Sarong “Tambak nin Patotoo” sa Daga kan “Bukid nin Dios”

SA SARONG mapa kan kontinente, kun susundan nindo an baybayon kan Solnopan na Aprika asin mapasiring sa sirangan kan Gulpo nin Guinea, sa lugar na an baybayon minasiko patimog, maheheling nindo an Cameroon. Kun mapadagos kamo patimog kan baybayon, makakaabot kamo sa sarong mahiwas na itom na baybayon. An itom na baybay gikan sa mga pagputok nin bulkan kan Bukid nin Cameroon.

An kono an korte, 4,070 metros na alitoktok na ini nin bukid an pinakahalangkaw sa lugar. Kun an liwanag kan minasolnop na aldaw minatama sa mga bakilid kan Bukid nin Cameroon, may maheheling dian na pambihirang buhay na mga kolor​—malva, kolor kahel, bulaw, asin krimson. An dagat asin kaharaning mga tangyan nagpapabanaag kan gabos na kolor na ini siring sa salming, na pinagigin haros imposibleng iseparar an langit sa daga. Madaling masabotan kun taano an animistang mga tribo sa rehion ta nginaranan an bukid na Mongo Ma Loba, na trinadusir na “Karuwahe kan mga dios,” o mas parate, “Bukid nin Dios.”

Sa mas harayong timog, may halawig na puting baybayon, na may mga poon nin niyog sa gilid. Dai kaiba an trangkilong baybayon, an kadaklan kan nasyon natatahoban nin mahibog na kadlagan na pan-ekwador, na sagkod sa linderos kataed kan Congo asin Republika nin Aprika Sentral asin sa amihanan kan Nigeria asin Chad sa Sahara. Mabukid an solnopan na parte kan nasyon, na nagpapagirumdom sa mga biahero dapit kan mga lugar sa Europa. Minsan siring, an mainit na klima dai matogot sa saindo na malingawan na kamo haranihon na sa ekwador. Huli sa pagkalaenlaen kan probinsia kaiyan an dakol na naggigiya sa turista nagsasabi na an Cameroon sadit na ladawan kan Aprika. An impresyon na ini pinakokosog kan manlaenlaen na grupong etniko asin kan labing 220 rehistradong lenguahe asin dialekto.

Kun kamo masongko sa Cameroon, tibaad dumagos kamo sa saro kan darakulang hotel sa duongan nin Douala, o sa kabiserang siudad, an Yaoundé. Alagad puedeng malihisan nindo an oportunidad na maaraman an manongod sa buhay kan mga tawo, nangorogna kan labing 24,000 na Saksi ni Jehova, na sibot sa pagtipon nin “tambak nin patotoo” sa bilog na dagang ini kan “Bukid nin Dios.”a Taano ta dai maglibot sa nasyon tanganing mamidbid an nagkapira sa sainda? An pagbiahe nindo sa dagang ini sa Solnopan na Aprika sierto nanggad na mayaman na babalosan.

Paagi sa Bangka, Auto, o Bisikleta?

Kun saen minaantos sa kadagatan an Sanaga, an pinakahalabang salog sa Cameroon, iyan nagigin masalog na kaplanodohan. Tanganing maabot an gabos na nag-eerok sa mahiwas na rehion na ini, sa parate an mga Saksi ni Jehova kaipuhan na magbiahe paagi sa mga bangka. Ini an ginigibo kan siyam na parahayag kan Kahadean sa sadit na grupo sa Mbiako. An duwa sa sainda 25 kilometros an rayo kan iniistaran, sa baryo nin Yoyo. Kaipuhan an mapuersang pagsagwan tanganing maabot ninda an Mbiako, pero permi sindang presente sa Kristianong mga pagtiripon. Kan sinosongko an grupong ini, isinuherir kan nagbibiaheng paraataman na ipasale an video na Jehovah’s Witnesses​—The Organization Behind the Name. Alagad ta iyan mas pasil na sabihon kisa gibohon. Sa siring kapuerang baryo, saen sia makakukua nin videocassette recorder, telebisyon, asin elektrisidad tanganing ikapasale iyan?

