Mga Libro, mga Libro, mga Libro!

“An paggibo nin dakol na libro mayo nin katapusan,” an isinurat kan madonong na si Hadeng Salomon kan suanoy. (Eclesiastes 12:12) Durante kan 1995 haros sarong bagong libro an ipinublikar sa Britania para sa kada 580 kan populasyon, na pinangyayari an nasyon na iyan na mangenot sa kinaban sa pagpublikar nin bagong mga libro. An Tsina, an nasyon na may pinakadakulang populasyon, nag-ikaduwa na may 92,972 na edisyon kun ikokomparar sa 95,015 kan Britania. Suminunod an Alemania (67,206 na libro), dangan an Estados Unidos (49,276), na sinundan kan Pransia (41,234). “An pangengenot kan Britania sa bilog na kinaban sa pangenot huli sana sa lenguaheng Ingles,” an sabi kan diaryo sa Londres na The Daily Telegraph.

Ipinaheheling kan mga report na an pagpabakal nin mga libro luminuya na sa nagkapirang taon, asin ngonyan 80 porsiento na sana kan mga adulto sa Britania an nagbabakal nin sarong libro o labi pa sa sarong taon. Alagad binabasa daw nin mga tawo an gabos na librong binabakal ninda?

An sarong libro na padagos na mahiwas na idinidistribwir asin binabasa man iyo an Biblia, na ngonyan makukua na an mga kabtang o an kabilogan sa labing 2,120 lenguahe. Kun mayo pa kamo nin sadiring kopya, kontakon an opisina kan Watch Tower Society na pinakaharani sa saindo tangani na makakua kamo nin saro. Kun igwa na kamo nin Biblia, iluwas iyan asin siyasaton an Makakasuratan na mga reperensia na maheheling sa mga artikulo sa magasin na ini. Sa paggibo kaiyan, maaaraman nindo an nagtataong-buhay na kaaraman sa Biblia.