Sinuportaran an Katalingkasan nin Relihion sa Hapon

SA LAOG nin dakol na taon sa Hapon, an hoben na mga estudyante na mga Saksi ni Jehova napaatubang sa sarong depisil na problema: Maninigo daw nindang sunodon an saindang konsensia na sinanay sa Biblia, o maninigo nindang akoon an sarong kurikulum sa eskuelahan na kontra sa saindang konsensia. Taano ta may depisil na problema? Huli ta an mga pagsasanay para sa mga abilidad sa pakikipaglaban kabtang kan kurso sa pisikal na edukasyon sa saindang mga eskuelahan. Namatean kan hoben na mga Saksi na an siring na mga pagsasanay bakong kaoyon sa mga prinsipyo kan Biblia, siring kan yaon sa Isaias kapitulo 2, bersikulo 4. Ini nagsasabi: “Dadaragopdopon ninda an saindang mga minasbad na magin tarom nin arado asin an saindang mga budyak na magin mga sanggot. An nasyon dai mabingat nin minasbad tumang sa nasyon, ni mag-aadal pa man sinda sa pakilaban.”

Habong mag-adal nin mga abilidad sa pakilaban, na kalabot an pagdanyar sa ibang tawo, an hoben na Kristianong mga Saksi nagpaliwanag sa saindang mga maestro na dai ninda magigibo sono sa konsensia na magpartisipar sa pagsasanay para sa mga abilidad sa pakikipaglaban. Pakatapos na hingoahon na kombensiron an mga estudyanteng ini na akoon an kurikulum sa eskuelahan, dakol na mapagsabot na maestro an sa katapustapusi uminoyon na igalang an konsensia kan mga estudyante asin tumao nin kasalihid na mga aktibidad.

Minsan siring, may mga maestro na nagin emosyonal, asin may mga eskuelahan na dai tinawan an hoben na mga Saksi nin grado para sa pisikal na edukasyon. Kan 1993, kisuerra siyam na Saksi an dai tinogotan na makalaog sa sunod na grado asin pinirit na pumondo sa pag-eskuela o pahaleon huli sa dai pagpartisipar sa pagsasanay para sa mga abilidad sa pakikipaglaban.

Malinaw nanggad, panahon nang idepensa an diretso kan hoben na mga Kristiano na umako nin edukasyon na dai kaipuhan na ikompromiso an saindang konsensia. An limang estudyante na dai tinogotan na makalaog sa ikaduwang grado sa Kobe Municipal Industrial Technical College (na inaapod sa halipot na Kobe Tech) nagdesisyon na gumibo nin legal na aksion.

Ano an Nasa Isyu?

Kan tigsoli nin 1990 kan an limang estudyante lumaog sa Kobe Tech, ipinaliwanag ninda sa saindang mga maestro na dai sinda puedeng magpartisipar sa pagsasanay sa kendo (paggamit nin espada kan mga Hapon) huli sa saindang mga pagmansay na basado sa Biblia. Kontrang marhay an mga maestro sa pisikal na edukasyon asin dai sinda tinawan nin kasalihid na mga paagi na makua an mga grado para sa pisikal na edukasyon. Sa katapustapusi, an mga estudyante dai nakapasar sa klase sa pisikal na edukasyon asin bilang resulta kaipuhan na bumalik sa enot na grado (enot na taon nin kurso sa kolehio). Kan Abril 1991 nagdemanda sinda sa District Court sa Kobe, na sinasabi na an aksion kan eskuelahan kontra sa iginarantiya kan konstitusyon na katalingkasan nin relihion.a

An eskuelahan nagsabi na an pagtao nin kasalihid na mga aktibidad magigin pagpaheling nin pabor sa sarong partikular na relihion asin sa siring makalalapas sa neutralidad nin pampublikong edukasyon. Apuera kaiyan, sinda nagsabi na mayo sindang mga pasilidad ni mga tawohan na matao nin kasalihid na programa sa pisikal na edukasyon.

An Desisyon kan District Court Nakapukaw sa Boot kan mga Nakakaisi

Mantang binibista an kaso, an duwa sa limang estudyante dai na naman nakapasar sa pisikal na edukasyon, mantang an tolong iba pa kadikit pang dai makapasar asin makalaog sa sunod na grado. An regulasyon kan eskuelahan nagsasabi na an mga estudyanteng hababa an mga grado asin nagbalik sa iyo man sanang grado sa laog nin arin man na duwang magkasunod na taon puedeng pahaleon. Huli kaini, an saro sa duwang estudyante nagdesisyon na pumondo sa pag-eskuela bago napahale, alagad an saro, si Kunihito Kobayashi, habong pumondo. Kaya pinahale sia. Interesante nanggad, 90.2 puntos sa 100 an promedyo ni Kunihito sa gabos na leksion kabale na an pisikal na edukasyon, na dai nia napasaran na may iskor na 48 puntos. Sia an primera sa saiyang klase na may 42 na estudyante.

