Puede daw Kamong Tumubod sa Sarong Personang Dios?
“DAI mo kaipuhan na tumubod sa Dios tanganing magin Kristiano . . . Kabtang kita nin sarong rebolusyon ngonyan, alagad sa ika-21 siglo an iglesia magigin daing Dios sa tradisyonal na sentido,” an paliwanag nin mayor na kapelyan sa sarong unibersidad sa Britania. Sia nagtataram para sa mobimientong Kadagatan nin Pagtubod na suportado nin kisuerra sanggatos na pading Britano. An “mga ateistang Kristiano” na ini nag-iinsister na an relihion lalang nin mga tawo asin na, siring sa pagkasabi dian nin sarong miembro, an Dios saro sanang “ideya.” An sarong lihis sa natural na Dios dai na bagay sa saindang pag-iisip.
“An Dios gadan” sarong popular na sarabihon kan mga taon nin 1960. Nagpabanaag iyan kan mga punto de vista kan pilosopong Aleman kan ika-19 siglo na si Friedrich Nietzsche asin nagtao sa dakol na hoben kan sarahotan na gibohon an gusto ninda, magpagusto sa libreng pagkamoot asin pag-abuso sa droga na mayo nin restriksion sa moral. Alagad an siring daw na katalingkasan naggiya sa mga hippie, siring sa nagin apod sa sainda, sa mas nakakokontentong buhay na may kaogmahan?
Sa dekada man sanang iyan, an obispong Anglicano na si John A. T. Robinson ipinublikar an saiyang kontrobersial na librong Honest to God. An kadaklan sa saiyang kapwa klerigo tinatsaran sia huli sa pag-isip na an Dios “kapareho sana nin sarong sokol nin rarom sa eksperyensia nin tawo.” An propesor sa teolohiya na si Keith Ward naghapot: “An paniniwala daw sa Dios sarong lihis na sa usong superstisyon, na hinahaboan na ngonyan kan mga madonong?” Sinisimbag an sadiri niang hapot, sia nagsabi: “Mayo nang orog pang mahalaga sa relihion ngonyan kisa sa ikabalik an sarong kaaraman sa tradisyonal na ideya dapit sa Dios.”
Pagdusa Asin Sarong Personang Dios
An dakol na nagtutubod sa sarong personang Dios nasasakitan na ikonektar an saindang paniniwala sa mga trahedya asin pagdusa na naheheling ninda. Halimbawa, kan Marso 1996, 16 na aki, kaiba an saindang maestra, an binaradil asin nagadan sa Dunblane, Scotland. “Dai ko lang masabotan an kabotan nin Dios,” an sabi nin sarong babae na nariribok an boot. An labi-labing kamondoan huli sa trahedya ipinahayag sa sarong kard na iwinalat na may kaibang mga burak sa luwas kan eskuelahan kan mga aki. Iyan may nakasurat na, “TAANO?” Bilang simbag an ministro sa Katedral kan Dunblane nagsabi: “Dai ini ikapaliliwanag. Dai niato masisimbag kun taano ta nangyari ini.”
Sa huri kan taon man sanang iyan, an sarong popular na hoben pang klerigo kan Iglesia nin Inglaterra maringis na ginadan. An Church Times nagbareta na an sarong namungnan na kongregasyon nadangog an arkidiakono kan Liverpool na nagtataram dapit sa “pagpukpuk sa pinto nin Dios na naghahapot kun taano? taano?” An klerigong ini mayo man nin itinaong nakararangang mga tataramon gikan sa sarong personang Dios.
Ano, kun siring, an tutubodon niato? Rasonableng tumubod sa sarong personang Dios. Iyan an liabe sa pagsimbag sa mapuersang mga hapot na pinalataw sa enotan. Inaagda mi kamo na estudyaran an ebidensia na iinaatubang sa minasunod na artikulo.
[Retrato sa pahina 3]
An kard naghapot kun “Taano?”
[Pasasalamat para sa pinagkuanan]
NEWSTEAM No. 278468/Sipa Press