Ginarantiyahan an Seguridad sa Kakanon Para sa Kinaban—Paagi sa Ano?

“AN SATONG pinakamarahay na mga paghihingoa tibaad bakong igo tanganing papagdanayon an seguridad sa kakanon na naaraman niato sa dakulang kabtang kan siglong ini,” an sabi ni Lester Brown, an presidente kan Institusyon nin Pagmasid sa Kinaban sa Washington, D.C. Oyon sa magasin na New Scientist, sa pagpopoon kan 1995, an reserbang tipasi kan kinaban buminaba na marhay na dai pang kaagid kasuarin man sa 255 milyon na tonelada​—igong pakakanon an kinaban sa laog nin 48 aldaw sana. Sa nakaaging mga taon kan an mga reserba buminaba pa sa makokonsumo sa laog nin 60 aldaw, an suplay nakabawi pa. Alagad ngonyan an Pagmasid sa Kinaban dai nakasisierto sa abilidad kan daga na mabawi an kalugihan kaiyan.

Pakalihis nin tolong taon nin maluyang mga pag-ani asin an paggamit nin tipasi na pambahog sa ataman na kayahopan nin dakol na nagpoprogresong nasyon, mas kadikit an tipasi na makukua kan mga dukha na nangangaipo kaiyan bilang mayor na kakanon. An New Scientist nagpatanid na kun dai tolos asikasohon an situwasyon, an sarong bilyon katawo na naggagasto nin kisuerra 70 porsiento kan saindang entrada para sa kakanon tibaad magkagurutom na.

Ihinula kan Biblia na an mga nag-iistar sa daga sa satong panahon makaeeksperyensia nin “pagkulang nin kakanon.” (Lucas 21:11) Pero an Dios bakong daing pakiaram sa problema. Tunay nanggad, an saiyang pagmakolog sa mamondong kamugtakan kan tawo sa katapustapusi maheheling kun kontrolon na kan saiyang Kahadean an mga pangyayari sa daga. Sa panahon na iyan “an daga mismo magtatao kan bunga kaiyan.” “Magkakaigwa nin kadakoldakol na tipasi sa ibabaw kan daga; magkakaigwa nin abundansia sa alitoktok kan kabukidan.” (Salmo 67:​6; 72:16) Dangan an makahulang mga tataramon na ini mapadapit sa Kaglalang maootob: “Itinao mo an saimong atension sa daga, tanganing papagsopayon mo iyan . . . An mga kababan mismo napapatos nin tipasi.”​—Salmo 65:​9, 13.

Nakaaakit daw sa saindo an makangangalas na panugang iyan? Gusto daw nindong maaraman kun paano kamo magigin kabtang kaiyan? Kun siring hagadon nindo sa Mga Saksi ni Jehova na sabihon sa saindo an orog pa manongod sa panugang ini na Paraiso sa sunod na dumalaw sinda sa saindong pinto.

Kun gusto nindong songkoon kamo nin saro na makikipag-adal sa saindo sa Biblia nin daing bayad, tabi sumurat sa Watch Tower, P.O. Box 2044, 1060 Manila, o sa angay na direksion na nalilista sa pahina 2.

[Pasasalamat para sa pinagkuanan kan retrato sa pahina 32]

Retrato sa laog: Pictorial Archive (Near Eastern History) Est.