Pagdara nin Espirituwal na Katalingkasan sa mga Nasa Bilanggoan

“NAGPAPARAHALAT na kami sa saindo.” “Kaining nakaaging pirang banggi, napangatorogan ko an pagdatong nindo.” “Salamat sa pag-asignar nindo nin saro tanganing songkoon kami nin regular.” “Boot ming ipahayag an samong pasasalamat sa gabos na bendisyon na dai mi na kutana maninigong akoon gikan ki Jehova asin sa saiyang organisasyon patin sa espirituwal na kakanon na itinatao sa tamang panahon.”

Ano an rason ta ipinahayag an mga pasasalamat na ini? Nagkapirang kapahayagan ini nin mga preso sa laen-laen na bilanggoan sa Mejico. Inaapresyar ninda an atension na saindang inaako sa Mga Saksi ni Jehova, na nagdara sa sainda nin espirituwal na katalingkasan dawa ngani nasa bilanggoan pa. Sa Mejico igwa nin 42 na karsel kun saen regular na pinaglilingkodan kan Mga Saksi ni Jehova an espirituwal na mga pangangaipo nin mga preso. An mga lugar na ini inaapod na Centro Readaptación Social (Sentro nin Sosyal na Rehabilitasyon). Sa nagkapirang bilanggoan na ini, regular nganing ginigibo an Kristianong mga pagtiripon na may marahayon na mga resulta. Halimbawa, sa sarong dai pa sana nahahaloy na pagbilang, mga 380 katawo an nag-aatender sa mga pagtiripon sa mga lugar na ini. Kan panahon na iyan may promedyong 350 pag-adal sa Biblia an kinokonduktahan. Treinta y siete an nakualipikar na pumoon na maghulit, asin 32 an nagdusay kan saindang buhay ki Jehova, na sinisimbolisaran ini paagi sa bautismo sa tubig.

Kun Paano Iyan Ginigibo

Paano ginigibo kan Mga Saksi ni Jehova an saindang paghuhulit sa mga lugar na ini? Enot dinudumanan ninda an namamahalang mga opisyal tanganing humagad nin nasusurat na autorisasyon na lumaog sa bilanggoan, na nagpapaliwanag kan katuyohan kan mga pagsongko​—tokdoan an mga preso kun paano paooswagon an saindang kualidad nin buhay asin maglingkod sa Dios sa paaging nakasosono sa saiya.

Sa kada kaso nagtotogot an mga autoridad. Inaapresyar kan mga opisyal na ini an pagtotokdo sa Biblia na itinatao sa mga preso. Namasdan kan mga autoridad sa bilanggoan na an Mga Saksi ni Jehova nagkukuyog sa mga regulasyon sa seguridad na inestablisar para sa mga lugar na ini. Tinogotan ninda an nagsosongkong mga ministro na ini na gamiton an mga opisina, kakanan, asin trabawohan tanganing pagtiriponan ninda. Sa sarong lugar an mga Saksi tinogotan pa nganing magtogdok nin sadit na Kingdom Hall, siring sa ipinaheheling sa minasunod na eksperyensia na isinaysay nin sarong nagbibiaheng paraataman sa timog-sirangan na Mejico.

“Sa kapinonan nin 1991 pinonan ming songkoon an bilanggoan sa Tehuantepec, Oaxaca, kun saen nanompongan mi an dakulang pagkagutom sa espirituwal. Dai nahaloy nakapoon kami nin 27 pag-adal sa Biblia. Huli sa interes kan mga preso, limang pagtiripon kan kongregasyon an iiniskedyul. An saro sa mga preso, na nagpaheling nin dakulang pagkamoot ki Jehova, nagdesisyon na magtogdok nin sadit na Kingdom Hall sa laog kan bilanggoan tanganing magkaigwa nin pagtitiriponan. Nagduman sia sa direktor kan bilanggoan asin naghagad nin pagtogot, asin nakikooperar na marhay an mga autoridad. Sa pagpoon nin Disyembre 1992, anom na preso an nakualipikar bilang mga parahayag kan maogmang bareta. Huli sa ipinaheling na pag-oswag, ginibo an mga areglo na gibohon an Memorial sa laog kan bilanggoan. Hinagad mi an pagtogot kan direktor kan bilanggoan na ilaog an mga emblema​—an tinapay asin arak—​asin pakatapos nin apat na oras na orolay, itinao an pagtogot.

