Paghiwas na May Bendisyon ni Jehova

AN SARONG programa sa dedikasyon kan banggi nin Setyembre 18, 1995, nagdoon na si Jehova Dios tunay na binendisyonan an pagpahiwas kan saiyang mga Saksi sa lugar kan saindang pankinaban na opisina prinsipal sa Brooklyn, Nueva York.

Labing 6,000 an naghinanyog sa programa sa dedikasyon. Nagtiripon sinda sa Brooklyn, an sentro kan programa, siring man sa iba pang lugar, kabale an darakulang pasilidad kan Mga Saksi ni Jehova harani sa Patterson asin Wallkill, Nueva York, asin sa saindang sanga harani sa Toronto, Canada. An mga yaon sa mga lugar apuera sa Brooklyn nadangog an programa paagi sa telepono.

Sarong Nakaoogmang Programa

An mga Bethelite, na apod sa boluntaryong mga trabahador, na naghinanyog sa programa dakulang kabtang kan pambilog na kinaban na pamilyang Bethel na may labing 16,400 na miembro. An mga miembrong iyan naglilingkod sa mga sanggatos na nasyon, kun saen sinda nag-iimprenta nin mga literatura sa Biblia asin naglilingkod sa nagsusuportar na mga departamento para sa labing 78,600 na kongregasyon kan Mga Saksi ni Jehova sa kinaban.

Makosog an pag-antisipar kan an programa sa dedikasyon ponan nin kanta kan alas 6:30 n.b., na sinundan nin pamibi ni Karl Klein. An tsirman sa programa, si Lloyd Barry, maogmang inako an gabos paagi sa halipot na mga komento dapit sa kahulogan kan okasyon. Rinepaso ni Albert Schroeder an leksion sa Torrengbantayan para sa semana, dangan si Daniel Sydlik nagpahayag dapit sa temang “An Satong Banal na Paglilingkod sa Bethel.” An mga naenot na ini sa programa gabos miembro kan Namamahalang Grupo kan Mga Saksi ni Jehova.

An sunod na duwang kabtang kan programa​—“Pagpanigo sa Satong Nagdadakulang Pangangaipo nin Erokan, 1974-1995,” asin “Mga Tampok na Kabtang kan Paghirahay Asin Pagtogdok kan Bethel sa Brooklyn”—​nagtampok kan mahalagang mga kabtang kan pagtogdok o pagbakal kan mga edipisyo na idinedikar. An mga komento nakasentro sa katatapos pa sanang erokan na edipisyo na okupado ngonyan nin mga sangribong Bethelite. An 115 metros an langkaw na erokan na ini sa 90 Sands Street kataed kan imprentahan.

An programa nagtampok kan pahayag sa dedikasyon ni Milton Henschel, an presidente kan Watch Tower Bible and Tract Society. Idinoon nia an mga arogan sa Biblia sa pagdedikar nin mga edipisyo na gagamiton sa paglilingkod ki Jehova. Pakatapos nin sarong kanta an programa tinapos paagi sa pamibi ni Carey Barber, saro man na miembro kan Namamahalang Grupo. Alagad ano an nagkapirang tampok na kabtang kan programa?

An mga Edipisyong Idinedikar

Ipinaliwanag kan paraataman kan Erokan na Bethel, si George Couch, na 17 erokan an idinagdag poon kan huring dedikasyon nin sarong erokan na Bethel sa Brooklyn kan Mayo 2, 1969.a An mga ini magsalang bagong itogdok na mga erokan o mga edipisyo na binakal asin hinirahay. An dedikasyon na ini sa aktuwal para sa 17 erokan na ini, sa duwang sadit na edipisyo​—na binakal kan mga taon nin 1940 alagad binago bilang mga erokan na Bethel—​patin sa mga pasilidad kan imprentahan asin opisina na itinogdok o binakal poon kan idedikar an mga opisina de ehekutibo kan Mga Saksi ni Jehova kan Marso 15, 1982.b

An pinakadakula sa mga edipisyong idinedikar iyo an nasa 360 Furman Street. Itinogdok kaidto pang 1928, nabakal iyan kan Mga Saksi ni Jehova kan Marso 15, 1983, asin biyong hinirahay. Iyan may hiwas na 93,000 metro kuadrado, o haros 9 na ektarya. An iba pang edipisyo na kabale sa dedikasyon iyo an imprentahan sa 175 Pearl Street asin darakulang garahe na itinogdok kan nakaagi pa sanang mga taon.

