Sarong Pag-agoman na Nagdadanay na Birhen?

SA PAGPROBAR na papagkaoyonon an sinasabing daing sagkod na pagkabirhen ni Maria asin an pag-agoman ninda ni Jose, dakol na pintor asin eskultor an ilinadawan si Jose na sarong lalaking may edad na. Nangatanosan sinda na si Jose talagang mas siring sa sarong paraasikaso ki Maria kisa sa sarong agom. Alagad idinepensa ni Papa Juan Paulo II sa dai pa sana nahahaloy an sarong laen na punto de vista sa bagay na iyan. Isinusuherir nia na si Jose “bakong may edad nang lalaki kan panahon na idto.” Imbes, an “saiyang panlaog na pagkasangkap, na bunga nin biyaya, nakaimpluwensia sa saiya na mamuhay bilang agom ni Maria na may kapadangatan na papagdanayon siang birhen.”

Kun intension ni Maria na magdanay na birhen sagkod lamang, taano sia ta nakipagtrato? “Puedeng ipamugtak,” an simbag kan papa, “na kan panahon kan saindang pagtipan na pakasal igwa nin kasundoan sinda Jose asin Maria manongod sa planong mamuhay bilang birhen.”

Minsan siring, iinaatubang kan Biblia an bagay na iyan sa laen na paagi. An pagkasaysay ni Mateo nagsasabi na si Jose “dai nakidorog sa saiya sagkod na sia mangaki nin sarong lalaki.” (Mateo 1:​25, Katolikong New American Bible, samo an italiko.) Pagkamundag ni Jesus, an pag-agoman ninda Jose asin Maria bako na nanggad na nagdadanay na birhen. An sarong prueba kaini iyo na kan huri sa pagkasaysay kan Ebanghelyo, ipinaheheling si Jesus na may mga tugang na lalaki asin babae.​—Mateo 13:​55, 56.

Sa siring, minsan ngani an Biblia nagsasabi na si Maria sarong birhen kan ipangaki nia si Jesus, mayong basehan sa pagsabi na sia namuhay na birhen sa bilog niang buhay kaiba ni Jose.