“Natagbo na kan Abril 3, 1993 (tolong aldaw bago an selebrasyon nin Memorial), nagkapirang preso an pinaluwas. Kan maresibi kan sarong parahayag an saiyang papeles sa pagluwas, hinagad niang makaolay an direktor kan bilanggoan tanganing kumua nin pagtogot na magdanay sagkod na matapos an selebrasyon nin Memorial. Talagang ikinabigla ini kan direktor, huli ta ini bako nanggad na ordinaryong kahagadan, alagad huli sa dakulang interes kan preso na makaatender sa Memorial duman sa bilanggoan, itinao nia an kahagadan. An Memorial inatenderan nin 53 katawo, na napaluha sa kagayagayahan pagkatapos kan programa. Nagkaoroyon kami na apodon an grupong ini na ‘Katalingkasan Cereso,’ huli ta talingkas sinda sa espirituwal na sentido.”

Inaapresyar na marhay sa mga lugar na ini an gibohon kan Mga Saksi ni Jehova. Sa saro sa mga bilibid na ini, an namamahala hayag na irinerekomendar an pag-atender sa mga pagtiripon kan Mga Saksi ni Jehova bilang “terapi” para sa marikas na pagbabagong-buhay nin mga preso.

Sarong Mapangganang Programa nin Rehabilitasyon

An aktibidad kan Mga Saksi ni Jehova nagbunga nin biyong pagbabagong-buhay nin dakol na preso. Minsan ngani parateng totoo na an mga nabilanggo minabalik sa pagigin kriminal oras na paluwason sinda, idtong mga tunay na nag-ako sa mensahe kan Tataramon nin Dios lubos na nagbago. An saindang pagbabago nagpapagirumdom sa sato kan mga tataramon ni apostol Pablo: “Bakong mga parapakisaro . . . , ni mga parahabon, ni mga paslo, ni mga paraburat, ni mga paramuda, ni mga parakikil an magmamana kan kahadean nin Dios. Alagad ta arog kaiyan kaidto an nagkapira sa saindo. Alagad kamo nahugasan na, alagad kamo sinantipikar na, alagad kamo ipinahayag nang matanos sa ngaran kan satong Kagurangnan na si Jesu-Cristo asin sa espiritu kan satong Dios.”​—1 Corinto 6:​9-11.

An pambihirang pagkaliwat sa saindang personalidad maririsa kun ipinahahayag ninda an saindang mga saboot. Siring kaini an pagkasabi kaiyan ni Miguel, na nasa bilanggoan nin Campeche sa Siudad nin Campeche: “Ngonyan masasabi kong may kagayagayahan na ibinibilang ko an sakong sadiri na kaiba sa ibang karnero na igwa kan paglaom na nakarekord sa 2 Pedro 3:​13 asin Mateo 5:5.” Si José, na nasa bilanggoan nin Koben, Campeche, nagkomento: “Minsan ngani saro akong preso asin tibaad magabat na marhay an sakong krimen, nasasabotan ko na si Jehova maheherakon na marhay asin naghihinanyog sa sakong mga pamibi asin pagngayongayo. Puede niang ipatawad an sakong mga kalapasan asin itao sa sako an oportunidad na gamiton an natatada pa kan sakong buhay sa paghiras kan maogmang bareta manongod sa Kahadean nin Dios. Nagpapasalamat kami sa samong kamagurangan sa itinao nindang panahon sa pagsongko sa samo sa karsel tanganing makinabang kami sa mga panuga kan Kahadean nin Dios. Kanigoan kanakaoogmang mga bendisyon! Masasabi ko daw na ako sarong preso? Dai, itinao sa sako ni Jehova an espirituwal na katalingkasan na kaipuhan ko.”

Ano an nagpapabago sa mga paragadan, paralugos, parasolo, parahabon, asin iba pa na magin mga Kristianong namumuhay nin tanos? Sono sa mga tawo man sanang ini, iyan an nakapababagong puersa kan Tataramon nin Dios asin an marahay na pakikiasosyar sa tunay na debotadong mga tawo. An kaso ni Tiburcio, na nabibilanggo sa bilibid sa Mazatlán, Sinaloa, nag-iilustrar sa kapangganahan kaining programa nin rehabilitasyon. Nabilanggo sia sa Concordia, Sinaloa, kun saen nagkaproblema sia huli sa saiyang pagigin grabe kaaranggoton. An saiyang agom saro sa Mga Saksi ni Jehova, asin maraoton kaidto an pagtrato nia sa saiya, dawa kun sinosongko sia kaini sa karsel. Pasensiosa ini asin permi siang sinosongko, kaya hinagad nia sa saiyang agom na darahon sa saiya an libro na Puwede Kamong Mabuhay Sagkod Lamang sa Paraiso Digdi sa Daga, na pinonan niang adalan na sia sana.a Dangan hinagad niang may magduman sa karsel tanganing makipag-adal sa saiya. Nagpoon siang umoswag sa espirituwal, asin an saiyang relasyon sa iba nagpoon na magrahay. Ibinalyo sia sa bilanggoan sa Mazatlán na duman igwa nin grupo na nag-aadal sa Biblia, asin ngonyan saro na siang parahayag. Nagkomento sia: “Ngonyan, kaiba an sakong agom asin mga aki pati an kairiba kong preso, nagpapasalamat akong marhay na madangog an mga katotoohan sa Biblia sa lugar na ini, na may paglaom na sa harani nang ngapit, mapaluluwas ako asin makaaatender sa gabos na asamblea asin pagtiripon kan kongregasyon.”

