikaduwa, pareho an sinabi nia. Sa pagsimbag nagsabi ini, ‘Dai ako maduman.’ Pakatapos nagsolsol sia asin duminuman. Arin sa duwa an naggibo kan kabotan kan saiyang ama?” an hapot ni Jesus.

“An ikaduwa,” an simbag kan mga nagtutumang sa saiya.

Kaya si Jesus nagpaliwanag: “Sa katotoohan sinasabi ko saindo na an mga parasingil nin buhis asin an mga patotot maeenot sa saindo sa kahadean nin Dios.” An mga parasingil nin buhis asin an mga patotot garo man sana kan primero nagsayumang maglingkod sa Dios. Minsan siring, arog kan ikaduwang aki, sinda nagsolsol asin talagang naglingkod sa saiya. Sa ibong na kampi, an mga namomoon sa relihiyon, arog kan enot na aki, naghingakong naglilingkod sa Dios, pero, siring kan sabi ni Jesus: “Si Juan [na Bautisador] nagdatong sa saindo paagi sa katanosan, alagad dai kamo nagtubod sa saiya. Minsan siring, an mga parasingil nin buhis asin an mga patotot nagtubod sa saiya, asin kamo, minsan ngani naheling nindo ini, dai nagsolsol pakatapos kaiyan tanganing magtubod sa saiya.”

Dangan ipinaheling ni Jesus na an pagkukulang kan mga namomoon na idto sa relihiyon bako sanang sa pagpabayang maglingkod sa Dios. Dai, kundi sinda totoong biko, maraot na mga tawo. “Igwa nin sarong tawo, sarong kagharong,” an pagsaysay ni Jesus, “na nagtanom nin sarong ubasan asin kinudalan iyan sa palibot asin nagkotkot nin ligisan duman patin nagtogdok nin sarong bantayan, asin pinaarkilahan nia idto sa mga paralate, patin nagduman sa ibang daga. Kan dumatong na an panahon nin tigbungahan, isinugo nia an saiyang mga oripon sa mga paralate tanganing kuanon an saiyang mga bunga. Minsan siring, pinorogol kan mga paralate an saiyang mga oripon, asin an saro saindang hinampak, an saro man ginadan ninda, asin an saro pa ginapo ninda. Nagsugo giraray sia nin iba pang mga oripon, na labi pa kan sa enot, alagad ta iyo man giraray an ginibo ninda sa mga ini.”

An “mga oripon” iyo an mga propeta na isinugo kan “kagharong,” si Jehova Dios, sa “mga paralate” kan saiyang “ubasan.” An mga paralateng ini iyo an pangenot na mga representante kan nasyon nin Israel, an nasyon na ipinamimidbid kan Biblia bilang “ubasan” nin Dios.

Mantang minaltrato asin ginadan kan “mga paralate” an “mga oripon,” si Jesus nagpaliwanag: “Sa kahurihurihi isinugo [kan kagsadiri kan ubasan] an saiyang aki sa sainda, na an sabi, ‘Igagalang ninda an sakong aki.’ Kan maheling an aki an mga paralate nagsarabi sa sainda man sana, ‘Iyo ini an paramana; madia kamo, gadanon niato sia asin kuanon niato an saiyang mana!’ Kaya pinogolan sia ninda asin ilinuwas sia sa ubasan asin ginadan sia.”

Ngonyan, kinakaolay an mga namomoon sa relihiyon, si Jesus naghapot: “Kun dumatong na an kagsadiri kan ubasan, ano an gigibohon nia sa mga paralateng idto?”

“Huli ta sinda maraot,” an simbag kan mga namomoon sa relihiyon, “mapaabot sia nin maraot na kalaglagan sa sainda asin paaarkilahan an ubasan sa ibang mga paralate, na matao saiya kan mga bunga kun kapanahonan na kaiyan.”

Sa siring mayong pagkaaram na sinda nagpahayag nin paghokom sa sainda man sana, huling kabale sinda sa Israelitang “mga paralate” sa nasyonal na “ubasan” ni Jehova na Israel. An bungang linalaoman ni Jehova sa siring na mga paralate iyo an pagtubod sa saiyang Aki, an tunay na Mesiyas. Huli sa dai ninda pakatao nin siring na bunga, si Jesus nagpatanid: “Dai pa daw nindo nabasa sa Kasuratan [sa Salmo 118:​22, 23], ‘An gapo na isinikwal kan mga paratogdok iyo an nagin pamayohan na gapo kan anggulo. Gikan ki Jehova na ini nangyari, asin iyan makangangalas sa satong mga mata’? Kaya ngani ako nagsasabi saindo, An kahadean nin Dios hahaleon sa saindo asin itatao sa nasyon na nagpapaluwas kan mga bunga kaiyan. Saro pa, an tawo na maholog sa gapong ini magkakabaraak. Kun dapit sa siisay man na mahologan kaiyan, roronoton sia kaiyan na siring sa kabokabo.”

Narisa ngonyan kan mga eskriba asin mga poon na saserdote na si Jesus nagtataram dapit sa sainda, asin boot nindang gadanon sia, an may katanosan na “paramana.” Kaya an pribilehiyo na magin mga hade sa Kahadean nin Dios hahaleon sa sainda bilang sarong nasyon, asin sarong bagong nasyon nin ‘mga paralate sa ubasan’ an lalalangon, saro na magpapaluwas nin marahay na mga bunga.

Huling an mga namomoon sa relihiyon natatakot sa kadaklan, na ibinibilang si Jesus na propeta, dai ninda hiningoa na gadanon sia sa okasyon na ini. Mateo 21:​28-46; Marcos 12:​1-12; Lucas 20:​9-19; Isaias 5:​1-7.

▪ Siisay an irinirepresentar kan duwang aki sa enot na ilustrasyon ni Jesus?

▪ Sa ikaduwang ilustrasyon, siisay an irinirepresentar kan “kagharong,” kan “ubasan,” kan “mga paralate,” kan “mga oripon,” asin kan “paramana”?

▪ Ano an mangyayari sa ‘mga paralate sa ubasan,’ asin siisay an masalida sa sainda?