Kan Pebrero 22, 1993, an District Court sa Kobe nagdesisyon apabor sa Kobe Tech asin nagsabi: “An aksion na ginibo kan eskuelahan bakong kontra sa konstitusyon,” minsan ngani minidbid kaiyan na “dai puedeng deharan na an katalingkasan sa pagsamba kan mga nagdemanda medyo linimitaran kan kahagadan kan eskuelahan na magpartisipar sa mga pagsasanay sa kendo.”

Arog ni apostol Pablo kan enot na siglo, an mga nagdemanda nagdesisyon na mag-apelar sa mas halangkaw na legal na mga autoridad. (Gibo 25:​11, 12) An kaso nakaabot sa Korte Suprema sa Osaka.

Daing Kapasloan na Kaisipan kan mga Nagdemanda

An sarong midbid na iskolar, si Propesor Tetsuo Shimomura kan Unibersidad nin Tsukuba, uminoyon na tumao nin testimonio bilang sarong ekspertong testigo sa Korte Suprema sa Osaka. Bilang sarong espesyalista sa edukasyon asin ley, idinoon nia kun gurano kadaing konsiderasyon kan mga aksion kan eskuelahan sa pagkontra sa mga estudyante. Ipinahayag ni Kunihito Kobayashi an saiyang mga saboot sa korte, asin an saiyang sinserong kaisipan nakapahiro sa puso kan mga nasa laog kan korte. Dugang pa, kan Pebrero 22, 1994, an Bar Association sa Kobe, na nagpapahayag na an mga aksion kan eskuelahan nakalapas sa katalingkasan nin pagsamba ni Kunihito asin sa saiyang diretso na umako nin edukasyon, nagrekomendar na ibalik sia kan eskuelahan.

Mantang nagdadangadang an panahon na itatao na an desisyon sa Korte Suprema sa Osaka, an gabos na kalabot na hoben na Kristiano galagang magin kabtang sa pakikipaglaban sagkod na matapos iyan. Namatean ninda na sinda igwang legal na pakikipaglaban para sa rinibong hoben na Saksi na napapaatubang sa kaparehong isyu sa mga eskuelahan sa bilog na Hapon. Alagad huling dai sinda pinahale sa eskuelahan, posibleng marhay na ipahayag kan korte na daing saysay an saindang kaso. Asin naisip ninda na kun bawion ninda an saindang apelasyon, matatampok an pagkadaing katanosan kan eskuelahan sa pagpahale ki Kunihito. Sa siring, an gabos na estudyante apuera ki Kunihito nagdesisyon na dai idagos an kaso.

Kan Disyembre 22, 1994, si Namomoon na Huwes Reisuke Shimada kan Korte Suprema sa Osaka nagpahayag nin desisyon na nagbaliktad sa desisyon kan District Court sa Kobe. Nadiskobre kan korte na sinsero an rason ni Kunihito na sayumahan an mga pagsasanay sa kendo asin na labi-labi kadakula kan disbentaha para sa saiya kan saiyang aksion na basado sa saiyang relihiosong paniniwala. An eskuelahan, sabi kan Namomoon na Huwes na si Shimada, maninigo kutanang nagtao nin kasalihid na mga aktibidad. An ekselenteng desisyon na ini nakapukaw sa puso kan mga may pagmakolog dapit sa mga diretso nin tawo. Minsan siring, an kaso iinapelar kan eskuelahan sa Korte Suprema kan Hapon, na dai nagtogot ki Kunihito na makapag-eskuela sa laog nin labi pang sarong taon.

Sa Korte Suprema

An sarong editoryal sa peryodikong Kobe Shimbun kan huri nagsabi: “An Junta nin Eskuelahan sa Siudad nin Kobe asin an eskuelahan maninigo kutanang inako liwat si Mr. Kobayashi sa eskuelahan kan panahon na idto [pakatapos kan desisyon kan Korte Suprema sa Osaka]. . . . An saindang dai kinakaipuhan na pakipagkomprontasyon hinalean an sarong tawo nin mahalagang panahon kan saiyang pagkabarobata.” Pero, pinanindogan kan Kobe Tech an kasong ini. Bilang resulta, iyan nagin topiko nin mga bareta sa bilog na nasyon. Nakarisa an mga maestro asin mga autoridad nin eskuelahan sa bilog na nasyon, asin an desisyon hale sa pinakahalangkaw na korte sa nasyon magrerepresentar sa sarong mas makosog na legal na ehemplo para sa kaparehong mga kaso sa ngapit.