Kun Taano ta Kaipuhan an Dugang Pang Erokan

Kan 1969, kan idedikar an huring erokan na Bethel sa Brooklyn, may peak na 1,336,112 Saksi na naghuhulit kan maogmang bareta kan Kahadean nin Dios sa bilog na kinaban. Alagad kan 1995 igwa na nin 5,199,895 naggigibo kaiyan, na mas dakol nin labing tolo may kabangang beses! Sa siring, tanganing mapanigoan an nagdadakol na kahagadan para sa literatura sa Biblia, an pamilyang Bethel sa Brooklyn duminakol poon sa 1,042 na regular na miembro kan 1969 sagkod sa labing 3,360, na ngonyan nasa 22 na erokan!

Ipinaliwanag ni George Couch kun paano napanigoan an pangangaipo para sa dugang pang erokan poon kan 1974 sagkod 1995. Sa kapinonan kan mga taon nin 1970, nagkapirang eskalon sa nasa haraning Towers Hotel an inaarkila kan Mga Saksi ni Jehova tanganing maakomodar an nagdadakulang pamilyang Bethel. Kan Disyembre 1973, si Nathan Knorr, an presidente kaidto kan Watch Tower Society, nagsurat kapwa sa Opisina kan Bethel asin sa mga administrador kan Towers, na nagsasabi na an Sosyedad nagpaplanong ‘humale sa Towers Hotel sa Oktubre 1, 1974.’

Sinabi ni Tugang na Couch na nabigla sia huli ta mayo nin eerokan an mga Bethelite na nag-iistar sa Towers. Nabigla man an mga administrador kan Towers, huli ta nagsasarig sinda sa arkila kan Sosyedad tanganing magpadagos an saindang negosyo. An resulta iyo na an mga administrador kan Towers dinagka an Mga Saksi ni Jehova na bakalon an hotel. “Nagpaparadakol kamo poon kan yaon kami digdi,” sabi ninda, “asin kaipuhan nindo an edipisyo.”

“Pano iyan nin mga nag-iistar,” an simbag kan mga representante kan Sosyedad. “Kun babakalon mi iyan, gusto ming paistaron dian an samong mga tawo.”

“Babakantehon mi an edipisyo para sa saindo,” an panuga kan mga administrador kan Towers. Bueno, dai nahaloy pakatapos kaiyan binakal kan Mga Saksi ni Jehova an edipisyo kan Towers sa angay na presyo. “Taano ta ginibo ni Tugang na Knorr an surat na idto?” an hapot ni Couch sa napangalas na mga nagdadangog sa saiya. “Posibleng dai nia aram mismo, alagad iyan an dahelan kan pagkapabakal kan Towers Hotel sa Watch Tower Society.”

Isinaysay man kan espiker kun paano binakal kan Mga Saksi ni Jehova an 97 Columbia Heights, an dating lugar kan bantog na Margaret Hotel, na kahampang sana kan orihinal na Erokan na Bethel. Marahay an lokasyon, huli ta pasil iyan na ikonektar sa mga edipisyo kan Bethel paagi sa tunel sa irarom kan tinampo. Kan Pebrero 1980, kan an edipisyo hinihirahay, iyan nasolo. Dangan, huling nasakitan an kagsadiri na makapatogdok nin bagong edipisyo sa lugar na iyan, ipinabakal nia an lote sa Mga Saksi ni Jehova.

Si Tugang na Couch nagsabi: “Haros kada saro sa mga edipisyong ini igwa nin interesanteng estorya na matokdo sa sarong bagay​—na si Jehova Dios an nagdirehir sa naheheling na organisasyon na mabakal an partikular na edipisyong iyan.”

An Estorya kan 90 Sands

An pinakabago asin an pinakadakulang erokan iyo an 90 Sands Street. Kan an lote mabakal kan Mga Saksi ni Jehova kan Disyembre 1986, igwa iyan nin sarong dakulang pabrika sa 160 Jay Street.c Ginaba an pabrika, asin kan Agosto 30, 1990, an pamilyang Bethel sinabihan na may itinao nang permiso sa pagtogdok nin sarong 30 eskalon na erokan sa lugar na iyan.