Durante kan semana nin pagsongko, dinalaw kan nagkapirang parahayag an pastor nin sarong lokal na iglesya. Sa saindang pagngalas sinda maogmang pinadagos kan pastor, asin buhay an pakipag-olay ninda sa saiya. Kan marisa na an pastor igwa bako sana nin VCR kundi pati dienereytor, an mga tugang nagkosog-boot na maghapot kun puede nindang sublion an saiyang mga gamit. Huling nagustohan an nakaaging orolay sa Biblia, an pastor uminoyon na tumabang. Kan Sabadong banggi 102 katawo an nag-atender sa pasale, kabale an pastor asin an kadaklan sa mga miembro kan saiyang iglesya. An duwang Saksi hale sa Yoyo may iinibang nagkapirang interesado sa duwang bangka. Daing gayo ninda inisip an pagsagwan pasabat sa puersa kan pagtaob. Pakatapos na maheling an video, sinda odok na napahiro asin naparigon an boot, asin ipinag-orgolyo nindang mapabilang sa siring kadakulang organisasyon na an katuyohan tawan nin onra si Jehova.

Tanganing madumanan an mga lugar na dai maaabot nin mga bangka, puedeng sumakay sa auto. An mga paradahan kun saen naghahalat nin mga pasahero an mga auto na ini perming pano nin mga aktibidad. Napalilibotan nin mga paratinda nin malipot na tubig, paratinda nin batag, asin mga dispatser na aking lalaki, madalion na biyong maribaraw. An trabaho kan mga dispatser na aking lalaki pasakayon an mga pasahero sa naghahalat na mga auto, na gabos, sono sa sainda, “andam nang magbiahe.” Minsan siring, an “andam na” dai maninigong saboton sa estriktong kahulogan kan termino. An mga biahero kaipuhan na maghalat nin dakol na oras, kun beses mga aldaw pa ngani. Oras na surusuan na an gabos na pasahero sa laog asin ikinakarga na kan tsuper an mga bagahe, sinakong produkto, asin kun beses pati buhay na mga manok asin kanding, sa kargadera sa atop, an auto minabiahe na sa maantal, maalpog na tinampo.

An sarong nagbibiaheng paraataman, na napapagal na sa klaseng ini nin pagbiahe, nagdesisyon na magbiahe na sana nin sadiri. An gabos niang pagbiahe ngonyan paagi sa bisikleta. An sabi nia: “Poon kan ako magdesisyon na gumamit nin bisikleta sa pagbarobalyo sa mga kongregasyon, permi akong minaabot na nasa oras para sa pagsongko. Totoo, an biahe tibaad nagkapirang oras, alagad minsan paano dai ko na kaipuhan na maghalat nin saro o duwang aldaw sa auto. Kun panahon nin tig-oran, an nagkapirang tinampo haros dai na maheling huli sa baha. Kaipuhan nindong tangkason an saindong sapatos sa pagbalyo sa mga agihan na ini na malaboy asin matubig. Sarong aldaw an saro kong sapatos naholog sa sapa asin dai na nakua sagkod na nakalihis an nagkapirang semana, kan an aking babae nin sarong Saksi dai tuyong makua iyan mantang naninira! Maogma ako na ikasulot giraray an padis nin sapatos na ini, pakatapos na an saro kaini haloy-haloy na nakiiba sa mga sira. Kun minsan dinudumanan ko an mga lugar na dai pa noarin man nahulitan kaidto kan Mga Saksi ni Jehova. An mga tagabaryo permi akong hinahapot kun ano an dara ko. Kaya pinapagdadanay kong madaling kuanon an mga magasin asin brochure. Kada pagpondo ko, iinaalok ko an mga babasahon na ini na basado sa Biblia asin nagtatao ako nin halipot na patotoo. Nagtutubod ako na patutuboon ni Jehova an mga banhing ini nin katotoohan.”

