Pagpaogma sa Saindong Buhay Pampamilya
Kasumpay kan Kapitulo 13: An Nahuhuring mga Taon
Maogma sa Paggibo nin mga Bagay Para sa Iba
12. (a) Kun may sadiri nang pamilya an mga aki ninda, paano maparararom nin mga magurang an saindang pagkaminootan? (b) Ano pa an magigibo ninda tanganing magin orog na makahulogan an saindang buhay?
12 Kita gabos may pangangaipong makamate na an satong buhay may pakinabang, na iyan may kahulogan. An pagpanigo sa pangangaipong ini mahalaga sa saindo mismong ikararahay. Apuera sa saindong mga aki, kadakol pa kan iba na sa saindang buhay makatatabang kamo na mapanigoan an sarong pangangaipo. Kumusta an agom nindo mismo? Kan nagdadakula an saindong mga aki, an kadaklan sa saindong atension itinao sa sainda. Ngonyan may oportunidad na kamo na gumibo nin mas dakol na personal na bagay para sa lambang saro. Puede ining makatabang na rumarom an saindong relasyon. Alagad taano ta sa sadiri sana nindong pamilya kamo magibo nin mga kabootan? Puede kamong ‘humiwas’ paagi sa pagtabang sa kataraed na naghehelang o pakikiiba sa mga gurang na napupungaw o pagtao nin materyal na tabang, sa ano man na paaging kaya nindo, sa mga kulang sa materyal na bako man nindang kasalan. (2 Corinto 6:11, 12) An Biblia nagsasaysay sato dapit ki Dorcas, sarong babae na nagkamit nin dakulang pagkamoot ta sia “pano nin marahay na mga gibo asin mga paglimos na saiyang ginigibo” para sa mga balo. (Gibo 9:36, 39) Inoomaw kaiyan an mga maboot sa mga nasasakitan. (Talinhaga 14:21) Iiniiba kan Kasuratan an ‘pag-ataman sa mga ilo asin balo sa saindang kasakitan’ bilang mahalagang kabtang kan pagsamba na ikinaoogma nin Dios. (Santiago 1:27) Asin an Biblia nagsasadol sa sato gabos: “Dai nindo paglingawan an paggibo nin marahay asin an paghiras nin mga bagay sa iba, huli ta sa siring na mga atang naoogmang gayo an Dios.”—Hebreo 13:16.
13. Anong motibo an nagpapangyaring magin kapakipakinabang an pagtabang sa iba?
13 Ini daw nangangahulogan na an pag-ubos nin panahon sa humanitaryo sanang mga aktibidad iyo an liabe sa kaogmahan? An totoo, apuera sana kun an motibo espirituwal, pagmawot na umarog sa Dios sa pagpaheling nin pagkamoot, iyan puedeng magbunga nin pagkabigo. (1 Corinto 13:3; Efeso 5:1, 2) Taano? Huli ta puede kamong madisganar kun dai inaapresyar nin mga tawo an saindong kabootan o kun inaabuso ninda an saindong pagkamatinao.
14, 15. Ano an minagibo sa buhay na magin tunay na maogma asin nakakokontento?
14 Sa ibong na kampi, kun talagang ginagamit nin tawo an saiyang buhay sa paglilingkod sa Dios, an pinakadakula niang pagkakontento minagikan sa pakaaram na an saiyang ginigibo nakapaoogma nanggad sa saiyang Kaglalang. Asin an saiyang kakayahan na gumibo nin mga bagay para sa ibang tawo dai linilimitaran nin materyal na mga rogaring. Nasa saiya an “mamuraway na maogmang bareta kan maogmang Dios,” si Jehova, asin an pribilehio na ihiras iyan sa iba. (1 Timoteo 1:11) Gikan sa Biblia aram nia kun paano aatubangon an mga problema sa buhay ngonyan, asin kun ano an makangangalas na paglaom na itinatagama nin Dios para sa ngapit. Asin nakaoogma nanggad na ihiras an siring karahay na bareta sa iba, dangan darahon an saindang atension sa Burabod kaiyan, si Jehova Dios! Arog kan isinabi kan pinasabngan na kagsurat kan Salmo 147:1: “Omawa nindo si Jah, banwaan, huli ta marahay an mag-awit sa satong Dios; huli ta iyan managom—angay an pag-omaw.”