Kan Enero 17, 1995, mga sarong semana pakatapos na iapelar kan eskuelahan an kaso sa Korte Suprema, an linog sa Kobe namatean sa Siudad nin Ashiya kun saen nag-eerok si Kunihito asin an saiyang pamilya. Kan mga lampas nang ala singko y media kan agang idto, nagkapirang minuto bago namatean an linog sa lugar na iyan, si Kunihito naghale sa saiyang harong tanganing magduman sa saiyang trabaho na por ora. Nagbibisikleta sia sa tinampo na nasa sirong kan Hanshin Expressway, asin kan maglinog, padangadang na sia sa kabtang na buminagsak. Tolos-tolos siang nagpuli asin nanompongan an primerong iskalon kan saiyang harong na biyong narunot. Naisip ni Kunihito na puedeng pasil sana kutanang nagadan sia sa linog asin nagpasalamat sia ki Jehova sa pagtogot sa saiya na makaligtas. Kun sia nagadan, posible na an kaso manongod sa kendo natapos kutana na mayong desisyon kan Korte Suprema.

An Korte Suprema sa Hapon sa parate sinisiyasat an mga apelasyon paagi sana sa papel asin hinuhusgaran kun baga tama o sala an mga desisyon kan mas hababang korte. Apuera kun may magabat na rason na baliktadon an desisyon kan mas hababang korte, mayong mga bista na nangyayari. Dai pinapaisi kan korte an kalabot na mga lado kun noarin itatao an opinyon. Kaya nabigla si Kunihito kan aga nin Marso 8, 1996, kan sabihan sia na an desisyon itatao kan agang idto. Sa saiyang kagayagayahan asin kaogmahan, naaraman nia na sinuportaran kan Korte Suprema an desisyon kan Korte Suprema sa Osaka.

An apat na huwes, na pinangengenotan ni Huwes Shinichi Kawai, may pagkaoroyon na nagdesisyon na “an mga aksion na nasa isyu maninigong ibilang na labi-labi kabakong tama sa punto-de-vista kan mga pamantayan na inaako kan sosyedad, na minasuhay sa mga diretso kaiyan na maghusgar sono sa ley, asin huli kaiyan ilegal.” Minidbid kan korte an sinseridad kan pagsayuma ni Kunihito na magsanay sa kendo asin sinabi: “An rason kan apelado sa pagsayuma na magpartisipar sa mga pagsasanay sa kendo odok asin konektadong marhay sa pundasyon kan saiyang pagtubod.” Naghusgar an Korte Suprema na an eskuelahan puede kutana asin maninigo kutanang nagtao nin kasalihid na mga paagi tanganing igalang an relihiosong paniniwala kan apelado.

Halawig na Epekto

Daing duwa-duwa na an desisyon na ini nagtatao nin marahay na ehemplo apabor sa katalingkasan nin pagsamba sa mga eskuelahan. An The Japan Times nagsabi: “An desisyon iyo an kaenot-enoteng itinao kan Korte Suprema manongod sa isyu nin edukasyon asin katalingkasan nin relihion.” Minsan siring, dai hinahale kan desisyon an paninimbagan nin kada hoben na estudyante na gumibo kan saiyang sadiring paninindogan na sono sa konsensia kun napapaatubang sa mga pagbalo sa pagtubod.

Si Propesor Masayuki Uchino kan Unibersidad nin Tsukuba nagkomento na an saro sa mga dahelan na nagpahiro sa mga huwes na tumao nin kapangganahan ki Kunihito iyo na sia “sarong sinserong estudyante na ekselente an mga grado.” An Biblia nagtatao kan hatol na ini sa mga Kristiano na napapaatubang sa mga pagbalo sa saindang pagtubod: “Papagdanayon na marahay an saindong ugale sa tahaw nin mga nasyon, tanganing, sa mga bagay na ipinagtataram ninda kontra saindo na garo baga kamo naggibo nin maraot, tibaad huli sa saindong marahay na mga gibo na saindang naheheling pamurawayon ninda an Dios sa aldaw kan saiyang pagsiyasat.” (1 Pedro 2:12) Ikapaheheling nin fiel na hoben na mga Kristiano na an saindang paninindogan na basado sa Biblia angay na igalang kan mga tawo paagi sa saindang lubos na pamumuhay sono sa mga pamantayan kan Biblia.

Pakatapos kan desisyon kan Korte Suprema, si Kunihito Kobayashi inako liwat sa Kobe Tech. An kadaklan kan mga estudyante na kadungan ni Kunihito na luminaog sa eskuelahan nakagraduwar na. Si Kunihito nag-aadal ngonyan kaiba nin mga estudyante na mas ngohod sa saiya nin limang taon. Sa mga mata kan dakol na tawo sa kinaban, limang mahalagang marhay na taon kan saiyang pagkabarobata an garo baga nasayang. Minsan siring, an integridad ni Kunihito mahalagang marhay sa mga mata ni Jehova Dios, asin an saiyang pagsakripisyo bako nanggad na daing kamanungdanan.

[Nota sa Ibaba]

[Mga retrato sa pahina 20]

Sa wala: An harong ni Kunihito pakatapos kan linog

Sa ibaba: Si Kunihito ngonyan