Sa Pinakainterior

Pinagmamaigotan kan Mga Saksi ni Jehova na ihiras sa iba an maogmang bareta kan Kahadean dawa sa pinakanglaog kan Cameroon, sa mga baryo na natatago sa kalaoglaogi kan kadlagan. Nangangaipo ini nin dakulaon na paghihingoa, alagad nakaoogma an mga resulta.

Si Marie, sarong pambilog na panahon na ministro, pinonan na adalan sa Biblia an sarong daragita na an ngaran Arlette. Sa katapusan kan enot na pag-adal, hinapot ni Marie si Arlette kun ihahatod sia kaini sa pinto, mantang iyan an kaugalean sa parteng ini nin Aprika. Minsan siring, ipinaliwanag kan daragita na dai sia makalakaw huli sa kolog kan saiyang bitis. An bitis ni Arlette igwa nin sarong klase nin purgas na an babaeng purgas minalaog sa laman, na nagigin dahelan nin pagnana. Makosog an boot na pasarosarong hinale ni Marie an mga purgas. Kan huri, naaraman man nia na kun banggi an daragitang ini pinasasakitan nin mga demonyo. Mapasensiang ipinaliwanag ni Marie kun paano magtitiwala ki Jehova, na sinasabing paagi sa makosog na pag-apod sa saiyang ngaran sa pamibi.​—Talinhaga 18:10.

Si Arlette marikas na nag-oswag. Sa primero an saiyang pamilya mayo man nin naheling na maraot sa pag-adal huli sa risang pag-oswag nia kapwa sa pisikal asin intelektuwal. Alagad kan maaraman ninda na gusto niang magin saro sa Mga Saksi ni Jehova, binawalan ninda sia na ipadagos an pag-adal. Pakalihis nin tolong semana an ina ni Arlette, huling narerealisar kun gurano an pagmondo kan saiyang aking babae, kinaolay si Marie asin hinagad sa saiya na ipadagos an pag-adal.

Kan dumatong an panahon sa pag-atender nin pansirkitong asamblea, binayadan ni Marie an sarong tsuper na ihatod si Arlette sa asamblea sa laog nin duwang aldaw. Minsan siring, an tsuper nagsayumang magduman sagkod sa harong ni Arlette, na sinasabi na dai puedeng agihan an dalan pasiring sa tinampo. Kaya hiningoa ni Marie na darahon an daragita sa tinampo. Tunay nanggad na binendisyonan ni Jehova an mga paghihingoang ini. Ngonyan, si Arlette nakakaatender na sa gabos na pagtiripon. Tanganing tabangan siang magibo ini, daing kapagalan na hinahapit sia ni Marie. Sindang duwa naglalakaw nin 75 minutos kada aldaw. Huling an pagtiripon kun Domingo minapoon sa 8:30 n.a., si Marie kaipuhan na humale sa harong nin 6:30; pero nakakaabot sinda na nasa oras. Linalaoman ni Arlette na masimbolisaran nia an saiyang pagdusay paagi sa bautismo sa tubig sa dai mahaloy. Sabi ni Marie: “An gabos na dai nakaheling sa saiya kan sia pumoon na mag-adal dai maiimahinar kun gurano an saiyang pagbago. Pinasasalamatan kong marhay si Jehova huli sa paagi kan pagbendisyon nia sa saiya.” Tunay nanggad na si Marie sarong marahay na halimbawa sa pagkamoot na mapagsakripisyo sa sadiri.

Sa Harayong Amihanan

An Amihanan na Cameroon pano nin mga pagkakalaen asin sorpresa. Kun tig-oran, iyan nagigin mahiwas, matubang na hardin. Alagad kun minaabot na an nakatututong na saldang, an mga doot naaalang. Kun odto, na nasa kainitan an saldang asin depisil na makanompong nin limpoy, an mga karnero nagsusurusuan sa gilid kan pulang laboy na mga lanob nin harong. Sa tahaw nin baybay asin alang na doot, an solamenteng tanda nin berdeng mga tinanom iyo an nagkapirang dahon kan mga poon nin baobab. Minsan ngani an mga ini bakong arog kadakula kan saindang paryenteng mga tinanom sa kadlagan na pan-ekwador, an mga iyan matagal man. An saindang kakayahan na tagalan an masakit na palibot nag-iilustrar nanggad kan kaigotan asin kapusohan kan nagkapirang Saksi na nag-istar sa lugar na ini tanganing pasirangon an liwanag nin katotoohan.