Sa sarong interbio na pinangenotan kan miembro kan Namamahalang Grupo na si Theodore Jaracz, an paraataman sa imprentahan kan Sosyedad sa Brooklyn, si Max Larson, nagsaysay kun paano itinao an permiso sa pagtogdok kan erokan sa 90 Sands Street. An nangyari kaidtong 1965, an paliwanag ni Tugang na Larson, makahulogan.

Kan panahon na idto an Sosyedad gustong magtogdok nin sampulong eskalon na imprentahan sa bloke na kataed kan iba pang imprentahan kaiyan, alagad an pagkasona sa bloke nagtogot sana sa pagtogdok nin duwang eskalon. An sarong arkitekto uminoyon na andamon an plano para sa bagong iproponer na imprentahan, alagad sia nagsabi: “Habo kong mapasopog paagi sa pagpresentar kaini sa board.” Kombensido sia na an Board of Standards and Appeals nungka na liliwaton an saindang mga regulasyon sa pagsona kan bloke. Kan maaprobaran an plano, nagkagsing sia: “Nakua baya nindo iyan!”

An rason, sabi pa ni Larson, iyo na kan liwaton an pagkasona sa blokeng iyan para sa satong sampulong eskalon na imprentahan, liniwat man an pagkasona sa kataraed na bloke, kabale an namumugtakan kan edipisyo sa 160 Jay Street. Asin, makangangalas, an pagliwat kan pagkasona nagtogot sa pagtogdok nin hotel. Alagad, sabi ni Larson, idto sarong bagay na mayo ni sarong nakarisa​—kisuerra sagkod na makaagi an mga 25 taon, pakatapos na magpoon na kitang maghanap nin lugar para sa pagtogdok nin sarong bagong erokan na Bethel. Dangan nadiskobre liwat an regulasyon sa pagkasona!

Ipinaliwanag ni Tugang na Larson an nangyari: “Kan andamon mi an mga plano para sa satong 30 eskalon na erokan asin darahon iyan sa departamento sa pagtogdok, sinabihan kami: ‘Dai kamo puedeng magkaigwa nin erokan dian. Iyan gabos para sa mga pabrika, asin dai ninda liliwaton an pagkasona para sa saindo.’

“‘Dai ninda kaipuhan na liwaton iyan,’ an sabi mi sa mga opisyales. ‘Nasona na iyan para sa hotel.’ Kan siyasaton ninda an mga rekord, dai sinda makapaniwala! Bueno, iyan an estorya kun paano kita nagkaigwa kan satong 30 eskalon na edipisyo,” an konklusyon ni Larson.

Naririsa an Bendisyon ni Jehova

An sarong salmista sa Biblia nagsurat: “Sagkod na bakong si Jehova mismo an magtogdok sa harong, basang sana an pagpapagal dian kan mga nagtotogdok kaiyan.” (Salmo 127:1) Malinaw nanggad, an bendisyon ni Jehova nasa aktibidad nin pagtogdok kan Mga Saksi ni Jehova tanganing mapadali an pambilog na kinaban na paghuhulit asin pagtotokdo na ipinagboot ni Jesus na gibohon kan saiyang mga parasunod.​—Mateo 24:14; 28:​19, 20.

An mga nagkapribilehiong makadangog sa programa kan Setyembre 18, 1995, naogma sa ebidensia kan siring na bendisyon sa pagpahiwas sa pankinaban na opisina prinsipal kan mga lingkod ni Jehova. An banwaan ni Jehova makakokompiar sa saiyang padagos na bendisyon mantang padagos nindang ginigibo an saiyang mga ipinagboboot.

[Mga Nota sa Ibaba]

[Retrato sa pahina 23]

90 Sands St. • 1995

[Mga retrato sa pahina 24, 25]

Nagkapira sa dagdag na erokan na idinedikar

97 Columbia Hts. • 1986

Bossert Hotel, 98 Montague St. • 1983

34 Orange St. • 1945

Standish Hotel, 169 Columbia Ht S. • 1981

67 Livingston St. • 1989

108 Joralemon St. • 1988

Towers Hote l, 79-​99 Willow St. • 1975

[Mga retrato sa pahina 26]

175 Pearl St. • 1983

69 Adams St. • 1991

360 Furman St. • 1983