Yaon man si Conrado, na nagpapasalamat na marhay sa nagibo niang mga pagbabago sa saiyang buhay. Grabe an saiyang problema sa pag-agom kaya sia binayaan kan saiyang agom. Kaya naghanap sia nin karangahan sa droga. Pag-abot nin panahon nagin parapabakal sia nin droga. Naaresto sia asin nasentensiahan na mabilanggo huli sa pagpaktora nin marihuana asin cocaina. Sa bilanggoan igwa nin grupo na nag-aadal sa Biblia kaiba kan Mga Saksi ni Jehova, asin inimbitaran siang mag-adal kaiba ninda. Siring kaini an pagkapahayag nia kan saiyang saboot: “Naghanga ako sa aregladong paagi nin pagkondukta sa mga pagtiripon, sa programa nin pagsiyasat paagi sa mga publikasyon, asin sa bagay na an gabos basado sa Biblia. Tolos-tolos akong naghagad nin pag-adal sa Biblia asin nagpoon na umatender sa mga pagtiripon.” Idto kan Enero 1993. Ngonyan si Conrado nakaluwas na sa bilanggoan asin padagos na nag-ooswag sa laog kan Kristianong kongregasyon.

An Islas Marías

Sa Mejico igwa nin kinatatakotan na bilanggoan na kompuesto nin apat na isla na inaapod na Islas Marías. An mga preso puedeng maglibot sa mga islang presohan kun saen sinda nakakarsel. An nagkapira nag-iistar duman kaiba an saindang agom asin mga aki.

Sarong sadit na kongregasyon an naestablisar. Tolong tugang na lalaki hale sa Mazatlán an nagbibiahe duman sarong beses kada bulan, na nagtatabang sa pagkondukta sa mga pagtiripon, pagtao nin mga babasahon, asin pagtao nin pamparigon sa boot. Kun beses nagduduman an paraataman sa sirkito tanganing songkoon sinda. An promedyong bilang nin nag-aatender 20 sagkod 25. Igwang apat na bautisado asin duwang dai pa bautisadong parahayag. Ibinareta kan nagbibiaheng paraataman na “an nagkapira naglalakaw nin 17 kilometros [10 milya] tanganing umatender sa mga pagtiripon kun Domingo asin kaipuhan na humale sa pagtiripon na naghihidaling makapuli tanganing magin presente sa pag-apod sa saindang ngaran. Dawa marikas an lakaw, naglalabing duwang oras an pagpuli.” An saro sa mga tugang, na nakanood kan katotoohan sa bilanggoan na idto, nagsabi dai pa sana nahahaloy: “Dati interesado akong makaluwas tolos, alagad ngonyan puede man kun noarin booton ni Jehova, huli ta sa ano man na kamugtakan kadakol kan sakong gigibohon digdi sa laog.”

Naoogma kitang maheling na an katotoohan mapuersang naghihiro tanganing butasan an mga sinserong naghahanap nin paagi na paogmahon si Jehova. An labing sarong dosena kaini, na nakanood kan katotoohan sa bilanggoan, napaluwas na, nagpabautismo, asin ngonyan kagalanggalang an pamumuhay bilang mga lingkod nin Dios, na an nagkapira ngani nagin mga magurang sa kongregasyon. An puersa kan Biblia na paomayan an mga puso asin bakleon an mga tawo dramatikong ikinapaheling. Oras na lumaog sa dana kan liwanag kan Tataramon nin Dios an mga tawong ini na nakarsel huli sa pagkomitir nin salang mga gibo, naeeksperyensiahan ninda an tunay na katalingkasan na ipinanuga ni Jesus kan sabihon nia: “Mamimidbid nindo an katotoohan, asin bubutasan kamo kan katotoohan.”​—Juan 8:32; Salmo 119:105.

[Nota sa Ibaba]

[Retrato sa pahina 23]

Dakol an nakinabang sa Kristianong mga katotoohan na saindang nanodan sa bilanggoan