15 An satong buhay napapano nin kahulogan kun nasasabotan niato an kabotan ni Jehova dapit sa buhay asin kun sia tinatawan niato nin onra. (Kapahayagan 4:11) Mapapasaindo an tunay na pagkakontento kun, sagkod sa itinotogot kan saindong kamugtakan, kamo lubos na makikabtang sa paghiras kan mga katotoohan sa Biblia sa ibang tawo. Minsan ngani tibaad darakula na an saindong mga aki, puede kamong maogma sa pagtabang sa ‘espirituwal na mga aki’ na dumakula. Asin sa pagheling nindo sa sainda na nagigin maygurang na mga Kristiano, mamamatean nindo an arog kan namatean ni apostol Pablo kan sia sumurat sa mga natabangan nia sa paaging iyan: “Ano an samong paglaom o kagayagayahan o korona nin kaogmahan—tara, bako daw na kamo? . . . Tunay na kamo an samong kamurawayan asin kagayagayahan.”—1 Tesalonica 2:19, 20.
Magin Madaling Makibagay Kun Naliliwat an mga Kamugtakan
16, 17. (a) Pag-abot sa mga problema, ano an maninigong likayan? (b) Minsan pa magadan an agom nin saro, ano an makatatabang sa saiya na dai magsolo sa pag-atubang sa bagong mga angat?
16 Siempre, pag-abot nin panahon, naririsa nin kadaklan na dai na ninda nagigibo an arog kan dati. Kaipuhan sindang magin madaling makibagay, andam na gumibo nin mga pagliliwat. Kun may mga problema sa salud, ini nangangaipo nin atension. Alagad madonong an magin timbang, na dai inuubos an panahon sa mga bagay na ini sagkod na dai na naririsa nin saro an mga oportunidad na itinatao kan kada aldaw nin pagkabuhay. May malataw na mga problema, asin kun an saro may marahay na magigibo dapit kaiyan, madonong na iyan gibohon. Alagad an paghadit mayong nagigibo, asin an pagmawot na iba kutana an kamugtakan nin mga bagay dai nakaliliwat kaiyan. Kaya, imbes na pagpararumdomon an nakaagi, aprobetsaran nindo an mga oportunidad sa presente.
17 Aplikado man ini kun, sa nahuhuring mga taon nin buhay, kamo nagsosolo giraray. Kun nagin maogma an pag-ibaiba nindo mag-agom, sierto na igwa kamo nin magayon na mga gigirumdomon. Alagad an buhay nagpapadagos, asin panahon ini na kaipuhan an mga pagliliwat. May mga bagong angat na kaipuhan na atubangon, asin kun kamo namumuhay sa paagi na nagpapaheling nin pagtubod sa Dios, dai kamo magsosolo sa pag-atubang dian.—Salmo 37:25; Talinhaga 3:5, 6.
18-20. Anong mga bagay an puedeng gumibo sa buhay na makahulogan minsan sa nahuhuring mga taon?
18 Sa ibong kan bakong marahay na mga bagay sa buhay, dakol man an makatatao sato nin kaogmahan—marahay na mga katood, mga oportunidad na gumibo nin mga bagay para sa ibang tawo, masiram na kakanon, magayon na pagsolnop nin aldaw, pag-awit nin mga gamgam. Saro pa, minsan ngani tibaad bakong pinakamarahay an presente niatong kamugtakan, nasa sato an panuga nin Dios na tataposon nia an karatan asin hahaleon nia sa katawohan an gabos na kamondoan, sakit, helang asin pati kagadanan.—Kapahayagan 21:4.
19 Totoo na an saro na nagkaigwa nin materyalistikong pagheling sa buhay puedeng makamate na daing kahulogan an nahuhuri niang mga taon. Ilinadawan kan kagsurat nin Eclesiastes an mga resulta nin siring na pamumuhay sa pagsabi: “An gabos daing kamanungdanan.” (Eclesiastes 12:8) Alagad mapadapit sa mga tawong may pagtubod, arog ni Abraham asin Isaac, sinasabi kan Biblia na inabot ninda an katapusan kan saindang buhay na “gurang na asin kontento.” (Genesis 25:8; 35:29) Ano an nagpangyari kan kalaenan? An mga tawong ini may pagtubod sa Dios. Kombensido sinda na sa itinalaan na panahon nin Dios an mga gadan mabubuhay giraray, asin hinahalat ninda an panahon na an Dios mismo mapatindog nin matanos na gobyerno para sa bilog na katawohan.—Hebreo 11:10, 19.
20 Sa saindo man na kamugtakan, kun dai nindo totogotan an presenteng mga problema na bumuta sa saindo sa dakol na marahay na bagay sa palibot nindo asin sa makangangalas na ngapit na itinatagama nin Dios para sa saiyang mga lingkod, an saindong buhay magkakaigwa nin kahulogan, asin an kada aldaw magtatao sa saindo nin pagkakontento, sagkod sa nahuhuring mga taon.