An ibang kongregasyon sa lugar na ini 500 sagkod 800 kilometros an rayo sa kada saro, asin an pakamate nin pagigin nasusuhay talagang totoo. Alagad igwa nin interesanteng marhay. An mga Saksi hale sa ibang lugar minabalyo digdi tanganing tumabang. Tanganing magin epektibo sa ministeryo, kaipuhan nindang manodan an Foufouldé, sarong lokal na dialekto.

An sarong Saksi hale sa Garoua nagdesisyon na maghulit nin pirang aldaw sa saiyang tinuboan na baryo, mga 160 kilometros an rayo. May nanompongan siang interesado, alagad an halangkaw na gastos sa biahe nakaolang sa saiya sa regular na pagbuelta. Pakalihis nin nagkapirang semana, an Saksi nakaresibi nin surat hale sa saro kan mga interesado na nakikimaherak sa saiya na dumuman asin dumalaw liwat. Huling mayo pa nin pamasahe, dai sia nakaduman. Imahinara an pagkabigla kan Saksi kan an tawo sumongko sa saiyang harong sa Garoua tanganing paaramon sia na may sampulong tawo sa baryo na naghahalat sa saiyang pagsongko!

Sa saro pang baryo, harani sa linderos sa Chad, an sarong grupo nin 50 interesadong tawo nag-organisar kan saindang sadiring pag-adal sa Biblia. Iinareglo ninda na an tolo sa sainda umatender sa mga pagtiripon sa pinakaharaning kongregasyon sa Chad. Pagbalik, an mga ini an makondukta kan pag-adal sa Biblia sa bilog na grupo. Tunay nanggad, an mga tataramon ni Jesus puedeng umaplikar na gayo digdi: “An anihon mahiwas, alagad an mga paraani kakadikit. Kaya makimaherak kamo sa Kagurangnan kan anihon na magsobol nin mga paraani sa saiyang anihon.”​—Mateo 9:​37, 38.

Pagpatotoo sa mga Siudad

Pakalihis nin dakol na taon nin kakulangan, mga duwang taon na an nakaagi, an mga magasin na Torrengbantayan asin Awake! makukua na sa Cameroon. Dakula an entusiasmo asin interes sa mga magasin na ini mantang primero pa sanang makabasa kaiyan an dakol na tawo. An sarong hoben pang mag-agom na espesyal payunir na idinestino sa saro kan mga siudad nakapasakamot nin 86 na magasin sa saindang enot na aga nin paghuhulit sa saindang bagong teritoryo. An ibang parahayag nakakapasakamot nin sagkod sa 250 magasin sa sarong bulan! Ano an sekreto sa saindang kapangganahan? Ialok an mga magasin sa gabos.

An sarong Saksi na nagtatrabaho sa sarong opisina na bukas para sa publiko perming nagwawalat nin mga magasin tanganing maheling. An sarong babae hineling an mga magasin alagad dai nagkua. Namansayan kan Saksi an saiyang interes asin inalokan sia nin sarong kopya, na inako nia. Nabigla sia na maheling na nagbuelta an babae kan sumunod na aldaw. Bako sana na gusto niang magkontribwir para sa mga magasin na kinua nia kundi naghagad man sia nin dugang pang mga kopya. Taano? Huling biktima nin panlulugos, pinili nia an magasin dapit sa temang iyan. Sa bilog na banggi binasa nia asin binasa liwat an itinaong hatol. Huling naginhawahan na marhay, gusto niang makaaram nin dakol pa manongod sa Mga Saksi ni Jehova.

