Igwa daw nin Buhay Pagkagadan?
DUWANG hapot an nakariribaraw sa katawohan sa laog nin mga milenyo: Taano kita ta kaipuhan na maggurang asin sa huri magadan? Igwa daw nin ano man na klase nin may pag-aram na buhay pagkagadan?
An enot nagin dakulang iisipon para sa dakol na tawo ta minsan an modernong siensia medikal, sa ibong kan gabos na makangangalas na diskobremiento kaiyan, dai nakatatao nin dai na mapagdududahan o nakakokontentong simbag.
An ikaduwang hapot kadakol kan manlaenlaen na simbag. Minsan siring, sa pankagabsan an mga simbag manongod sa kun baga igwa nin may pag-aram na buhay pagkagadan nababanga sa mga positibo na bako sana ini an buhay asin sa mga arog man kaiyan karigon na an may pag-aram na buhay natatapos sa pagkagadan. An kadaklan sa ikaduwang grupong ini nagsasabi sa sato na mayo nin pagduda sa saindang isip na an halipot na buhay nin tawo iyo sana an malalaoman nia. Sa parate, an ano man na argumentong iatubang kontra dian sinisimbag nin tubod na marhay sa sadiring simbag na, “Bueno, mayo pa man nin nagbuelta tanganing magsabi sa sato, bako?”
Arog sa iba pang kontrobersial na mga hapot, kadakol kan dai pa nakapagdesisyon—na positibong sinasabi na sinda perming andam na magdangog sa pangongombensir kan arin man na lado. Alagad an iba minasimbag, tibaad sa daing galang pang paagi, “Halaton ta na sana pag-abot nin panahon!”
Haloyon Nang Hapot
An sarong enot na hapot manongod sa buhay pagkagadan pinalataw mga 3,500 na taon na an nakaagi kan bantog na taga-Sirangan na si Job, na namidbid huli sa saiyang pagpapasensia sa atubangan nin kasakitan. Arog kaini an pagkasabi ni Job sa hapot nia: “An tawo nagagadan asin napupukan; sia nauutsan asin nawawara. Kun paanong an tubig nawawara sa dagat o an irarom kan salog nagigin mara asin alang, siring man an tawo minahigda asin dai minabangon . . . Kun magadan an sarong tawo, sia daw mabubuhay giraray?”—Job 14:10-14, New International Version.
Alagad si Job dai nagsosolo sa paghapot nia manongod sa buhay pagkagadan. An Encyclopædia of Religion and Ethics nagtatao kan nakapaliliwanag na impormasyon sa irarom kan temang “State of the Dead”: “Mayo nin tema na konektado sa saiyang espirituwal na buhay na nabangkagan kan isip nin tawo na arog kan manongod sa saiyang kamugtakan pagkagadan. [An mga tawong tubo] sa gabos na rehion kan kinaban sa pankagabsan igwa nin malinaw na marhay asin garo buhay na mga ideya manongod sa kinaban nin mga espiritu—an buhay dian, an mga karakteristiko kaiyan, an mga kamugtakan kan lugar na iyan—asin ini nagsusuherir nin grabeng pagkapreokupado sa temang iyan. An lakop na pagkatakot sa gadan nagtotokdo sa suanoy nang marhay na ideya na an kamugtakan ninda bakong katapusan nin buhay. Pinutol nin kagadanan an mga enerhiya; iyan risa; alagad mayo daw nin ibang mga enerhiya na naghihiro, o bako daw na an mga enerhiyang iyan puedeng mahayag sa masakit na masabotan, misteryosong mga paagi? Baga man an mga tawo sa primero naniwala sa espiritu, kalag, o impakto, na siblag sa hawak, o dai, minalataw na yaon an gabos na dahelan na maniwala na an pagheling ninda sa gadan nag-eeksister pa man giraray.”
Tibaad kaiba kamo sa arin man sa tolong kategoriya na nasambitan sa enotan: dai segurado kun ano an nangyayari pagkagadan; kombensido na may buhay pagkagadan; o kombensido na iyo na sana ini an buhay. Ano man an kamugtakan, inaagda niamo kamo na maingat na konsideraron an minasunod na artikulo. Helingon kun baga makanonompong kamo dian nin nakakokombensir na prueba sa Biblia na igwa nin makangangalas na paglaom na maogmang buhay pagkagadan, kun paano iyan mangyayari, saen, asin noarin.