Maski an saradit na aki puedeng makikabtang sa pagpalakop kan mensahe nin paglaom kan Biblia. Kan an Saksing aking babae na sais anyos pakantahon kan saiyang maestro nin sarong Katolikong himno, nagsayuma sia, na sinasabing saro sia sa Mga Saksi ni Jehova. Dangan pinakanta sia kan maestro nin saro sa mga kanta kan saiyang sadiring relihion tanganing matawan nia sia nin grado dian. Pinili nia an kanta na may titulong “Panuga nin Dios na Paraiso” asin kinanta iyan na memoryado. Hinapot sia kan maestro, na sinasabi: “Nasambitan mo an paraiso sa saimong kanta. Haen an paraisong ini?” Ipinaliwanag kan aking babae an katuyohan nin Dios na establisaron an Paraiso digdi sa daga sa dai na nanggad mahahaloy. Huling nabigla sa saiyang simbag, an maestro naghagad sa saiyang mga magurang kan libro na saiyang inaadalan. Andam siang tawan nin grado an aki basado digdi imbes na sa itinotokdo sa saiya durante kan mga leksion dapit sa relihion. Isinuherir kan mga magurang sa maestro na kun gusto nia siang tawan nin tamang grado, sia mismo kaipuhan ngunang mag-adal. Naponan an sarong pag-adal sa Biblia kaiba nia.

Nagpaplanong Sumongko?

Sa dakol na parte kan kinaban ngonyan, an mga tawo indiperente sa maogmang bareta kan Kahadean. Bako sindang interesado sa Dios ni sa Biblia. An iba dai makahiro huli sa takot asin habo sanang maghimate sa siisay man na estranyo sa pinto. An gabos na ini tunay na angat para sa Mga Saksi ni Jehova sa saindang ministeryo. Alagad laen nanggad sa Cameroon!

An paghuhulit sa harong-harong sarong kaogmahan digdi. Imbes na magtoktok, napagkatodan nang kumurahaw nin, “Kong, kong, kong.” Dangan hale sa laog minasimbag an sarong tingog, “Siisay iyan?” na pakatapos kaiyan nagpapamidbid kami na Mga Saksi ni Jehova. Sa parate, an mga magurang nagpapakua sa saindang mga aki nin mga bangko asin ibinubugtak iyan sa sirong nin sarong kahoy, tibaad sa poon nin mangga. Dangan nagkakaigwa nin maogmang oras sa pagpaliwanag kun ano an Kahadean nin Dios asin kun ano an gigibohon kaiyan tanganing haleon an masakit na kamugtakan nin katawohan.

Kasunod tolos nin siring na orolay, an sarong babae sueltong ilinuwas an nasa boot nia, na sinasabi: “Labi-labi an kamondoan ko na maheling na an katotoohan na hinahanap ko dai manonompongan sa relihion na nagimatan ko asin dian na ako naggurang. Nagpapasalamat ako sa Dios na ipinaheling nia sa sako an katotoohan. Saro akong deakono sa sakong iglesya. An estatuwa ni Birhen Maria nagsasarong semana sa harong nin lambang deakono tanganing ikapahayag kan kada saro an mga kahagadan sa saiya. Kun para sa sako, permi kong hinahagad ki Maria na tabangan akong maaraman an katotoohan. Ngonyan ipinaheling sa sako nin Dios na an katotoohan mayo ki Maria. Nagpapasalamat ako ki Jehova.”

Kaya kun pag-abot nin aldaw mamatean nindo an pangangaipo na maeksperyensiahan an makosog na kagayagayahan na puedeng kamtan sa paghuhulit kan maogmang bareta kan Kahadean nin Dios, taano ta dai songkoon an parteng ini nin Solnopan na Aprika? Apuera sa pakadiskobre sa “sadit na Aprika,” baga man paagi sa bangka, auto, o bisikleta, makakokontribwir man kamo sa “tambak nin patotoo” na tinitipon sa daga kan “Bukid nin Dios.”

[Nota sa Ibaba]

[Pasasalamat para sa pinagkuanan kan retrato sa pahina 22]

Mapa: Mountain High Maps® Copyright © 1995 Digital Wisdom, Inc.